బంక్‌లోకి పెట్రోల్ కోసం వచ్చారు.. క్రాకర్ విసిరేసి పోయారు.. షాకింగ్ వీడియో!
కొంతమంది ఆకతాయిల చేష్టలకు హద్దుపద్దు ఉండదు. ఎదుటివారికి ఏమన్నా కానీ.. తాము అనుకున్నది చేసేయాలని ఫిక్స్ అవుతారు. ఎదుటి వారిని బాధపెట్టి శునకానందాన్ని ఆస్వాదిస్తుంటారు. ఇలాంటి ఆకతాయి చేష్టల వల్ల ఎంతటి ప్రమాదం జరుగుతుందనే విషయాన్ని కూడా ఆలోచించరు. ఈ వీడియోలు స్కూటర్ మీద పెట్రోల్ బంక్‌కు వచ్చిన ఇద్దరూ అలాంటి తోకలేని కోతులే. రద్దీగా ఉన్న పెట్రోల్ బంక్ అది.. అక్కడ పనిచేసే సిబ్బందితో పాటు వినియోగదారులు కూడా ఉన్నారు. ఇలాంటి చోట అగ్నిప్రమాదం జరిగితే ఎంత మంది ప్రాణాలకు ముప్పో ఆలోచించకుండా టపాకాయని ముట్టించి అక్కడ పడేసి వెళ్లిపోయారు ఈ మూర్ఖులు. దేవుడి దయ వల్ల పెనుముప్పే తప్పింది. ఈ ఘటన గుజరాత్‌లోని సూరత్‌లో సోమవారం చోటుచేసుకోగా.. సీసీటీవీ ఫుటేజ్ ఆధారంగా నిందితులను గుర్తించిన పోలీసులు బుధవారం వారిని అరెస్టు చేశారు. సోమవారం ఇద్దరు యువకులు స్కూటర్‌పై పెట్రోల్ బంకుకు వెళ్లారు. స్కూటర్‌పై వెనక కూర్చున్న యువకుడు అలాగే ఉండగా.. నడుపుతున్న యువకుడు బండి దిగి పెట్రోల్ కొట్టించాడు. తరవాత స్కూటర్ స్టార్ట్ చేసి ముందుకుపోనిచ్చాడు. ఈ సమయంలో వెనక కూర్చున్న యువకుడు సీమ టపాకాయని వెలిగించి పెట్రోల్ కొట్టే మిషన్ పక్కకు విసిరేశాడు. అది గమనించి సిబ్బంది ఒకరు కాలితో సీమ టపాయని తోసే ప్రయత్నం చేశాడు. అప్పటికే అది పేలింది. కానీ, అదృష్టవశాత్తు ఎలాంటి ప్రమాదం జరగలేదు. అయితే, ఈ ఆకతాయిల చేష్టలు బంకులో ఉన్న సీసీటీవీ కెమెరాల్లో రికార్డయ్యాయి. వీటి ఆధారంగా బంకు సిబ్బంది పోలీసులకు ఫిర్యాదు చేశారు. విచారణ చేపట్టిన పోలీసులు స్కూటర్ నంబర్ ఆధారంగా నిందితులను గుర్తించారు. ఈ ఘటనలో ఇద్దరిని అరెస్ట్ చేశామని.. వారిలో ఒకరు మైనర్ అని సూరత్‌లోని ఉమ్రా పోలీస్ స్టేషన్ ఇన్‌స్పెక్టర్ డీకే పాటిల్ వెల్లడించారు. స్కూటర్‌పై వెనుక కూర్చొని క్రాకర్ విసిరిన వ్యక్తి మహిధర్‌పురాకు చెందిన మహమ్మద్ ఇర్ఫాన్ ఖురేషి అని.. అతడి వయసు 18 సంవత్సరాలు అని పాటిల్ తెలిపారు. సోమవారం ఈ ఘటన జరగగా.. పెట్రోల్ బంక్ మేనేజర్ మంగళవారం పోలీస్ స్టేషన్‌లో ఫిర్యాదు చేశారన్నారు. ఐపీసీ సెక్షన్లు 285, 286, 336 కింద నిందితులపై కేసులు నమోదు చేసినట్టు ఇన్‌స్పెక్టర్ పాటిల్ చెప్పారు.
By November 04, 2021 at 12:08PM
No comments