ఇంటి నుంచే పని.. ఇళ్లలోనూ మాస్క్‌లు పెట్టుకోవాల్సిందే..! దేశాల్లో కోవిడ్ ఆంక్షలు షురూ
ఒమిక్రాన్ వేరియంట్ పెరుగుతుండడంతో ప్రపంచ దేశాలన్నీ అప్రమత్తం అయ్యాయి. ఈ వేరియంట్ ఇప్పటికే 89 దేశాలకు పాకింది. బ్రిటన్‌లో రోజూ వేల సంఖ్యలో కేసులు నమోదవ్వడమే కాకుండా మరణాలు కూడా సంభవిస్తున్నాయి. అమెరికాలో కూడా ఈ కేసులు పెద్ద సంఖ్యలో నమోదవుతున్నాయి. ఇటు భారత్‌లోనూ రోజురోజుకు ఈ కేసుల సంఖ్య పెరుగుతూనే ఉంది. దీంతో దేశాలన్నీ కొత్త వేరియంట్‌ను సమర్థంగా ఎదుర్కొనేందుకు చర్యలు తీసుకుంటున్నాయి. ఇప్పటికే కొన్ని దేశాలు లాక్‌డౌన్‌ను ప్రకటించగా.. మరికొన్ని ఒమిక్రాన్ వేరియంట్ వ్యాప్తిని కట్టడి చేసేందుకు ఆంక్షలు విధిస్తున్నాయి. ఈ క్రమంలోనే ఇంటి నుంచే పని చేయడం, ఇళ్లలోనూ మాస్క్‌లు పెట్టుకోవడం వంటివి తప్పనిసరి చేశాయి. నెదర్లాండ్‌లో ఇప్పటికే లాక్‌డౌన్ మొదలైంది. అన్ని షాపులు, రెస్టారెంట్లు, బార్లు, మ్యూజియంలు, థియేటర్లు కచ్చితంగా జనవరి 14 వరకూ, స్కూళ్లు జనవరి 9 వరకూ క్లోజ్ చేయాలని ఆదేశాలు జారీ చేసింది. ఎవరింటికైనా కేవలం ఇద్దరు అతిథులకు మాత్రమే అనుమతి ఇచ్చింది. క్రిస్టమస్, న్యూ ఇయర్‌కు మాత్రం కొంచెం సడలించింది. ఆ పండుగ రోజుల్లో ఇంటికి నలుగురు అతిథుల వరకూ రావొచ్చనే పర్మిషన్ ఇచ్చింది. అటు అగ్రరాజ్యం అమెరికాలోనూ కోవిడ్ ఆంక్షలు మొదలయ్యాయి. ఇళ్లలోనూ మాస్క్‌లు ధరించడం తప్పనిసరి చేస్తూ కాలిఫోర్నియా గవర్నర్ కార్యాలయం అధికారులు ఆదేశాలు జారీ చేశారు. ఈ నిబంధన వచ్చే నెల 15 వరకూ అమల్లో ఉండనుంది. ఫ్రాన్స్‌లో క్రిస్‌మస్‌ కంటే ముందే అందరూ వ్యాక్సిన్ వేయించుకోవాలని అక్కడి ప్రభుత్వం పౌరులను ఆదేశించింది. జర్మనీలో టీకా వేయించుకోని వారిపై కఠిన ఆంక్షలు అమలు చేస్తున్నారు. షాపులకు, బేకరీలకు, మెడికల్ షాపులకు తప్ప వేరే ప్రదేశాలకు వెళ్లడంపై నిషేధం విధించారు. నార్వేలో ప్రజలు ఇంటి నుంచి పనిచేయడాన్ని తప్పనిసరి చేసింది. బార్లు, రెస్టారెంట్లలో మద్యం సరఫరా నిలిపివేసింది. బహిరంగ ప్రదేశాల్లో మాస్క్‌లు ధరించాలని పౌరులను ఆదేశించింది. ఇక యూకేలోనూ వర్క్ ఫ్రమ్ హోమ్, వ్యాక్సిన్ పాస్‌లు ఉపయోగించడం వంటి నిబంధనలు అమల్లోకి వచ్చాయి. ఒమిక్రాన్ కేసులు పెరగడంతో మరిన్ని కఠిన ఆంక్షలు విధించేందుకు అక్కడి ప్రభుత్వం యోచిస్తోంది.
By December 21, 2021 at 12:11PM
No comments