జిమ్‌లో కసరత్తులు.. కష్టపడుతున్నతమిళనాడు సీఎం.. వీడియో వైరల్!
సవాలక్ష పనులతో రాజకీయ నాయకులకు వ్యక్తిగత ఆరోగ్యానికి సమయం కేటాయించడం అరుదు. ఇక, రాష్ట్రానికి ముఖ్యమంత్రి అంటే ఇంకా చెప్పాల్సిన పనిలేదు. పాలనా వ్యవహారాలు, నిత్యం బిజీబిజీ పనుల్లో నిమగ్నమై ఉంటారు. ఇక, తమిళనాడు ముఖ్యమంత్రి, డీఎంకే అధినేత బాధ్యతాయుతమైన పదవిలో ఉన్నప్పటికీ.. పనులు సక్రమంగా నిర్వహించాలంటే ఆరోగ్యంగా ఉండటం ముఖ్యమని భావించారు. వ్యక్తిగత ఆరోగ్యంపై సారించిన ఆయన.. ఫిట్‌గా ఉండేందుకు జిమ్‌లో కసరత్తులు చేస్తున్నారు. ఆరోగ్యాన్ని కాపాడుకోవాలని.. ఫిట్‌నెస్‌ ప్రాధాన్యతను చాటుతున్న ఆ వీడియోలు ప్రస్తుతం సోషల్ మీడియాలో వైరల్ అవుతున్నాయి. ఒక వీడియోలో తన భుజం, కండరాలకు శిక్షణ... మరొక వీడియోలో తన వెన్నుముకను బలోపేతం చేయడానికి 10 కిలోల ప్లేట్లను ఎత్తుతున్నారు. గతంలోనూ స్టాలిన్‌కు సంబంధించిన ఈ తరహా వీడియోలు వెలుగులోకి వచ్చాయి. చెన్నై వీధుల్లో ఆయన సైకిలింగ్ చేస్తూ పలుసార్లు కెమెరాలకు చిక్కారు. ఇక, తమిళనాడు ముఖ్యమంత్రి యోగాను కూడా ఎంతగానో ఇష్టపడతారు. క్లిష్టమైన యోగసనాలను ఆయన అవలీలగా వేస్తారు. ముఖ్యమంత్రి జిమ్‌లో కసరత్తులతో పాటు రోజూ వాకింగ్‌ కూడా చేస్తారు. ఈ ఏడాది ఏప్రిల్‌లో జరిగిన తమిళనాడు అసెంబ్లీ ఎన్నికల్లో అన్నాడీఎంకే-బీజేపీ కూటమిని స్టాలిన్ నాయకత్వంలోని డీఎంకే కూటమి విజయం సాధించడంతో మే 2న ముఖ్యమంత్రిగా ప్రమాణస్వీకారం చేశారు. అప్పటి నుంచి వినూత్న పాలన, పథకాలను అమలుచేస్తూ ప్రజల మన్ననలు పొందుతున్నారు. ఇటీవల ఇండియా టుడే నిర్వహించిన మూడ్ ఆఫ్ నేషన్ సర్వేలో దేశవ్యాప్తంగా ఉత్తమ ముఖ్యమంత్రుల జాబితాలో స్టాలిన్ నెంబర్ వన్‌గా నిలిచారు. ఎన్నికల్లో ఇచ్చిన హామీలను బాధ్యతలు చేపట్టిన తొలి రోజు నుంచే అమలు చేస్తున్నారు.
By August 24, 2021 at 10:45AM
No comments