ఇదెక్కడి విడ్డూరం.. రూ.10 కోడి పిల్లకు రూ.50 టిక్కెట్ వసూలుచేసిన కండక్టర్!

బస్సులో పరిమితికి మించిన వస్తువులను, లగేజీని తీసుకెళితే అదనపు ఛార్జీలు చెల్లించడం సహాజం. అయితే, కొడిపిల్లను తీసుకువెళితే కూడా టికెట్ తీసుకోవాలనే విషయం గురించి ఎప్పుడైనా విన్నారా? కానీ ఈ వింత ఘటన కర్ణాటకలో చోటుచేసుకుంది. బస్సులో ప్రయాణిస్తున్న ఓ కుటుంబం తమతోపాటు కోడిపిల్లను తీసుకొచ్చిందని కండక్టర్ హాఫ్ టికెట్ కొట్టాడు. ప్రస్తుతం దీనికి సంబంధించిన ఫోటోలు సామాజిక మాధ్యమాల్లో వైరల్‌గా మారాయి. ఉత్తర కన్నడ జిల్లా సిద్ధపురలోని ఓ సంచార జాతి కుటుంబానికి చెందిన ముగ్గురు వ్యక్తులు రూ.10 పెట్టి కోడి పిల్లను కొనుగోలు చేశారు. వాటితో పాటు హోసనగర నుంచి షిరూరుకు డిసెంబరు 31న కర్ణాటక రాష్ట్ర రోడ్డు రవాణా సంస్థ (కేఎస్ఆర్టీసీ) బస్సు ఎక్కారు. మూడు టికెట్లు కావాలని కండక్టర్ను అడిగిన సమయంలో వారిచేతిలో ఉన్న సంచి నుంచి 'కిచ్కిచ్' అని శబ్దం వచ్చింది. దీనిని గమనించి ఆ బస్సు కండక్టర్.. సంచిని పరిశీలించగా కోడి పిల్ల కనిపించింది. ఆ కోడిపిల్లకు కూడా టికెట్ తీసుకోవాలని, హాఫ్ టికెట్ చెల్లించాల్సిందేనని కండక్టర్ చెప్పాడు. దీంతో అవాక్కయిన ఆ కుటుంబం కొద్దిసేపు కండక్టర్‌తో వాదించింది. బస్సులో కోడిపిల్లకు టికెట్ తీసుకోవాలనే నియమం ఉందని ఖరాఖండిగా చెప్పడంతో చేసేదేం లేక దానికి హాఫ్ టికెట్ తీసుకున్నారు. రూ.10కి కోడి పిల్లను కొనుగోలు చేస్తే రూ.50 పెట్టి దానికి టికెట్ తీసుకోవడం విశేషం. ఇక వారి ప్రయాణానికి మొత్తం రూ.353 ఖర్చు అయింది. ఈ తతంగాన్ని బస్సులోని తోటి ప్రయాణికుడు ఫోటోలు తీసి సోషల్ మీడియాలో షేర్ చేశాడు.

By January 04, 2022 at 09:01AM

Read More https://telugu.samayam.com/latest-news/india-news/family-pay-rs-52-ticket-for-rs-10-chick-in-shivamogga-of-karnataka-viral-video/articleshow/88679739.cms