పాక్ నుంచి చైనాకు ప్రమాదకర పదార్థాలు.. ముంద్రా పోర్టులో పట్టుబడిన నౌక!
విదేశాల నుంచి వచ్చిన పలు కంటెయినర్ నౌకలను డైరెక్టరేట్ ఆఫ్ రెవెన్యూ ఇంటెలిజెన్స్ () అధికారులు ముంద్రా పోర్టులో స్వాధీనం చేసుకున్నట్టు అదానీ పోర్ట్స్ అండ్ స్పెషనల్ ఎకనమిక్ జోన్ (APSEZ) శుక్రవారం ఓ ప్రకటనలో తెలిపింది. ఈ కార్గో నౌకల్లో ప్రమాదకర సరుకులను తరలిస్తున్నారని తెలిపింది. స్వాధీనం చేసుకున్న ప్రమాదకర కార్గో కంటెయినర్లు పాకిస్థాన్‌లోని కరాచీ రేపు నుంచి చైనాలోని షాంఘైకి వెళ్తున్నాయని పేర్కొంది. ఇవి ముంద్రా పోర్ట్‌కు రావడం లేదని వివరించింది. కార్గో నౌక ప్రమాదకరం కానిదిగా మార్కింగ్ చేయనప్పటికీ స్వాధీనం చేసుకున్న కంటెయినర్లలో ప్రమాదకర తరగతికి చెందిన గుర్తులున్నాయని, ఇవి రేడియోధార్మిక పదార్థాలను సూచిస్తాయని తెలిపింది. ‘నవంబరు 18 డీఆర్, కస్టమ్స్ విభాగం సంయుక్తంగా చేపట్టిన తనిఖీల్లో విదేశాల నుంచి వచ్చిన పలు కార్గో నౌకల్లో ప్రమాదకర పదార్థాలను గుర్తించారు.. అయితే ఈ నౌకలు ముంద్రా లేదా భారత్‌లోని ఇతర పోర్టులకు నిర్దేశించినవి కావు.. కానీ, పాక్‌లోని కరాచీ నుంచి చైనాలో షాంఘైకు ఈ మార్గంలో వెళ్తున్నాయి.. తదుపరి పరిశీలన కోసం నౌకలోని సరుకులను ముంద్రా పోర్టులో దింపించారు’ అని తెలియజేసింది. ఈ ఆపరేషన్‌కు వీలైనంత మేర సహాకారం అందజేస్తామని, డీఆర్ఐ, కస్టమ్స్ అధికారులు వేగంగా స్పందించి చర్యలు తీసుకున్నందుకు ధన్యవాదాలు తెలుపుతున్నామని చెప్పింది. ‘‘అధికారుల అప్రమత్తతకు మేము సెల్యూట్ చేస్తున్నాం.. దేశాన్ని సురక్షితంగా ఉంచే ఏ చర్యకైనా పూర్తి సహాయాన్ని కొనసాగిస్తాం.. అదానీ గ్రూప్ జాతీయ భద్రతను చాలా సీరియస్‌గా తీసుకుంటుంది. ఈ విషయంలో ఏ విధంగానూ రాజీకి అనుమతించదు’’ అని పేర్కొంది. కాగా, రెండు నెలల కిందట అఫ్గన్ నుంచి మూడు కంటెయినర్లలో వచ్చిన రూ.20,000 కోట్లు విలువైన డ్రగ్స్‌ను డైరెక్టరేట్ ఆఫ్ రెవెన్యూ ఇంటెలిజెన్స్ (డీఆర్ఐ) అధికారులు స్వాధీనం చేసుకున్న విషయం తెలిసిందే. కాందహార్‌ కేంద్రంగా పనిచేసే హసన్‌ హుస్సేన్‌ లిమిటెడ్‌ సంస్థ నుంచి టాల్కమ్‌ పౌడర్‌ రూపంలో వచ్చిన ఈ సరుకు విజయవాడ కేంద్రంగా పనిచేసే ఆషీ ట్రేడింగ్‌ సంస్థ పేరుతో రావడం దేశవ్యాప్తంగా చర్చనీయాంశమయ్యింది.
By November 20, 2021 at 09:59AM
No comments