మొగుడు చేతిలో దెబ్బలు తినడం తప్పేం కాదు.. తెలుగు రాష్ట్రాల్లో 84% భార్యల అభిప్రాయం ఇదే!

కొన్ని పరిస్థితుల్లో భర్త చేతుల్లో దెబ్బలు తినడం తప్పేమీ కాదని దేశవ్యాప్తంగా 14 రాష్ట్రాల్లో 30 శాతానికి పైగా మహిళలు అభిప్రాయపడ్డారు. ఇక తెలుగు రాష్ట్రాల్లో అయితే ఏకంగా 84% మంది భర్త కొట్టడాన్ని సమర్ధించడం గమనార్హం. జాతీయ కుటుంబ ఆరోగ్య సర్వే (NHFS)-5 ఈ మేరకు వివరాలను వెల్లడించింది. ఈ అంశంపై దేశవ్యాప్తంగా 18 రాష్ట్రాల్లో సర్వే నిర్వహించగా ఆసక్తికర ఫలితాలు వచ్చాయి. సర్వేలో భాగంగా.. ‘‘భార్యను భర్త కొట్టడాన్ని మీరు సమర్ధిస్తారా.. మీ అభిప్రాయంలో సబబేనా?’’ అనే ప్రశ్నను మహిళల ముందుంచారు. వివాహేతర సంబంధం ఉందని అనుమానించడం, అత్తింటివారిని ఆమె గౌరవించకపోవడం, భర్తతో వాదనలకు దిగడం, మొగుడితో శృంగారానికి నిరాకరించడం, ఆయనకు చెప్పకుండా బయటకు వెళ్లడం, ఇంటిని/పిల్లలను నిర్లక్ష్యం చేయడం, మంచి ఆహారాన్ని వండకపోవడం వంటి పరిస్థితులు తలెత్తినట్లు ఊహించుకుని సమాధానాలు చెప్పాలని వారికి సూచించారు. సర్వేలో పాల్గొన్న మూడు రాష్ట్రాల్లో 75% పైగా మహిళలు.. భార్యను భర్త కొట్టడం సబబేనని అభిప్రాయపడ్డారు. ఆంధ్రప్రదేశ్‌, తెలంగాణల్లో ఇటువంటి వారు 84%గా (సర్వేలో పాల్గొన్నవారిలో) ఉండగా.. కర్ణాటకలో 77%గా నమోదైంది. మణిపుర్‌ (66%), కేరళ (52%), జమ్మూ కశ్మీర్‌ (49%), మహారాష్ట్ర (44%), పశ్చిమ బెంగాల్‌ (42%)ల్లో భర్త చేతుల్లో దెబ్బలు తినడాన్ని సమర్థించే మహిళల సంఖ్య ఎక్కువగానే ఉంది. ఇంటిని, పిల్లల్ని నిర్లక్ష్యం చేసినప్పుడు, అత్తింటివారిని గౌరవించనప్పుడు భర్త కొట్టడం సమంజసమేనని అత్యధిక మంది మహిళలు అభిప్రాయపడ్డారు. అత్తింటివారిని గౌరవించకపోవడాన్ని ప్రధాన కారణంగా తెలంగాణ, కేరళ, కర్ణాటక, మహారాష్ట్ర, పశ్చిమ్ బెంగాల్ సహా 13 రాష్ట్రాల మహిళలు పేర్కొన్నారు. అత్యల్పంగా హిమాచల్‌ ప్రదేశ్‌లో 14.8% మహిళలు మొగుడు కొట్టడాన్ని సమర్థించారు. భార్యను భర్త కొట్టడాన్ని.. మహిళలతో పోలిస్తే తక్కువ మంది పురుషులు సమర్థించడం కొసమెరుపు. హిమాచల్ ప్రదేశ్‌లో 14.2% మందితో పోలిస్తే కర్ణాటకకు చెందిన 81.09% కంటే ఎక్కువ మంది పురుషులు తమ భార్యలను కొట్టడాన్ని సమర్థించారు. ‘‘మహిళలపై హింసను సమర్థించడానికి ఉదహరించిన కారణాలన్నీ ఈ నిబంధనల ఫలితం.. ఆమె ఇంటిని లేదా పిల్లలను నిర్లక్ష్యం చేస్తే, భర్తతో శృంగారంలో పాల్గొనడానికి నిరాకరిస్తే, ఆమె ఆహారం సరిగ్గా వండకపోతే ఇవన్నీ సమాజంలో స్త్రీలు ఎలా ప్రవర్తించాలో వివరిస్తాయి’’ అని ఆక్స్‌ఫామ్ ఇండియా లింగ సమానత్వం విభాగం నిపుణుడు అమిత్ పిత్రే అన్నారు.

By November 29, 2021 at 07:11AM

Read More https://telugu.samayam.com/latest-news/india-news/nhfs-survey-shows-30-women-across-14-states-ap-and-telangana-84-justify-men-beating-their-wives/articleshow/87970745.cms