నాన్ వెజ్ మేక..చికెన్ బిర్యానీ లేకపోతే ముద్ద ముట్టుకోదు!
సాధారణంగా మేకలు శాకాహార జంతువులు. చెట్ల ఆకులు, అలమలు, చిరు ధాన్యాలు తిని బతుకుతాయి. అయితే, ఓ మేకకు మాత్రం చికిన్ బిర్యానీ లేనిదే ముద్ద దిగదు. మధ్యప్రదేశ్‌లోని దేవాస్‌ పట్టణ సమీపాన లోహారి గ్రామ రైతు రఫీఖ్‌ పెంచుతున్న మేక ‘భూరి’కి మాత్రం రోజూ చికెన్ బిరియానీ ఉండాల్సిందే. ఆకులు, కొమ్మల వైపు కనీసం కన్నెత్తి కూడా చూడదు. ఈ విషయం తెలిసి చుట్టుపక్కల ప్రాంతాల నుంచి జనం వస్తూ ఓ వింతలా ఈ మేకను చూసి పోతున్నారు. రైతు రఫీఖ్‌ పశు సంతతిలో ఆవులు, గేదెలు, మేకలు పెంచుతున్నారు. వీటిలో ‘భూరి’ ప్రత్యేకం. మాంసాహారమంటే తెగ ఇష్టపడే ఈ మేక.. చికెన్, మటన్, చేప, గుడ్లు ఏదైనా లటుక్కున తినేస్తుంది. చిన్నప్పటి నుంచి ఈ మేకను పెంచుకుంటున్నానని రఫీక్ చెప్పారు. ‘ఈ మేక నా పొలంలోనే పుట్టింది.. దీనికి భూరి అని పేరు పెట్టాను... గత మూడేళ్లుగా మాంసాహారం తింటోంది.. భూరికి రోజూ కావాలి... దీనితో పాటు చేపలు, మటన్, బిర్యానీ, గుడ్డు వంటివి కూడా తింటుంది’ అని తెలిపాడు. కాగా, కొద్ది నెలల కిందట ఓ మేక చేపలు తింటున్న వీడియో సోషల్ మీడియాలో వైరల్ అయిన విషయం తెలిసిందే. చేపల్ని కురుకురేల్లా నమిలేస్తున్న మేక వీడియోను ఎవరో సోషల్ మీడియాలో పెట్టడంతో వైరల్ అయ్యింది. అయితే, జన్యుపరమైన లక్షణాల వల్లే ఇలా కొన్నిసార్లు జరుగుతుందని పశు వైద్యులు పేర్కొంటున్నారు.
By December 31, 2021 at 09:09AM
No comments