Mumbai నడి సంద్రంలోని నౌకలో రేవ్ పార్టీ.. ఎన్సీబీ దాడుల్లో పట్టుబడ్డ బాలీవుడ్ సూపర్స్టార్ కొడుకు!
ముంబయి శివారులో జరిగిన ఓ రేవ్ పార్టీపై నార్కోటిక్స్ కంట్రోల్ బ్యూరో అధికారులు ఆకస్మిక దాడులు నిర్వహించారు. ముంబయి తీరంలోని క్రూయిజ్ షిప్‌లో ఏర్పాటు చేసిన రేవ్ పార్టీలో మాదకద్రవ్యాలు వినియోగిస్తున్నారంటూ సమాచారం రావడంతో శనివారం అర్ధరాత్రి తనిఖీలు చేపట్టారు. పార్టీలో డ్రగ్స్ వినియోగిస్తున్నట్లు గుర్తించిన ఎన్సీబీ అధికారులు అధిక మొత్తంలో కొకైన్‌, ఎండీని స్వాధీనం చేసుకున్నారు. ఎనిమిది మంది యువతీయువకులను అదుపులోకి తీసుకున్నారు. వీరిలో ఒకరు బాలీవుడ్‌కు చెందిన ఓ సూపర్స్టార్ తనయుడు కూడా ఉన్నట్లు తెలుస్తోంది. ఆదివారం ఉదయం వారిని ముంబయికి తీసుకురానున్నారు. తాజా ఘటనతో బాలీవుడ్‌లో మరోసారి డ్రగ్స్ వాడకం చర్చనీయాంశంగా మారింది. ఈ విలాసవంతమైన నౌక ముంబయి తీరం నుంచి బయలుదేరి తర్వాత రేవ్ పార్టీ మొదలైనట్టు విశ్వసనీయ వర్గాలు తెలిపాయి. ఈ ఘటనలో ఇప్పటి వరకూ ఎటువంటి అరెస్ట్‌లు జరగలేదని జోనల్ డైరెక్టర్ సమీర్ వంఖేడ్ మీడియాకు తెలిపారు. ‘పలువుర్ని అదుపులోకి తీసుకున్నాం.. దర్యాప్తు కొనసాగుతోంది.. డ్రగ్స్ స్వాధీనం చేసుకున్నాం.. ఎనిమిది నుంచి పది మందిని విచారించనున్నాం.. దీనిపై ఇంతకంటే ఇప్పుడేం మాట్లాడలేం’ అన్నారు. ముంబై నుంచి రెండు రోజుల సముద్రయానానికి బయలుదేరాల్సిన లగ్జరీ క్రూయిజ్ షిప్‌లో శనివారం సాయంత్రం నార్కోటిక్స్ కంట్రోల్ బ్యూరో (ఎన్సీబీ) మాదకద్రవ్యాలను స్వాధీనం చేసుకుంది. బాలీవుడ్ మెగాస్టార్ కుమారుడితో సహా 10 మందిని అదుపులోకి తీసుకుని, ఎన్‌డీపీఎస్ చట్టం కింద కేసు బుక్ చేసినట్టు మీడియాలో కథనాలు వస్తున్నాయి. అదుపులోకి తీసుకున్నవారి రక్త నమూనాలను సేకరించి, పరీక్షలకు పంపనున్నారు. వారి వాంగ్మూలం కూడా నమోదుచేయనున్నారు. ఆదివారం హాలీడే కోర్టు ముందు వీరిని హాజరుపరచనున్నట్టు సమాచారం. బాలీవుడ్‌లో డ్రగ్స్ వ్యవహారంపై గతేడాది నుంచి ఎన్సీబీ చాలా చురుకుగా వ్యవహరిస్తోంది. బాలీవుడ్ నటుడు సుశాంత్ సింగ్ రాజ్‌పుత్ అనుమానాస్పద మరణం కేసులో దర్యాప్తు చేస్తుండగా డ్రగ్స్ వ్యవహారం బయటకు వచ్చిన విషయం తెలిసిందే. దీంతో నటి రియా చక్రవర్తి సహా 33 మందిపై ఛార్జ్‌షీట్ దాఖలు చేవారు.
By October 03, 2021 at 10:11AM
No comments