అఫ్గన్ అభివృద్దిలో చైనాదే కీలక పాత్ర.. తాలిబన్లు సంచలన ప్రకటన
అఫ్గనిస్థాన్‌లో శాంతి స్థాపన.. సయోధ్యకు కీలక పాత్ర పోషిస్తామని చేసిన ప్రకటనను తాలిబన్లు స్వాగతించారు. అఫ్గన్ పునఃనిర్మాణంలో చైనా సహకారాన్ని స్వాగతిస్తున్నామని అధికార ప్రతినిధి సొహెయిల్ షహీన్ డ్రాగన్ అధికార టెలివిజన్ సీజీటీఎన్‌కు గురువారం ఇచ్చిన ఇంటర్య్యూలో తెలిపారు. దాదాపు 20 ఏళ్ల పాటు అఫ్గన్ భూభాగంపై యుద్ధం చేసిన అమెరికా, నాటో బలగాలు.. పూర్తిగా వైదొలగడంతో తాలిబన్లు మెరుపు వేగంతో ఆ దేశాన్ని ఆక్రమించుకున్నారు. రాజధాని నగరం కాబూల్‌ను స్వాధీనం చేసుకోవడంతో అక్కడ విదేశీయులు, అఫ్గన్ పౌరులు ప్రాణభయంతో దేశం విడిచి వెళ్లిపోతున్నారు. తాలిబన్ల విషయంలో రష్యా, అమెరికాల మాదిరిగా శక్తివంతమైన చైనా పోరాడలేదనే వాస్తవాన్ని పరిగణనలోకి తీసుకోవాలి. ‘అతిపెద్ద ఆర్ధిక వ్యవస్థ, సామర్థ్యంతో చైనా శక్తివంతమైన దేశం.. పునఃనిర్మాణం, పునరావాసం, పునఃఅభివృద్ధిలో చైనా ప్రముఖ పాత్ర పోషిస్తుందని నేను భావిస్తున్నాను’ అని షహీన్ అన్నారు. గత నెలలో చైనాలో పర్యటించిన తాలిబన్ ప్రతినిధులు.. ఆ దేశ విదేశాంగ మంత్రి వాంగ్ యీతో తియాంజిన్ నగరంలో సమావేశమైన విషయాన్ని సొహెయిల్ షహీన్ గుర్తుచేశారు. అఫ్గన్ మితవాద ఇస్లామిక్ విధానాన్ని అవలంభిస్తుందని పేర్కొన్నారు. పశ్చిమ జింజియాంగ్ ప్రాంతంలోని ఉఘర్లను మత తీవ్రవాదాన్ని అస్థిరపరిచే శక్తిగా చైనా భావిస్తోంది. తాలిబన్ నియంత్రణలోని భూభాగం వేర్పాటువాద శక్తులకు ఆశ్రయంగా ఉపయోగపడుతుందని డ్రాగన్ చాలాకాలం నుంచి ఆందోళన చెందుతోంది. అయినా, సరే వీటిని పక్కనబెట్టి తాలిబన్లకు స్నేహహస్తం అందజేయడం వెనుక డ్రాగన్ ఆశిస్తున్న రాజకీయ ప్రయోజనాలు తేటతెల్లమవుతున్నాయి. దీనికి తాలిబన్ల ప్రతినిధులతో సమావేశం తర్వాత చైనా విదేశాంగ శాఖ ప్రకటనే నిదర్శనం. ‘‘అమెరికా, నాటో దళాలు హడావుడిగా ఉపసంహరించుకోవడం వాస్తవానికి అఫ్గన్ పట్ల యుఎస్ విధానం వైఫల్యాన్ని సూచిస్తుంది.. అఫ్గన్ ప్రజలు ఇప్పుడు జాతీయ స్థిరత్వం, అభివృద్ధిని సాధించడానికి ఒక ముఖ్యమైన అవకాశం ఏర్పడింది’’ అని చైనా విదేశాంగ శాఖ వ్యాఖ్యలు చేసింది. అంతేకాదు, అఫ్గనిస్థాన్‌కు ప్రపంచ దేశాలు మద్దతు ఇవ్వాలని, ఒత్తిడి చేయవద్దంటూ తాజాగా చైనా విదేశాంగ మంత్రి వాంగ్ యీ ప్రకటించడం గమనార్హం.
By August 20, 2021 at 09:30AM
No comments