ఆపరేషన్ గంగ ద్వారా బయటపడ్డ కేరళ వ్యక్తి.. పుట్టబోయే అతడి బిడ్డకు అదే పేరు
రష్యా- ఉక్రెయిన్ మధ్య జరుగుతున్న యుద్ధంలో చిక్కుకున్న భారతీయులను తరలించడానికి కేంద్ర ప్రభుత్వం ‘ఆపరేషన్ గంగ’ను చేపట్టిన విషయం తెలిసిందే. ఈ మెషిన్ ద్వారా వేలాది మందిని భారత్‌కు సురక్షితంగా తీసుకొస్తున్నారు. కేరళకు చెందిన ఒక వ్యక్తి తన గర్భిణి భార్యతో సహా కీవ్‌లో చిక్కుకుపోగా.. కింద భారత రాయబార కార్యాలయ సిబ్బంది సహాయంతో సురక్షితంగా అక్కడ నుంచి బయటపడ్డాడు. కేరళకు చెందిన అభిజిత్ ఆ తర్వాత పోలెండ్‌లో భారత రాయబార కార్యాలయం ఏర్పాటు చేసిన ర్జెస్జో‌లోని షెల్టర్ రూమ్‌కు చేరుకున్నాడు. పోలెండ్-ఉక్రెయిన్ సరిహద్దుల్లో ఏఎన్ఐ‌తో అభిజిత్ మాట్లాడుతూ.. దాడి నుంచి గొప్పగా తప్పించుకున్నందుకు ఆనందాన్ని వ్యక్తం చేశాడు.‘‘నా భార్య పోలెండ్ ఆస్పత్రిలో ఉంది.. ఆమె తొమ్మిది నెలల గర్భవతి.. నా భార్య, కడుపులోని బిడ్డలు ఆరోగ్యంగానే ఉన్నట్టు ఆస్పత్రి నుంచి వచ్చిన తాజా నివేదికలో తేలింది.. మార్చి 26న డెలివరీ సమయం ఇచ్చారు.. పుట్టబోయే బిడ్డకు భారత ప్రభుత్వం తరలింపునకు చేపట్టిన రెస్క్యూ ఆపరేషన్ ‘గంగ’ పేరును పెడతాను’’ అని అభిజిత్ తెలిపాడు. వైద్య పర్యవేక్షణ అవసరం కావడంతో ప్రస్తుతం నా భార్య పొలెండ్‌లోనే కొద్ది రోజులు ఉంటుందని, తాను మాత్రం భారత్‌కు వచ్చేస్తున్నట్టు చెప్పాడు. ఉక్రెయిన్ రాజధాని కీవ్‌లో ఓ రెస్టారెంట్‌ను నడుపుతున్న అభిజిత్.. యుద్ధం కారణంగా అక్కడ చిక్కుకున్నాడు. ‘‘కీవ్‌లో ఓ చిన్న రెస్టారెంట్ నడుపుతున్నాను.. నేను కీవ్‌లో చిక్కుకున్నాను.. ఆపరేషన్ గంగ కింద పనిచేస్తున్న అధికారులు నన్ను రక్షించి సురక్షితంగా పోలెండ్‌కు తరలించారు. వారికి, భారత ప్రభుత్వానికి ధన్యవాదాలు తెలుపుతున్నాను’’ అని పేర్కొన్నాడు. అంతేకాదు, తాను ఒక్క పైసా కూడా ఖర్చు చేయకుండా కీవ్ నుంచి పోలెండ్ నగరం ర్జెస్జో‌కు చేరుకున్నానని వివరించాడు. భారతీయుల తరలింపునకు ఆపరేషన్ గంగ ప్రారంభించిన కేంద్ర ప్రభుత్వం.. ఆ తర్వాత వాయుసేనకు చెందిన సీ-17 యుద్ధ విమానాలను రంగంలోకి దింపింది. మరోవైపు, ఉక్రెయిన్ సంక్షోభం క్రమంగా అణు ముప్పు వైపు మళ్లుతోంది. రష్యా సేనలు తాజాగా ఉక్రెయిన్‌లోని జపోర్జియా అణు విద్యుత్తు కేంద్రంపై దాడి చేశాయి. ఈ నేపథ్యంలో సంక్షోభం తీవ్రతరం అవుతోంది.
By March 05, 2022 at 07:35AM
No comments