రహస్య ప్రేయసిని స్విస్ కొండల్లో భద్రంగా దాచిపెట్టిన పుతిన్!

ఉక్రెయిన్‌‌‌తో యుద్ధం నేపథ్యంలో తన కుటుంబాన్ని సురక్షితంగా సైబీరియా ప్రాంతంలోని అట్లాయ్ పర్వతాల వద్ద నిర్మించిన అణుబంకర్లలో భద్రంగా దాచిపెట్టిన విషయం తెలిసిందే. అలాగే, తన రహస్య ప్రియురాలు, ఒలింపిక్స్‌తో స్వర్ణం సాధించిన జిమ్నాస్ట్ అలీనా కబయేవాను కూడా పుతిన్ రహస్య ప్రాంతానికి తరలించినట్టు తెలుస్తోంది. స్విట్జర్లాండ్‌లో అలీనా కబయేవా, ఆమెకు పుట్టిన నలుగురు పిల్లలను అత్యంత భద్రమైన, గోప్యమైన ప్రాంతంలో నిర్మించిన షాలేలో (కొండ ప్రాంతాల్లో నిర్మించే చెక్కల కట్టడాలు) ఉంచినట్టు సమాచారం. జిమ్నాస్టిక్స్ వదిలి పెట్టిన తర్వాత అలీనా కబయేవా (38) రష్యా రాజకీయాల్లోకి ప్రవేశించారు. 1983లో పుట్టిన అలీనా.. మూడేళ్ల వయసులోనే రిథమిక్ జిమ్నాస్టిక్స్‌ సాధన ప్రారంభించారు. 15 ఏళ్ల వయసుకే ఐరోపా ఛాంపియన్‌షిప్‌ను గెలుచుకుని అత్యంత చిన్నవయసులో ఆ ఘనత సాధించిన తొలి రష్యన్‌గా నిలిచారు. 1999 రెండోసారి యూరోపియన్ ఛాంపియన్‌షిప్, వరల్డ్ టైటిల్‌ను గెలుపొందారు. రెండు ఒలింపిక్ పతకాలు, 14 వరల్డ్ ఛాంపియన్‌షిప్‌ టైటిళ్లు, 21 ఐరోపా ఛాంపియన్‌షిప్‌ టైటిళ్లు సొంతం చేసుకున్నారు. డోపింగ్ ఆరోపణలతో రెండేళ్లు నిషేధం ఎదుర్కొన్న అలీనా.. 2004లో రిటైర్మెంట్ ప్రకటించారు. అనంతరం రాజకీయాల్లోకి ప్రవేశించి 2005లో పబ్లిక్ ఛాంబర్‌ ఆఫ్ రష్యా సభ్యురాలిగా తర్వాత 2008లో పబ్లిక్ కౌన్సిల్ ఆఫ్ జాతీయ మీడియా గ్రూప్ ఛైర్మన్‌‌గా ఉన్నారు. 2007, 2014లో దుమా రాష్ట్రం నుంచి యునైటెడ్ రష్యా పార్టీ తరఫున ఎంపీగా గెలిచారు. ఈ క్రమంలో పుతిన్‌తో కబయేవాకు సాన్నిహిత్యం ఏర్పడి.. ఇరువురి మధ్య బంధం బలపడింది. తొలిసారిగా 2008లో పుతిన్-కబయేవా రిలేషన్‌షిప్‌ వార్తలు గుప్పమున్నాయి. భార్యకు విడాకులిచ్చి కబయేవాను పెళ్లిచేసుకునే అలోచనలో పుతిన్ ఉన్నట్టు స్థానిక మీడియాలో జోరుగా ప్రచారం జరిగింది. అయితే, వీటి ఖండించిన పుతిన్.. సదరు పత్రికపై కక్షసాధింపు చర్యలకు పాల్పడ్డారు. 2016లో పుతిన్ తన మొదటి భార్య నుంచి విడాకులు తీసుకున్న తర్వాత కబయేవా తన ఉంగరపు వేలికి ఉంగరాన్ని ధరించి ఉండటంతో పెళ్లి చేసుకున్నట్టు ఊహాగానాలు వెలువడ్డాయి. అయితే, ఈ ఇద్దరి బంధాన్ని పుతిన్ పార్టీగానీ, క్రెమ్లిన్ గానీ ధ్రువీకరించలేదు. తరుచూ వీటిని ఖండిస్తోంది. గతంలో పుతిన్ తన వ్యక్తిగత విషయాలపై జరుగుతున్న తప్పుడు ప్రచారాన్ని ఖండించారు. 2004లో డేవిడ్ ముసెలియాని అనే పోలీస్ అధికారితో కబయేవాకు నిశ్చితార్థం జరిగింది. అయితే ఏడాది తర్వాత 2005లో ఇద్దరూ విడిపోయారు. అయితే, పుతిన్, కబయేవాకు నలుగురు పిల్లలు ఉన్నారని ప్రచారం ఉంది. ఇద్దరు అబ్బాయిలు, ఇద్దరు అమ్మాయిలు స్విట్జర్లాండ్‌లో పుట్టారని, వీరికి స్విస్ పాస్‌పోర్ట్ ఉందని తెలుస్తోంది. 2018 అక్టోబరు నుంచి బయట ప్రపంచానికి కనిపించని కబయేవా.. మూడేళ్ల తర్వాత గతేడాది బయటకు వచ్చారు.

By March 08, 2022 at 08:20AM

Read More https://telugu.samayam.com/latest-news/international-news/russian-president-putin-hiding-lover-alina-kabaeva-and-their-kids-in-switzerland/articleshow/90066146.cms