Han Junwe బంగ్లా బోర్డర్‌లో పట్టుబడ్డ చైనా గూఢచారి.. పదేళ్లుగా దేశంలోనే!
అక్రమంగా దేశంలోకి చొరబడేందుకు ప్రయత్నించి బంగ్లాదేశ్ సరిహద్దుల్లో గురువారం పట్టుబడ్డ చైనా వ్యక్తి హాన్‌ జున్వే సాధారణ పౌరుడు కాదని విచారణలో వెల్లడయ్యింది. చైనా గూఢచారని, నిఘా సంస్థ తరపున భారత్‌లో పదేళ్లకు పైగా పనిచేస్తున్నాడని తేలింది. నకిలీ పత్రాలతో సిమ్‌ కార్డులు సంపాదించి, వాటిని అక్రమంగా చైనాకు తరలించడం సహా పలు ఆర్థికనేరాలకు పాల్పడినట్లు గుర్తించారు. గురుగ్రామ్‌లో స్టార్‌ స్ప్రింగ్‌ పేరిట హోటల్‌ నడుపుతున్న జున్వే.. చైనీ పౌరులనే అందులో సిబ్బందిగా నియమించాడు. తన సహచరుడితో కలిసి ఇప్పటివరకూ 13 వందలకు పైగా సిమ్‌ కార్డులను గుట్టుగా భారత్ దాటించి చైనాకు తరలించినట్లు తెలిసింది. వీటి సాయంతో బ్యాంకు ఖాతాలను హ్యాక్ చేయడం సహా పలు ఆర్థిక నేరాలకు పాల్పడినట్టు గుర్తించారు. ఖాతాల నుంచి నగదు హ్యాక్ చేసి ఏటీఎంల నుంచి వాటిని విత్‌డ్రా చేసినట్టు తెలిపారు. లక్నోలో నమోదైన ఓ కేసులో హాన్‌ జున్వే కోసం పోలీసులు గాలిస్తుండగా.. ఆ కేసు వల్లే భారత్ వీసా లభించలేదు. దీంతో బంగ్లాదేశ్ బిజినెస్‌ వీసాపై దేశంలోకి అక్రమంగా ప్రవేశించడానికి ప్రయత్నించి బీఎస్ఎఫ్‌కి చిక్కాడు. హాన్‌ జున్వే.. గతంలో నాలుగుసార్లు భారత్‌కు వచ్చి వెళ్లినట్లు దర్యాప్తులో వెల్లడైంది. 2010లో హైదరాబాద్‌‌ను సందర్శించిన హాన్‌ జున్వే.. 2019 తర్వాత ఢిల్లీ, గురుగ్రామ్‌ ప్రాంతాలలో మూడుసార్లు పర్యటించినట్టు అంగీకరించాడు. జున్వే గూఢచర్యంపై ప్రాథమిక దర్యాప్తు పూర్తికావడంతో అతడ్ని స్థానిక పోలీసులకు అప్పగించారు. పట్టుబడిన సమయంలో భారీగా సిమ్‌ కార్డులు అతడి వద్ద లభ్యమయ్యాయి. పోలీసుల విచారణలో మరిన్ని విషయాలు వెలుగుచూసే అవకాశముంది. పశ్చిమ్ బెంగాల్‌లోని మాల్దా జిల్లాలో బంగ్లాదేశ్ సరిహద్దుల వద్ద బీఎస్ఎఫ్ పెట్రోలింగ్ సిబ్బందికి జున్వే చిక్కాడు. అతడి నుంచి ఎలక్ట్రానిక్ పరికరాలను కూడా స్వాధీనం చేసుకున్నారు. హన్ జున్వేది చైనాలోని హుబే నగరంగా గుర్తించారు. కొద్ది రోజుల కిందటే అతడి వ్యాపార భాగస్వామి సన్ జైంగ్‌ని ఏటీఎస్ అదుపులోకి తీసుకుంది. హన్ జున్వేపై బ్లూ కార్నర్ నోటీసు జారీ అయిన తర్వాత నుంచి సన్ కోసం గాలిస్తున్నారు.
By June 13, 2021 at 01:22PM
Post Comment
No comments