Breaking News

‌ఫిలిప్పీన్స్‌ను వణికించిన ‘రాయ్’ తుపాన్‌.. 75 మంది మృతి, లక్షల్లో నిరాశ్రయులు


ఆగ్నేయ ఆసియా దేశమైన ఫిలిప్ఫిన్స్‌ను సైక్లోన్ ‘రాయ్’ వణికించింది. తుఫాన్ ప్రభావంతో 3 లక్షల మందిని సురక్షిత ప్రాంతాలకు తరలించగా.. 75 మంది ప్రాణాలు కోల్పోయారు. సైక్లోన్ తీవ్రతతో గంటకు 195 కిలోమీటర్ల వేగంతో గాలులు వీయడంతో.. విద్యుత్ స్తంభాలు నేల కూలాయి. ఇళ్ల పై కప్పులు కొట్టుకుపోయాయి. దేశంలోని పలు ప్రాంతాల్లో విద్యుత్ సరఫరా స్తంభించింది. ప్రముఖ పర్యాటక ప్రాంతమైన బోహోల్‌ దీవిపై రాయ్ తుఫాన్ ప్రభావం తీవ్రంగా ఉంది. ఇక్కడ తుఫాన్ కారణంగా 49 మంది చనిపోయారని గవర్నర్ ఆర్థర్ యప్ వెల్లడించారు. బోహోల్ ద్వీపంలో మరో పది మంది జాడ తెలియడం లేదని గవర్నర్ తెలిపారు. తుఫాన్ ప్రభావంతో 13 మంది గాయపడ్డారన్నారు. బోహోల్ ప్రావిన్స్‌లో మరణాల సంఖ్య మరింత పెరిగే అవకాశం ఉందని యప్ ఆందోళన వ్యక్తం చేస్తున్నారు. తుఫాన్ ప్రభావిత ప్రాంతాల్లో సహాయక చర్యలు చేపట్టడం కోసం మిలటరీ, పోలీసు, కోస్టుగార్డ్, అగ్నిమాపక సిబ్బందిని రంగంలోకి దించారు. ఫిలిప్ఫిన్స్ నేవీ నౌకలో బోహోల్‌కు నిత్యావసరాలు, పునరావాస సామాగ్రిని తరలిస్తున్నట్లు ఆ ప్రావిన్స్ గవర్నర్ యప్ తెలిపారు. రాయ్ తుఫాన్‌ను రాష్ట్ర విపత్తుగా ప్రకటించారు. బోహోల్‌తో పాటు సియార్గావ్, డినాగట్, మిన్డనవ్ దీవుల్లో తుఫాన్ విధ్వంసం సృష్టించింది. క్రిస్మస్ సెలవుల కోసం వచ్చిన చాలా మంది పర్యాటకులు తుఫాన్ దెబ్బకు ఇబ్బందులు పడుతున్నారు. దక్షిణ, కేంద్ర ఫిలిప్పీన్స్‌లోని ప్రావిన్స్‌లను అతలాకుతలం చేసిన రాయ్తుఫాన్ శుక్రవారం రాత్రి తీరం దాటి దక్షిణ చైనా సముద్రం వైపు కదిలిందని అధికారులు వెల్లడించారు. డినాగట్‌లో తుఫాన్ ప్రభావం ఎక్కువగానే ఉన్నప్పటికీ 2013 నాటి సూపర్ టైఫూన్ హైయన్‌తో పోలిస్తే నష్టం తక్కువేనని డినాగట్ గవర్నరర్ అర్లేనే బగావో తెలిపారు. 2013లో హైయన్ టైఫూన్ ఫిలిప్ఫిన్స్‌ను వణికించింది. ఈ తుఫాన్ కారణంగా 7300 మంది ప్రజలు మరణించారు లేదా కనిపించకుండా పోయారు. 7460 దీవుల సముదాయమైన ఫిలిప్ఫిన్స్‌లో ప్రకృతి విపత్తుల ప్రభావం ఎక్కువగా ఉంటుంది. ఏటా సగటున 20 తుఫాన్లు ఫిలిప్ఫిన్స్‌ను తాకుతాయి. వీటి ప్రభావంతో భారీ మొత్తంలో పంట నష్టం వాటిల్లడంతోపాటు ఇళ్లు, మౌలికవసతులు దెబ్బతింటున్నాయి.


By December 19, 2021 at 10:26AM


Read More https://telugu.samayam.com/latest-news/international-news/75-killed-as-super-typhoon-hits-philippines-more-than-300000-people-fled-their-homes/articleshow/88368542.cms

No comments