Gujarat Port పట్టుబడ్డ హెరాయిన్ విలువ రూ.19వేల కోట్లపై మాటే.. దర్యాప్తులో సంచలన విషయాలు!
గుజరాత్‌లోని ముంద్రా పోర్టులో పట్టుబడిన హెరాయిన్ విలువ రూ.19 వేల కోట్ల విలువ ఉంటుందని భావిస్తున్నారు. అఫ్గనిస్థాన్ నుంచి వచ్చిన మూడు టన్నుల హెరాయిన్ వెనుక పాత్రధారి తూర్పు గోదావరి జిల్లా ద్వారపూడికి చెందిన మాచవరం సుధాకర్‌ అయితే.. సూత్రధారి మాత్రం డ్రగ్స్ మాఫియాలో కింగ్‌పిన్‌ అయిన ఢిల్లీకి చెందిన వ్యక్తేనని నిఘా వర్గాలు అనుమానిస్తున్నాయి. అఫ్గనిస్థాన్ నుంచి ఇరాన్‌ మీదుగా విజయవాడ చిరునామాతో ఉన్న ఆషీ ట్రేడింగ్‌ కంపెనీకి వస్తున్న ఈ హెరాయిన్‌ను ఢిల్లీకి చేర్చాలనేది వారి వ్యూహమని గుర్తించాయి. నిఘా, దర్యాప్తు సంస్థల దృష్టిలో పడకుండా ఉండేందుకు విజయవాడ చిరునామాతో కంపెనీని ప్రారంభింపజేసి చీకటి కార్యకలాపాలకు వినియోగించినట్లు నిర్ధారించాయి. ఈ క్రమంలో మాచవరం సుధాకర్‌ పాత్రధారి అయ్యాడని, తన భార్య పేరిట ఆషీ ట్రేడింగ్‌ కంపెనీని రిజిస్టర్‌ చేయించి, దాన్ని డ్రగ్స్ ముఠాకు అందించాడని తేల్చాయి. ఈ ఏడాది జూన్‌లో కూడా ఈ కంపెనీ పేరుతో టాల్కం పౌడర్‌ ముసుగులో దాదాపు 25 టన్నుల హెరాయిన్ అఫ్గనిస్థాన్ నుంచి దిగుమతి చేసుకున్నట్టు గుర్తించారు. దీనిని కాకినాడ పోర్టు ద్వారా ఢిల్లీ సహా దేశంలోని ఇతర ప్రాంతాలకు తరలించినట్టు తేల్చారు. సెప్టెంబరు 15న ముంద్రాలో హెరాయిన్ కంటెయినర్లు పట్టుబడిన వెంటనే డీఆర్‌ఐ అధికారులు విజయవాడలోని సుధాకర్‌ అత్తవారింట్లో సోదాలు నిర్వహించారు. అదే రోజున సుధాకర్‌, అతడి భార్య వైశాలిని అదుపులోకి తీసుకుని, వివిధ అంశాలపై ప్రశ్నించారు. వారిచ్చిన సమాచారం ఆధారంగా అహ్మదాబాద్‌, ఢిల్లీ, చెన్నై, గాంధీధామ్, మాండ్వీ నగరాల్లో సోదాలు నిర్వహించారు. భార్యాభర్తలిద్దరితో పాటు మరో ఇద్దర్ని సోమవారం అరెస్టు చేశారు. ముంద్రా పోర్టులో పట్టుబడి రెండు కంటెయినర్‌లలో ఒకదానిలో రెండు టన్నులు, మరోదానిలో టన్ను ఉందని, మార్కెట్‌లో దీని విలువ రూ.19,900 కోట్లు ఉంటుందని అధికారులు తెలిపారు. ఇందులో అఫ్గన్ జాతీయుల పాత్ర కూడా ఉన్నట్టు అనుమానిస్తున్నారు. హెరాయిన్ ఉత్పత్తిలో అఫ్గనిస్థాన్ ప్రపంచంలోనే అగ్రస్థానంలో ఉంది. ప్రపంచం మొత్తానికి ఆ దేశం నుంచే 80-90 శాతం సరఫరా అవుతోంది. తాలిబన్లు సహకారంతో ఇటీవల సంవత్సరాల్లో హెరాయిన్ ఉత్పత్తి భారీగా పెరిగినట్టు అంతర్జాతీయ నివేదికలు వెల్లడించాయి.
By September 21, 2021 at 08:18AM
No comments