సూర్యుడి కన్నా వేడి.. పరిమాణంలోనూ పెద్ద.. అరుదైన నక్షత్రాలను కనుగొన్న భారతీయ శాస్త్రవేత్తలు

పాలపుంతలో ‘మెయిన్‌ సీక్వెన్స్‌ రేడియో పల్స్‌’ (MRPs) ఎమిటర్స్‌ అనే అరుదైన తరగతికి చెందిన ఎనిమిది నక్షత్రాలను భారత శాస్త్రవేత్తలు కనుగొన్నారు. పుణే సమీపంలోని జయింట్‌ మీటర్‌వేవ్‌ రేడియో టెలిస్కోపు ( )ను ఉపయోగించి వీటిని కనుగొన్నారు. ఈ నక్షత్రాలు సూర్యుడి కన్నా చాలా వేడిగా, పరిమాణంలోనూ పెద్దగా ఉంటాయని తెలిపారు. అసాధారణ స్థాయిలో బలమైన అయస్కాంత క్షేత్రాలు, తీవ్రస్థాయి జ్వాలలు వీటి నుంచి వెలువడుతున్నట్టు వివరించారు. లైట్‌హౌస్‌ తరహాలో ఇవి ప్రకాశవంతమైన రేడియో ప్రకంపనలను నలుమూలలకు వెదజల్లుతున్నాయని పేర్కొన్నారు. పుణెలోని నేషనల్‌ సెంటర్‌ ఫర్‌ రేడియో ఆస్ట్రో ఫిజిక్స్‌ (ఎన్‌సీఆర్‌ఏ‌)కు చెందిన శాస్త్రవేత్తలు పూనమ్ చంద్ర, బర్నాలీ దాస్‌లు వీటిని కనుగొన్నారు. ఇటువంటి మూడు నక్షత్రాలను గతంలో వీరు గుర్తించారు. దీంతో ఇప్పటివరకూ వెలుగు చూసిన 15 ఎంఆర్‌పీల్లో 11 నక్షత్రాలు జీఎంఆర్‌టీతోనే గుర్తించినట్లయింది. ‘కనుగొన్న ఎనిమిది MRPలలో ఈ నక్షత్రాల ద్వారా ఒక భ్రమణానికి పట్టే సమయం రోజులో సగం నుంచి నాలుగు రోజుల మధ్య ఉంటుంది’ అని బర్నాలీ దాస్ అన్నారు. ఈ అధ్యయన ఫలితాలను ఆస్ట్రోఫిజికల్ జర్నల్‌లో ప్రచురించారు. అయితే, MRPలను గుర్తించడం ఒక సవాల్‌తో కూడుకున్న పని. అవి విడుదల చేసే రేడియో ప్రకంపనలు రోజు, సంవత్సరంలోని ఎంపిక చేసిన సమయాల్లో మాత్రమే కనిపిస్తాయి. తక్కువ రేడియో ఫ్రీక్వెన్సీలలోనే వీటిని గుర్తించడం సులభం. ప్రస్తుతం ప్రపంచంలోని మరే ఇతర రేడియో టెలిస్కోప్‌లకు లేని ప్రత్యేక లక్షణం uGMRT సొంతం. ఆప్టికల్ ఫ్రీక్వెన్సీలో ధ్రువీకరించిన వాస్తవ స్థితి ఆధారంగా శాస్త్రవేత్తలు 400 Mhz-850 MHz బ్యాండ్‌విడ్త్‌లో 2019 మధ్యకాలం నుంచి నిర్దిష్ట రోజులలో పరిశీలనలు నిర్వహిస్తున్నారు. అమెరికాలోని కార్ల్ జి జాన్స్కీ వెరీ లార్జ్ అర్రే (VLA) ప్రాంతాన్ని కూడా పరిశీలనకు ఉపయోగించారు. భూమికి 150 కాంతి సంవత్సరాల దూరంలో ఉన్న పాలపుంతలో ఈ నక్షత్రాలు కనుగొన్నారు. ఈ నక్షత్రాల అయస్కాంత గోళాల చుట్టూ నిర్దిష్ట ప్రదేశాలలో సంభవించే చిన్న పేలుళ్లుగా గతంలో పేర్కొన్న సిద్ధాంతాన్ని ఇప్పుడు పరిశీలనాత్మకంగా నిరూపించారు. MRPల నుంచి వెలువడే రేడియో ఉద్గారాల ఎలక్ట్రాన్ సైక్లోట్రాన్ కొలతలను తెలియజేస్తాయని దాస్, పూనమ్‌లు పేర్కొన్నారు. అటువంటి నక్షత్రాల చుట్టూ వాయు పదార్థాలను రవాణా చేయడంలో ఈ పేలుళ్లకు కొంత పాత్ర ఉంటుందని చెప్పారు. ‘2000లో అలాంటి ఒక నక్షత్రం కనుగొన్నారు.. ఇప్పటి వరకూ గుర్తించిన 15 MRPలలో 11 GMRT ఉపయోగించి కనుగొన్నవే... ఒకప్పుడు అరుదైనవిగా పరిగణించే అలాంటి నక్షత్రాలు ఇంకా చాలా ఉన్నాయని చెప్పగలం’ అని ప్రొఫెసర్ చంద్ర అన్నారు.

By November 20, 2021 at 11:25AM

Read More https://telugu.samayam.com/latest-news/science-technology/indian-scientists-discover-and-confirm-radio-emissions-from-eight-stars-larger-than-sun/articleshow/87813144.cms