శ్రీయ అందాలపై శర్వానంద్ క్రేజీ కామెంట్స్.. ఏకంగా ఆ మాటతో ఫిదా చేసేశాడుగా!
గత 20 ఏళ్లుగా సౌత్ ఇండియన్ స్టార్ హీరోయిన్‌గా ఓ వెలుగు వెలుగుతున్న అందాల తార .. పెళ్లి తర్వాత కెరీర్‌కి కాస్త గ్యాప్ ఇచ్చి తిరిగి వెండితెరపైకి రాబోతోంది. తనకు యాప్ట్ అయ్యేలా కథ, క్యారెక్టర్ ప్రాధాన్యమున్న పాత్రలను ఎంచుకుంటానని చెబుతున్న ఈ ముద్దుగుమ్మ.. ఇప్పుడు గమనం సినిమాతో ప్రేక్షకుల ముందుకు రాబోతోంది. డిసెంబరు 10న ఈ సినిమా రిలీజ్ కానున్న నేపథ్యంలో చిత్ర ప్రమోషన్స్‌లో భాగంగా నిన్న (బుధవారం) గ్రాండ్ ప్రీ రిలీజ్ ఈవెంట్ నిర్వహించారు మేకర్స్. ఈ వేడుకకు ముఖ్య అతిథిగా హాజరైన యంగ్ హీరో వేదికపై ఆసక్తికర వ్యాఖ్యలు చేశారు. శ్రీయ అందాలను పొగిడేస్తూ ఆయన చేసిన కామెంట్స్ వైరల్ అవుతున్నాయి. శ్రీయతో కలిసి ‘నువ్వా నేనా’ అనే చిత్రంలో నటించానని, తామిద్దరి మధ్య మంచి స్నేహ బంధం ఉందని చెప్పారు శర్వానంద్. అప్పట్లో శ్రీయ ఎంత అందంగా ఉందో ఇప్పుడు కూడా అలాగే ఉందని అన్నారు. ‘సంతోషం’ సినిమాలో ఎలా ఉందో ఇప్పటికీ అదే అందం కనిపిస్తోందని, తాను శ్రీయ అభిమానినని శర్వా అన్నారు. 'గమనం' కథ తనకూ కూడా వినిపించారని, ఇలాంటి మంచి సినిమాల్లో భాగస్వామి కావాలని తనకూ ఉందని.. కానీ, వేరే కారణాల వల్ల నటించలేక పోయానని శర్వా చెప్పారు. దర్శకురాలు సుజనా రావు ప్రతిభ ఏంటో తనకు తెలుసని చెప్పిన శర్వానంద్.. ఈ గమనం సినిమా మంచి విజయం అందుకోవాలని కోరుకుంటున్నానని అన్నారు. సుజనా రావు దర్శకురాలిగా పరిచయమవుతూ ఈ గమనం మూవీ ప్రేక్షకుల ముందుకు రానుంది. చిత్రంలో శ్రీయ ప్రధాన పాత్ర పోషించగా.. నిత్యా మీనన్, శివ కందుకూరి, ప్రియాంక జవాల్కర్‌ తదితరులు కీలక పాత్రలు పోషించారు. మేష్‌ కురుటూరి, వెంకీ పుష్పదపు, జ్ఞానశేఖర్‌ వి.ఎస్‌ సంయుక్తంగా నిర్మించారు. ఇప్పటికే విడుదలైన టీజర్, ట్రైలర్ సినిమాపై హైప్ పెంచేశాయి.
By December 09, 2021 at 09:49AM
No comments