Breaking News

కుక్కలకు ఘనంగా పెళ్లి, వారెవ్వా.. ఇలాంటి వివాహం ఎప్పుడూ చూసుండరు


పెళ్లి మండపం అందంగా ముస్తాబైంది. అతిథులందరూ వచ్చేశారు.. పెళ్లికుమార్తె ముస్తాబవుతోంది. అమ్మో.. పెళ్లి కొడుకు మాంచి స్పీడు మీదున్నాడు. ఈడు, జోడూ కుదిరింది.. అమ్మమ్మ.. కాస్త ఆగాలి.. పెళ్లి తంతు ముగియాలి.. ఇక రండి.. వేడుక చూద్దాం.. వేదిక వద్దకు వెళ్దాం.. ఆసిడ్ వెడ్స్ జాన్వీ.. పెళ్లికూతుర్ని తీసుకొచ్చే బుట్ట ఇది.. అంటే పల్లకీ మాదిరి.. మా ఇంటి పిల్లను మీ ఇంటికిస్తున్నాం.. జాగ్రత్త.. ఇక తప్పట్లూ, తాళాలు.. వరుడి మెడలో వధువు, వధువు మెడలో వరుడు వరమాలలు వేసుకొని పెళ్లి చేసుకున్నారు.. పెద్దలందరూ దీవించారు. ఇదిగో అతిథులు.. కాస్త భోజనాలు ఆలస్యమైనట్టున్నాయి.. గుర్ గుర్ అంటూ ఆగ్రహం వ్యక్తం చేస్తున్నారు. అవును మీరు చూసింది శునకాల పెళ్లే. కుక్కలను చాలా మంది పెంచుకుంటారు. మరణిస్తే మనుషులకు చేసినట్లే అంత్యక్రియలు, సంతాపదినాలు చేసిన వారున్నారు. కానీ, ఇలా పెళ్లి చేయడం మాత్రం ఇదే తొలిసారి కావొచ్చు. కేరళలోని త్రిసూర్‌లోని పున్నయార్కులమ్‌లో సోమవారం సాయంత్రం ఈ పెళ్లి వేడుక వైభవంగా జరిగింది. పెళ్లి మాత్రమే కాదు.. శునకానికి తగిన జోడు కోసం వెతకడం, పెళ్లికి ఒప్పించడం.. ఆ తర్వాత పెళ్లికి ముందు ఫొటో షూట్.. ఇలా ఏ లోటూ లేకుండా.. పెళ్లికి సంబంధించిన తంతులన్నీ నిర్వహించారు. ఆ ఫొటో షూటే బాగా వైరల్ అయంది. ఈ శునకాల పెళ్లి వార్త కేరళలో హాట్ టాపిక్ అయ్యింది. ఆకాశ్ షెల్లీ అనే ఎంటర్‌ప్రెన్యూయర్ ఆలోచన తాలుకూ ఫలితమే ఈ శునకాల పెళ్లి. ఆయన కుటుంబం పెంచుకుంటున్న మొట్టమొదటి పెంపుడు కుక్క పేరు ‘కుట్టప్పు అకా యాసిడ్’. అతడిని తమ కుటుంబంలో ఓ సభ్యుడిగా చూసుకుంటారట. కాస్త పెద్దయ్యాక అతడికి పెళ్లి చేయాలని తల్లిదండ్రులు ఎప్పుడూ చెప్పేవారట. యాసిడ్ ఇప్పుడు యవ్వన దశకు వచ్చేశాడు. ప్రస్తుతం వాడికి మూడేళ్లు. ఆకాశ్ తల్లిదండ్రుల కోరికకు తగ్గట్టే యాసిడ్‌కు పెళ్లి వేడుక ఘనంగా నిర్వహించారు. సరిగ్గా 3 నెలల కిందట యాసిడ్‌కు తగిన జోడు జాన్వీ దొరికింది. యాసిడ్ కంటే తను ఏడాది చిన్న. ఇంకేం.. ఆమె కుటుంబసభ్యులను సంప్రదించి పెళ్లికి ఒప్పించారు. వివాహానికి సరైన ముహూర్తం కోసం ఎదురుచూశారు. మలయాళం మాసం ‘కన్నీ’ రాగానే వివాహం జరిపించాలని నిర్ణయించారు. మలయాళీల క్యాలెండర్ ప్రకారం.. ఇది శునకాలకు బ్రీడింగ్ సమయం. పెళ్లి కోసం జాన్వీ సంప్రదాయ డిజైనర్ స్కర్ట్‌ ధరించి ముస్తాబైంది. స్టైల్ కసవు షర్ట్‌లో యాసిడ్ మెరిశాడు. కొవిడ్ జాగ్రత్తల మధ్య వివాహ వేడుక జరిగింది. పెళ్లికి విచ్చేసిన కొందరు అతిథులు తమతో పాటు వివిధ జాతి కుక్కలను తీసుకొచ్చారు. జాన్వీ యజమానులు కన్యాదానం చేశారు. అనంతరం అతిథులందరికీ ఇష్టమైన చికెన్ బిర్యానీ వడ్డించారు. అంతకుముందు పెళ్లి వేదికపై నూతన వధూవరులతో కేక్ కూడా కట్ చేయించారు. 5 గంటల పాటు సాగిన ఈ పెళ్లి తంతును ఫొటోగ్రాఫర్ గిరీశ్ అందంగా చిత్రీకరించారు.


By September 22, 2021 at 07:34AM


Read More https://telugu.samayam.com/latest-news/india-news/kerala-family-hosts-grand-wedding-of-pet-dog-goes-viral/articleshow/86415393.cms

No comments