యూపీ: మంది గర్ల్ ఫ్రెండ్స్.. వారికోసం దొంగగా మారి.. ఖరీదైన నగలు, కార్లు చోరీ!
ఇది వరకే పెళ్లయి.. ఒకరు ఇద్దరు కాదు ఏకంగా పది మంది ప్రియురాళ్లు.. వారి కోరికలను తీర్చడానికి అడ్డుదారుల తొక్కి దొంగగా మారాడు. ఖరీదైన కార్లు, వజ్రాభరణాలు దొంగలించి ప్రియురాళ్లను సంతోషపెట్టడం అతడి హాబీ. గర్ల్ఫ్రెండ్స్ అడిగినవి ఇచ్చేందుకు దొంగతనాలకు పాల్పడిన ఓ వ్యక్తిని ఉత్తర్ప్రదేశ్‌లోని ఘాజియాబాద్ పోలీసులు అరెస్ట్ చేశారు. నిందితుడిని ఇర్ఫాన్ అలియాస్ ఉజాలాగా పోలీసులు గుర్తించారు. అతడి నుంచి రూ. కోటి విలువ చేసే జాగ్వార్ కారును స్వాధీనం చేసుకున్నారు. విచారణలో ఇర్ఫాన్ వెల్లడించిన విషయాలు విని పోలీసులే విస్తుపోయారు. ఇప్పటికే పెళ్లైన అతడికి పది మంది గర్ల్ఫ్రెండ్స్ ఉన్నారని తెలిసి షాక్ తిన్నారు. నిందితుడు చేసినవి సాదాసీదా దొంగతనాలు కాదు. దొంగిలించిన వస్తువుల విలువ కోట్లలో ఉందని పోలీసులు గుర్తించారు. అతడి వద్ద జాగ్వార్ కారుతో పాటు మరో వాహనం, వజ్రాభరణాలు, రత్నాలనూ స్వాధీనం చేసుకున్నారు. గోవా గవర్నర్, న్యాయమూర్తి నివాసాలకు పక్కన ఉండే ఇళ్లలోనూ చోరీకి పాల్పడటం గమనార్హం. దొంగతనాలు చేసేందుకు ఒక్కడే వెళ్లేవాడని పోలీసులు తెలిపారు. దొంగిలించిన సొత్తును విలాసవంతమైన కార్లలో తీసుకెళ్లేవాడని, ఆభరణాలు, వాహనాలపై ఇర్ఫాన్‌కు అపారజ్ఞానం ఉందని పోలీసులు పేర్కొన్నారు. నకిలీ ఆభరణాలను ఇట్టే గుర్తుపట్టేవాడని, వాటిని అస్సలు ముట్టుకునేవాడు కాదని వివరించారు. దొంగిలించిన ఖరీదైన కార్లను పార్టు, పార్టులుగా విడగొట్టి విక్రయించేవాడని తెలిపారు. గోవా, తమిళనాడు, ఢిల్లీ, ఉత్తర్ప్రదేశ్, పంజాబ్, హరియాణా, తెలంగాణ, మహారాష్ట్ర, గుజరాత్ రాష్ట్రాల్లో దొంగతనాలు చేసినట్లు ఇర్ఫాన్ అంగీకరించారు. మొత్తం 25 కేసులతో ఇతడికి సంబంధం ఉందని, అన్ని రాష్ట్రాల పోలీసులను అప్రమత్తం చేశాంమని ఘజియాబాద్ పోలీసులు వివరించారు. ఈ కేసులో ఇర్ఫాన్ భార్య, ఓ గర్ల్ఫ్రెండ్ను సైతం అరెస్టు చేశారు. దొంగతనాల్లో అతడికి సహకరిస్తున్నారనే ఆరోపణలతో అదుపులోకి తీసుకున్నట్టు పేర్కొన్నారు. సెప్టెంబరు 3న స్థానిక వ్యాపారవేత్త కపిల్ గార్గ్ నివాసంలో కోటిన్నర విలువచేసే సొత్తును దోచుకెళ్లాడు. ఈ సొమ్ముతో ఏడు గ్రామాల్లో రోడ్లు వేయించిన ఇర్ఫాన్.. తన భార్య గుల్షన్ పర్వీన్‌ను బిహార్‌లోని సీతామర్హి జిల్లా పంచాయతీ ఎన్నికల్లో పోటీచేయించాడు. తాను వ్యాపారం చేస్తున్నట్టు గ్రామస్థులను నమ్మించాడు. అతడికి అలీగఢ్, ఆగ్రా, ముంబై, సవాయ్ మాధోపూర్‌ ప్రాంతాల్లో ప్రియురాళ్లు ఉన్నట్టు గుర్తించారు.
By October 26, 2021 at 01:43PM
No comments