లూడో లవ్‌స్టోరీ: పాకిస్థానీతో రాజస్థాన్ వివాహిత ప్రేమ.. ఆటోవాలా ఎంట్రీతో అడ్డం తిరిగిన కథ!
ఆన్లైన్, సోషల్ మీడియాలో ఏర్పడిన పరిచయాలు ప్రేమకు దారితీసి వారి కోసం కుటుంబాలను వదిలి వెళ్లడం, దేశ సరిహద్దులు దాటుతున్న ఘటనలు తరుచూ వెలుగుచూస్తున్న విషయం తెలిసిందే. తాజాగా, లూడో గేమ్‌ ద్వారా పరిచయమైన యువకుడి కోసం ఓ వివాహిత తన భర్త, పిల్లలను వదిలేసి దేశ సరిహద్దులు దాటేందుకు ప్రయత్నించింది. చివరిలో పోలీసుల ఎంట్రీతో కథ అడ్డం తిరిగింది. ఈ ఘటన గురువారం పంజాబ్‌లో వెలుగుచూసింది. పోలీసులు తెలిపిన వివరాల ప్రకారం.. రాజస్థాన్‌లోని ధోల్‌పూర్‌కు చెందిన వివాహిత (25) కు ఆన్‌లైన్‌‌లో లూడో గేమ్‌ అలవాటుంది. ఈ క్రమంలో పాకిస్థాన్‌కు చెందిన అలీ ఓ యువకుడితో పరిచయం ఏర్పడి, అది కాస్తా ప్రేమగా మారింది. యువకుడితో కలిసి జీవించాలని.. భర్త, పిల్లలను వదిలేసి రాజస్థాన్ నుంచి బయలుదేరి పంజాబ్‌కు చేరుకొంది. అమృత్‌సర్‌ సమీపంలో ఉన్న వాఘా సరిహద్దుకు చేరుకోవాలని ప్రియుడు అలీ ఆమెకు సూచించాడు. దీంతో ఆమె వాఘా సరిహద్దు వరకూ ఆమె ఓ ఆటోను మాట్లాడుకుంది. ఫలానా చోటుకు తీసుకురమ్మని పాక్ యువకుడు ఫోను ద్వారా డ్రైవర్‌కు సూచించాడు. దీనిపై అనుమానం వచ్చిన డ్రైవరు పోలీసులకు సమాచారం ఇచ్చాడు. వెంటనే అక్కడికి చేరుకున్న పోలీసులు ఆమెను అదుపులోకి తీసుకున్నారు. సెక్యూరిటీ అధికారులు ఆమెను ప్రశ్నించడంతో అసలు విషయం బయటపడింది. ఆన్లైన్ లూడో ద్వారా పాక్ యువకుడితో ఆమెకు ఆరు నెలల కిందట పరిచయం ఏర్పడినట్టు తెలిపింది. మహిళ వద్ద కొంత డబ్బు, నగలు ఉన్నట్లు గుర్తించారు. అనంతరం ఆమె కుటుంబ సభ్యులకు సమాచారం అందించారు. మరోవైపు, కుటుంబసభ్యుల కూడా పోలీసులకు ఫిర్యాదు చేయడంతో అప్రమత్తమయ్యారు. అమృత్‌సర్‌ చేరుకున్న కుటుంబసభ్యులకు ఆమెను పోలీసులు అప్పగించారు. ఆమెకు వివాహం కాగా, రెండున్నరేళ్ల కుమారుడు ఉన్నాడని దోల్‌పూర్ ఎస్పీ తెలిపారు. బోర్డర్ సిబ్బంది తనిఖీల సమయంలో ఎటువంటి అనుమతి పత్రాలు లభించకపోవడంతో అనుమానాస్పద కేసుగా గుర్తించారన్నారు. పాక్ యువకుడి, వివాహిత వాట్సాప్ ద్వారా తరుచూ మాట్లాడుతుండేవారిని చెప్పారు. అంతేకాదు, అతడి గురించి వివాహిత వద్ద పూర్తి సమాచారం లేదని పేర్కొన్నారు.
By January 07, 2022 at 08:27AM
No comments