Breaking News

పంజాబ్: ‘గేమ్ ఛేంజర్’.. కాంగ్రెస్‌లోకి సోనూసూద్ సోదరి


పంజాబ్‌లో అసెంబ్లీ ఎన్నికలకు నగరా మోగడంతో పాక్ సరిహద్దు రాష్ట్రాల్లో రాజకీయ చేరికలు ఊపందుకున్నాయి. తాజాగా, బాలీవుడ్ నటుడు సోదరి మాళవిక సూద్‌ సోమవారం కాంగ్రెస్‌ పార్టీలో చేరారు. మోగాలోని సోనూసూద్‌ నివాసానికి వెళ్లిన పంజాబ్‌ పీసీసీ అధ్యక్షుడు నవ్‌జోత్‌ సింగ్‌ సిద్ధూ.. వారితో కొంతసేపు ముచ్చటించారు. ఆ తర్వాత రాష్ట్ర ముఖ్యమంత్రి చరణ్‌జీత్‌ సింగ్‌ చన్నీ, సిద్ధూ సమక్షంలో మాళవిక.. కాంగ్రెస్‌ కండువా కప్పుకున్నారు. తన సోదరి పంజాబ్ అసెంబ్లీ ఎన్నికల్లో పోటీ చేస్తారని బాలీవుడ్ నటుడు సోనూసూద్ గతంలో ప్రకటించిన విషయం తెలిసిందే. అయితే, తాను మాత్రం రాజకీయాల్లోకి రావడం లేదని ఆయన స్పష్టం చేశారు. కానీ, తన మద్దతు సోదరికి ఉంటుందని ఉద్ఘాటించారు. లాక్‌డౌన్, కరోనా వ్యాప్తి సమయంలో వలస కూలీలు, పేదల పాలిటి ఆపద్భాంధవుడిగా మారి సోనూ సూద్ రియల్ హీరో అనిపించుకున్నారు. కాగా, మాళవిక సూద్ చేరికపై పంజాబ్ పీసీసీ చీఫ్ హర్షం వ్యక్తం చేశారు. ఎన్నికల ముందు గేమ్ ఛేంజర్ అని ఆయన అభివర్ణించారు. ‘‘పార్టీ అధ్యక్షుడు, ముఖ్యమంత్రి ఇద్దరూ ఓ వ్యక్తి నివాసానికి వచ్చి ఆహ్వానించడం గొప్ప గౌరవం.. ఈ గౌరవానికి ఆమె అర్హురాలు.. క్రికెట్ పరిభాషలో దీనిని గేమ్ ఛేంజర్‌గా పేర్కొంటారు.. యువతి, ఉన్నత విద్యావంతురాలు.. సాఫ్ట్‌వేర్ ఇంజనీర్‌గా ఆమె విద్య ఆమెకు భవిష్యత్తులో సహాయపడుతుంది’ అని సిద్ధూ వ్యాఖ్యానించారు. ‘ఓ స్వచ్ఛంద సంస్థను నడుపుతూ మంచి గుర్తింపు తెచ్చుకున్న ఆమె ప్రజలకు సేవ చేయాలనే ఉద్దేశంతో మా పార్టీలో చేరడం నాకు చాలా సంతోషంగా ఉంది’ అని సిద్ధూ పేర్కొన్నారు. మాళవిక సూద్ మాట్లాడుతూ.. ప్రజలకు సేవా చేయాలనే సదుద్దేశంతోనే తాను రాజకీయాల్లోకి వస్తున్నట్లు తెలిపారు. పంజాబ్ అసెంబ్లీకి ఫిబ్రవరి 14న ఒకే దశలో ఎన్నికలు జరగనున్న విషయం తెలిసిందే. మార్చి 10 ఫలితాలు వెల్లడికానున్నాయి. మొత్తం 117 స్థానాలున్న పంజాబ్ అసెంబ్లీలో 2017 ఎన్నికల్లో కాంగ్రెస్ పార్టీ 77 స్థానాల్లో విజయం సాధించి పదేళ్ల తర్వాత మళ్లీ అధికారంలోకి వచ్చింది. ఈసారి అధికారాన్ని నిలుపుకోడానికి సర్వశక్తులనూ ఒడ్డుతోంది. అయితే, ఆమ్ ఆద్మీ పార్టీ పంజాబ్‌లో బలపడటం కాంగ్రెస్‌కు ఇబ్బందికరంగా మారింది. గత ఎన్నికల్లో ఆప్ 20 స్థానాలతో ప్రధాన ప్రతిపక్షంగా అవతరించింది.


By January 11, 2022 at 07:47AM


Read More https://telugu.samayam.com/latest-news/india-news/actor-sonu-sood-sister-malavika-sood-joins-congress-party/articleshow/88822767.cms

No comments