బరువు తగ్గండి.. రివార్డు పాయింట్ల పట్టండి.. పౌరుల కోసం యూకే వినూత్న పథకం!
![](https://blogger.googleusercontent.com/img/b/R29vZ2xl/AVvXsEhr2RcoK5Nf9NTRnPrStQ3-ZEfWwNyAVOOY6PB6ANhCKZnZochRr_RqPaaDi69eUIGsDRKvoByMaFr3cDoUjes5s8YnYK1JmNBBqqCvhrWe7EYyAph699mJoYmlAtAa9N1iUdMDhRpkjdA/s1600/telugu+news.png)
![](https://telugu.samayam.com/photo/84780281/photo-84780281.jpg)
కరోనా సమయంలో సుదీర్ఘ కాలం ఇళ్లలో ఉండటం వల్ల ఊబకాయ సమస్యను ఎదుర్కొంటున్నారు. కరోనా కాలంలో తాము విపరీతంగా బరువు పెరిగినట్టు 41 శాతం మంది బ్రిటన్ నిర్వహించిన ఓ సర్వేలో వెల్లడించారు. సగటున ఒక్కొక్కరు 4 కిలోలు పెరిగినట్లు యూకే నేషనల్ హెల్త్ సర్వీస్ (ఎన్హెచ్ఎస్) అంచనా వేసింది. దీంతో దీర్ఘకాలంలో ఆరోగ్య సమస్యలు తలెత్తే ప్రమాదం ఉందని భావించిన యూకే ప్రభుత్వం.. పౌరులకు సన్నబడాలని సూచించింది. ఈ మేరకు ప్రభుత్వం తరఫున కొన్ని కార్యక్రమాలను నిర్వహించేందుకు ఎన్హెచ్ఎస్ సిద్ధమైంది. ఆరోగ్యకరమైన జీవన విధానాన్ని అలవాటు చేసుకోవాలని సూచనలు జారీచేసింది. టీవీల్లో జంక్ ఫుడ్స్కు సంబంధించిన వ్యాపార ప్రకటనలపై నిషేధం విధించింది. ఆహార పదార్థాల్లో ఉండే కెలోరీల వివరాలను అందరికీ తెలియజేసేలా పోస్టర్లు పెట్టాలని హోటళ్లు, రెస్టారెంట్లు, ఫుడ్ కోర్టులకు ఆదేశాలు జారీ చేసింది. మధ్యాహ్న భోజనంలో ఆరోగ్యకరమైన ఆహారం అందించేలా చర్యలు తీసుకుంటోంది. జంక్ ఫుడ్స్పై పన్నులు పెంచాలన్న ప్రతిపాదన కూడా ఉంది. కానీ, ప్రధాని బోరిస్ జాన్సన్ దీనిపై విముఖంగా ఉన్నారు. బరువు తగ్గడానికి ప్రత్యేక ప్రోత్సహకాలను యూకే ప్రభుత్వం అమలు చేయనుంది. బరువు తగ్గడానికి ఉపయోగపడే యాప్లు, ప్రణాళికలను ఎన్హెచ్ఎస్ ప్రోత్సహిస్తోంది. బరువును తగ్గించుకునేందుకు ఉపయోగపడే ఆహార పదార్థాల తయారీకి సంబంధించిన ప్రకటనలను టీవీల్లో ఇస్తోంది. ఆరోగ్యకరమైన అలవాట్లను అలవర్చుకుంటారో వారికి నగదు ప్రోత్సాహకాలు, బోనస్లు, డిస్కౌంట్ కూపన్లు ఇవ్వనున్నట్లు ప్రభుత్వం ప్రకటించింది. జంక్ఫుడ్ పక్కనబెట్టి, కూరగాయాలు, పండ్లు ఎక్కువగా తినేవారికి ఈ ప్రోత్సాహకాలను అందజేయనున్నారట. ఊబకాయంపై పోరాటంలో భాగంగా ఈ కార్యక్రమం ప్రారంభించబోతున్నట్లు బ్రిటన్ పేర్కొంది. ప్రధాని బోరిస్ జాన్సన్ సైతం ఈ కార్యక్రమంలో భాగమై బరువు తగ్గుతానని ప్రతిజ్ఞ చేశారు. ఈ ప్రోత్సాహకాలకు అర్హుల ఎంపిక కోసం ప్రభుత్వం ప్రత్యేక యాప్ను రూపొందిస్తోంది. దీని ద్వారా సూపర్ మార్కెట్లలో పౌరుల నెలవారీ ఆహార పదార్ధాల కొనుగోళ్ల వివరాలను విశ్లేషించనున్నారు. జంక్ఫుడ్ను తగ్గించి.. కూరగాయాలు, పండ్లు కొనుగోలు చేసేవారిని గుర్తించి యాప్ ద్వారానే లాయల్టీ పాయింట్లు ఇస్తారు. విద్యాసంస్థలు, ఆఫీసులకు కాలినడక వెళితే అదనంగా మరిన్ని పాయింట్లు లభిస్తాయి. అలా వచ్చిన పాయింట్లను క్యాష్బ్యాక్ రూపంలో నగదుగా మార్చుకోవచ్చు లేదా డిస్కౌంట్.. ఫ్రీ టికెట్స్ పొందొచ్చు. ఈ కార్యక్రమం వచ్చే ఏడాది జనవరి నుంచి ప్రారంభం కానుంది. ఈ కార్యక్రమం అమలుకు, యాప్ అందుబాటులోకి తేవడానికి ఏర్పాట్లు జరుగుతున్నాయని ప్రభుత్వ వర్గాలు వెల్లడించాయి. దుబాయ్ కూడా ఊబకాయం, అధిక బరువు సమస్య పరిష్కారం కోసం ఇటువంటి వినూత్న కార్యక్రమం ప్రారంభించింది. పౌరులు తమ శరీర బరువులో ఎన్ని కిలోలు తగ్గితే అన్ని గ్రాముల బంగారం ఇస్తున్నారు. కాగా, ఈ ఏడాది మార్చిలో ప్రపంచ ఊబకాయ దినోత్సవం సందర్భంగా బ్రిటన్ ప్రధాని మాట్లాడుతూ.. ఈ సమస్యపై పోరాటానికి 100 మిలియన్ పౌండ్లు నిధులు కేటాయిస్తున్నట్టు ప్రకటించారు. ఇందులోని 70 మిలియన్ పౌండ్లను నేషనల్ హెల్త్ సర్వీస్ ద్వారా ఖర్చు చేయనున్నట్టు తెలిపారు. మిగతా 30 మిలియన్ పౌండ్లను ఉచితంగా యాప్ ద్వారా బరువు తగ్గే ప్రణాళికలు, ఆరోగ్యకరమైన బరువును నిర్వహించడానికి సహకరించడం వంటి కార్యక్రమాలకు వినియోగిస్తారు.
By July 27, 2021 at 08:05AM
No comments