Breaking News

అమ్రుల్లా సలేహ్ సోదరుడ్ని కాల్చిచంపిన తాలిబన్లు.. శవం కుల్లిపోవాల్సిందేనని హుకుం!


అఫ్గనిస్థాన్‌లో తాలిబన్ల అకృత్యాల పరంపర కొనసాగుతోంది. అందర్నీ క్షమించేశామన్న తాలిబన్ల ప్రకటన ఒట్టి మాటలేనని తేలిపోయింది. గతవారం పంజ్‌షీర్‌ లోయను హస్తగతం చేసుకున్న తాలిబన్లు అక్కడ అరాచకాలకు పాల్పడుతున్నారు. ఆ ప్రాంతంలోని ఇంటింటికి వెళ్లి తనిఖీలు చేపట్టి తమ వ్యతిరేకులను, మైనార్టీలను చంపేస్తున్నట్లు కథనాలు వెలువడుతున్నాయి. ప్రజలతో కలిసి పోరాటం చేసిన అఫ్గన్ మాజీ అధ్యక్షుడు సోదరుడ్ని ముష్కరులు అత్యంత కిరాతకంగా హత్యచేసినట్టు కుటుంబసభ్యులు తెలిపారు. ఆగస్టు 15న తాలిబన్లు కాబుల్‌ను ఆక్రమించుకోవడంతో రెసిస్టెన్స్‌ ఫోర్సెస్‌ నేత అహ్మద్‌ మసూద్‌తో కలిసి అమ్రుల్లా సలేహ్‌ పంజ్‌షీర్‌కు వెళ్లిపోయారు. అనంతరం తనను తాను అఫ్గన్‌ ఆపద్ధర్మ అధ్యక్షుడిగా ప్రకటించుకున్నారు. ప్రస్తుతం పంజ్‌షీర్‌లో ఉన్న అమ్రుల్లా సలేహ్‌ అన్నయ్య రోహుల్లా సలేహ్‌ను గుర్తించిన తాలిబన్లు ఆయనను దారుణంగా హత్య చేసినట్లు వార్తలు వస్తున్నాయి. అమ్రుల్లా సలేహ్‌ సోదరుడు రోహుల్లా అజీజ్ సలేహ్‌ను తాలిబన్లు ఇంట్లోకి చొరబడి కాల్చిచంపారని వెల్లడించారు. అమ్రుల్లా బంధువు అబ్దుల్లా సలేహ్ రాయిటర్స్ వార్తా సంస్థకు టెక్ట్స్ మెసేజ్ పంపారు. ‘మా అంకుల్‌ను తాలిబన్లు హత్యచేశారు.. నిన్న ఆయనను చంపి అంత్యక్రియలకు కూడా అనుమతించలేదు.. ఆయన శవం కుళ్లిపోవాల్సిందేనని చెప్పారు’ అని అబ్దుల్లా వాపోయాడు. అయితే, సమాచార వ్యవస్థ అలేమ్రా మాత్రం.. రోహల్లా సలేహ్ పంజ్‌షీర్‌ పోరులో చనిపోయినట్టు కథనాలు వచ్చాయని తెలిపింది. రోహుల్లా సలేహ్ గత అఫ్గన్ ప్రభుత్వంలో భద్రత, నిఘా వ్యవస్థ డైరెక్టర్‌గా వ్యవహరించారు. రోహుల్లాను ఎక్కడ చంపారు అనేది ఖచ్చితంగా తెలియరాలేదు. కాగా, పంజ్‌షీర్‌లోని పలు ప్రాంతాల్లో రెసిస్టెన్స్‌ ఫోర్సెస్‌, తాలిబన్లకు మధ్య భీకర పోరు కొసాగుతోంది. ఈ దాడుల్లో ఇరు వర్గాలకు చెందిన అనేక మంది ప్రాణాలు కోల్పోయినట్లు అక్కడి ప్రజలు పేర్కొంటున్నారు. పంజ్‌షీర్‌లోని పలు ప్రాంతాలను ఆక్రమించుకున్న తాలిబన్లు స్థానిక యువకులను అతి దారుణంగా చంపేస్తున్నారని, వీరి నరమేధానికి భయపడి ఇప్పటికే 100కు పైగా కుటుంబాలు పారిపోయాయని రెసిస్టెన్స్‌ ఫోర్స్‌ ప్రజలు ట్విటర్‌ వేదికగా ఆవేదన వ్యక్తం చేస్తున్నారు. తమకు ప్రపంచం ఎందుకు సాయం చేయడంలేదని ప్రశ్నిస్తున్నారు.


By September 11, 2021 at 07:16AM


Read More https://telugu.samayam.com/latest-news/international-news/brother-of-former-afghan-vice-president-amrullah-saleh-executed-by-taliban/articleshow/86109182.cms

No comments