అధికారులను సార్, మేడమ్ పేర్లతో పిలవద్దు.. కేరళ గ్రామపంచాయతీ వినూత్న ఆలోచన!
అధికారుల వద్దకు ఎటువంటి బిడియం లేకుండా ప్రజలు వెళ్లి తమ సమస్యలను నిర్భయంగా చెప్పుకుని స్వేచ్ఛగా మాట్లాడటానికి ఓ గ్రామపంచాయతీ వినూత్నంగా ముందుకొచ్చింది. అధికారులకు, ప్రజలు మధ్య ఉన్న దూరాన్ని తగ్గించడానికి వారిని మర్యాదపూర్వకంగా పిలిచే సార్, మేడమ్ లాంటి గౌరవ పదాలను గ్రామస్థులు వాడకుండా కేరళకు చెందిన ఓ గ్రామం నిషేధించింది. మథుర్ అనే గ్రామంలోని సాధారణ ప్రజలు పంచాయతీ అధికారులను సార్, మేడమ్ అని సంబోధించాల్సిన అవసరం లేదని కొత్త నిబంధన తీసుకొచ్చింది. రాజకీయ పార్టీలకు అతీతంగా మంగళవారం నిర్వహించిన ఓ సమావేశంలో ఈ మేరకు నిర్ణయం తీసుకున్నారు. దీంతో దేశంలోనే ఈ పదాలను తొలగించిన మొదటి గ్రామంగా మథుర్ నిలిచింది. సార్, మేడమ్ అనే పదాలు ప్రజలు, అధికారులకు మధ్య దూరాన్ని పెంచుతున్నాయని..దాన్ని చెరిపేసి స్నేహపూర్వక వాతావరణం నెలకొల్పాలనే ఉద్దేశంతో ఈ నిర్ణయం తీసుకున్నట్టు గ్రామ పంచాయతీ వైస్‌ ప్రెసిడెంట్‌ పీఆర్ ప్రసాద్ తెలిపారు. ప్రజాస్వామ్యంలో కీలకం ప్రజలేనని.. వాళ్లు ఎన్నుకునే నేతలు వారి సేవకులని ఆయన పేర్కొన్నారు. ‘సార్, మేడమ్ పదాలు బ్రిటిష్ కాలం నాటివని, స్వాతంత్రం వచ్చి 75 ఏళ్లయినా వాటిని ఇంకా ఉపయోగిస్తున్నాం.. ప్రజాస్వామ్యంలో ప్రజలే కీలకమని చెప్పడమే దీని ముఖ్యోద్దేశం. ప్రజాస్వామ్యయంలో ప్రభుత్వ అధికారులు, ఎన్నుకున్న ప్రజాప్రతినిధులు సేవకులు.. ప్రజలదే ఇక్కడ అత్యున్నత అధికారం.. ప్రజలు తమ హక్కుల కోసం మా దయ కోసం ఎదురుచూడకూడదు’ అన్నారు. అధికారులకు ప్రజలు మర్యాద ఇవ్వాల్సిన పని లేదని, సేవ చేయాలని అభ్యర్థించకుండా ప్రజలు డిమాండ్‌ చేయాలన్నారు. ఈ పదాలను నిషేధించిన తర్వాత పంచాయతీ బయట నోటీసులను కూడా అంటించారు. సార్, మేడమ్ అని సంబోధించకపోయినా అధికారులు ప్రజల సమస్యలను పరిష్కరిస్తారని పేర్కొన్నారు. ఒకవేళ సమస్యలు పరిష్కరించకపోతే వారిపై పంచాయతీ ప్రెసిడెంట్‌కు ఫిర్యాదు చేయవచ్చని తెలిపారు. అలాగే ప్రతి ఒక్క అధికారి టేబుల్‌ దగ్గర వారి పేర్లతో కూడిన బోర్డులను ఏర్పాటు చేశారు. అంతేకాకుండా ‘అపేక్ష(అప్లికేషన్‌) ఫామ్‌’కు బదులుగా ‘అవకాశ పత్రిక’ను తీసుకువస్తామని పంచాయతీ అధికారులు తెలిపారు. అపేక్ష అంటే రిక్వెస్ట్‌ అనే అర్థం వస్తుందని అందుకే దీన్ని మారుస్తున్నామని స్పష్టం చేశారు. ఒకవేళ తమ కంటే పెద్దవారు, సీనియర్ అధికారులను పేరు పెట్టి పిలవడానికి సంకోచిస్తే మేడమ్, సార్‌కు బదులుగా చేటన్‌ (అన్న) చేచి (అక్కా) అని అధికారులను పిలవవచ్చు అని పంచాయతీ తీర్మానించింది.
By September 03, 2021 at 07:34AM
No comments