Breaking News

మరోసారి గగన్‌యాన్ వాయిదా.. వచ్చే ఏడాాదే ప్రయోగం.. ISRO కీలక ప్రకటన


భారత అంతరిక్ష పరిశోధన సంస్థ (ఇస్రో) ప్రతిష్టాత్మక ప్రయోగం ‘గగన్‌యాన్’ మరోసారి వాయిదా పడింది. ఈ ఏడాది డిసెంబరులో చేపట్టాల్సిన మానవ రహిత ‘గగన్‌యాన్‌’ ప్రయోగం సాధ్యపడకపోవచ్చని సోమవారం ప్రకటించింది. లాక్‌డౌన్‌ కారణంగా ప్రాజెక్టుకు సంబంధించిన హార్డ్‌వేర్‌ పరికరాలను సమకూర్చలేకపోయినట్లు ఇస్రో ఛైర్మన్ డాక్టర్‌ కె.శివన్‌ వివరించారు. స్వదేశీ పరిజ్ఞానంతోనే గగన్‌యాన్‌ డిజైన్‌, అనాలసిస్‌, డాక్యుమెంటేషన్‌ వ్యవస్థలను రూపొందించాలని సంకల్పించినట్టు తెలిపారు. దీంతో ప్రయోగం వచ్చే ఏడాది చేపట్టనున్నట్టు పేర్కొన్నారు. ‘మానవ సహిత గగన్‌యాన్‌ మిషన్‌కు ముందుగా చేపట్టే రెండు మానవరహిత ప్రయోగాల్లో ఒకటి డిసెంబరు, మరొకటి 2022-23లో చేపట్టాల్సి ఉంది.. లాక్‌డౌన్‌ కారణంగా ఈ ప్రాజెక్టు తేదీలన్నీ సవరించే అవకాశం ఉందని’ శివన్‌ పేర్కొన్నారు. GSLVMK-3 నౌక ద్వారా నింగిలోకి పంపై గగన్‌యాన్‌లో ప్రయాణించే నలుగురు వ్యోమగాములు ఇప్పటికే శిక్షణ పూర్తి చేసుకున్నారు. మానసిక, భౌతిక, సాంకేతిక అంశాల్లో మరింత శిక్షణ కోసం విద్యా, నౌక, వైమానిక విభాగాలను ఈ వ్యోమగాములు సందర్శించనున్నారు. భారత వైమానిక దళం నేతృత్వంలో శిక్షణ కొనసాగుతోంది. వీరికి అవసరమైన వ్యవస్థలను రూపొందించేందుకు డీఆర్‌డీఓ, సూక్ష్మ గురుత్వాకర్షణ ఇంధన వ్యవస్థల కోసం ఫ్రాన్స్, రష్యా, అమెరికా అంతరిక్ష సంస్థలతో ఒప్పందాలు చేసుకుంది. గగన్‌యాన్‌ పూర్తిస్థాయి ప్రయోగం 2022 ఆగస్టు 15న 75వ స్వాతంత్య్ర దినోత్సవం నాడు చేపట్టాలని ప్రధాని నరేంద్ర మోదీ ప్రకటించినా.. ఆ కల సాకారం కాకపోవచ్చని ఇస్రో ప్రకటించింది. మానవసహిత మెషీన్‌లో భాగంగా ముగ్గురు వ్యోమగాములను తక్కువ ఎత్తున భూకక్ష్యలోకి పంపి.. అంతరిక్షంలో ముందే నిర్ణయించిన కార్యకలాపాల నిర్వహించి తిరిగి భూమిపై గమ్యస్థానానికి సురక్షితంగా తిరిగి రావడమే లక్ష్యంగా పెట్టుకున్నారు. వాస్తవానికి మానవ సహిత అంతరిక్ష ప్రయోగాలకు ఇస్రో 2007లోనే శ్రీకారం చుట్టింది. అప్పట్లో నిధుల కొరత కారణంగా ఈ ప్రయోగాలు మరింత ముందుకు సాగలేకపోయాయి. దీనికి తోడు, అప్పటి వరకూ ఇస్రో దగ్గరున్న శక్తిమంతమైన జీఎస్ఎల్వీ రాకెట్‌లకు మానవులను పంపే మాడ్యూల్‌ను తీసుకెళ్లే సామర్థ్యం లేదు. టన్నుల కొద్దీ బరువైన క్రూమాడ్యూల్‌ను తీసుకెళ్లే రాకెట్లు కానీ, క్రయోజనిక్ ఇంజిన్లు కానీ లేవు. దీంతో ఆ దిశగా ప్రయోగాలు కొనసాగించారు. 2014లో తయారు చేసిన జీఎస్ఎల్వీ మార్క్ టూతో ఆ సమస్య తీరిపోయింది. ఇక క్రయోజనిక్స్‌లో ఇస్రో ప్రయోగాలు కూడా సక్సెస్ అయ్యాయి.


By July 27, 2021 at 09:46AM


Read More https://telugu.samayam.com/latest-news/science-technology/isros-first-uncrewed-mission-of-gaganyaan-programme-not-possible-in-december/articleshow/84781814.cms

No comments