బ్రాహ్మణులపై వ్యాఖ్యలు.. తండ్రినే అరెస్ట్ చేయించి బీజేపీకి చెక్‌పెట్టిన సీఎం!
బ్రాహ్మణులపై వ్యాఖ్యలు చేసిన వివాదంలో ఇరుక్కున్న తండ్రి నందకుమార్ బఘేల్‌పై పోలీస్ కేసు నమోదయిన విషయం తెలిసిందే. తాజాగా బుధవారం సాయంత్రం ఆయనను పోలీసులు అరెస్ట్ చేసిన అనంతరం 15 రోజుల కస్టడీకి తరలించారు. పోలీస్ కస్టడీ పూర్తయ్యేవరకూ బెయిల్‌ కోసం పిటిషన్ వేయకూడదని నంద్‌కుమార్ నిర్ణయం తీసుకున్నట్టు ఆయన తరఫున లాయర్ వెల్లడించారు. సెప్టెంబరు 21న ఆయనను తిరిగి కోర్టు ముందు ప్రవేశపెట్టనున్నారని తెలిపారు. చత్తీస్‌గఢ్ సీఎం తండ్రి నంద్ కుమార్ బఘేల్.. ఇటీవల బ్రాహ్మణులను ఉద్దేశించి ఉత్తర్ ప్రదేశ్‌లో వివాదాస్పద వ్యాఖ్యలు చేశారు. ‘‘బ్రాహ్మణులను మీ గ్రామాలలోకి రానివ్వవద్దని దేశంలోని గ్రామస్తులందరినీ కోరుతున్నాను.. వారిని బహిష్కరించడానికి ఇతర సామాజిక వర్గాలలో ప్రతి ఒక్కరితోనూ మాట్లాడతాను. వారిని వోల్గా నది ఒడ్డుకు తిరిగి పంపాలి’’ అని ఘాటుగా వ్యాఖ్యానించారు. ఈ వ్యాఖ్యలపై బ్రాహ్మణ వర్గాల నుంచి తీవ్ర అభ్యంతరం వ్యక్తం కాగా.. పోలీసులకు ఫిర్యాదు చేశారు. వారి ఫిర్యాదుతో చత్తీస్‌గఢ్ పోలీసులు కేసు నమోదుచేశారు. తండ్రిపై కేసు నమోదుచేయడం పట్ల సీఎం భూపేశ్ బఘేల్ భిన్నంగా స్పందించారు. చట్టం అత్యున్నతమైందని, ప్రభుత్వం అందరికీ అండగా నిలుస్తుందని ఆయన నొక్కిచెప్పారు. ‘ఒకవేళ ఆ వ్యక్తి నా తండ్రైనా చట్టానికి ఎవరూ అతీతులు కారు.. ప్రతి ఒక్క మతం, వర్గం, సామాజిక వర్గం అభిప్రాయాలు, మనోభవాలను చత్తీస్‌గఢ్ ప్రభుత్వం గౌరవిస్తుంది.. ప్రత్యేకంగా ఓ వర్గంపై మా తండ్రి నంద్ కుమార్ బఘేల్ చేసిన వ్యాఖ్యలు మతపరమైన శాంతికి భంగం కలిగించేలా ఉన్నాయి... ఆయన అటువంటి ప్రకటన చేయడం పట్ల విచారం వ్యక్తం చేస్తున్నాను.. ప్రతిఒక్కరి రాజ్యాంగ హక్కులను పరిరక్షించడానికి ప్రభుత్వం కట్టుబడి ఉంది’ అని సీఎం వ్యాఖ్యానించారు. ‘మా రాజకీయ అభిప్రాయాలు, నమ్మకాలు ఖచ్చితంగా భిన్నంగా ఉంటాయి.. సిద్ధాంతపరంగా ఆయనతో నేను విబేధించే విషయం ప్రతి ఒక్కరికీ తెలుసు.. ఓ కుమారుడిగా మా తండ్రిని గౌరవిస్తాను.. కానీ, ఓ ముఖ్యమంత్రిగా ప్రజాభద్రతకు భంగం కలిగించేలా ఆయన చేసిన తప్పును క్షమించను’ అని భూపేష్ బఘేల్ ఉద్ఘాటించారు. నంద్‌కుమార్ వ్యాఖ్యలపై యూపీ సహా పలు ప్రాంతాల్లో బ్రాహ్మణ సామాజిక వర్గం విమర్శలు గుప్పిస్తున్నారు. ఇదిలా ఉండగా ఈ ఘటనపై ప్రతిపక్ష బీజేపీ స్పందిస్తూ...తండ్రి విషయంలో పోలీసులపై సీఎం ఒత్తిడి తీసుకొస్తున్నారని విమర్శలు గుప్పించింది. తాజా అరెస్ట్‌తో బీజేపీ విమర్శలకు తాళం పడినట్టయ్యింది. నంద్‌కుమార్ అరెస్ట్‌తో త్వరలో ఎన్నికల జరగబోయే ఉత్తరప్రదేశ్‌ ఎన్నికల్లో ప్రచారానికి వెళ్తే సీఎం బఘేల్‌కు ఎలాంటి ఇబ్బందులు ఉండవని అంటున్నారు. ఆయన వయసును కూడా పరిగణనలోకి తీసుకోకుండా తండ్రిని అరెస్ట్ చేయించి చట్టం అందరికీ సమానమేనని స్పష్టం చేశారని పేర్కొన్నారు.
By September 08, 2021 at 08:04AM
No comments