నటిని పెళ్లి పేరుతో గర్భవతి చేసిన మాజీ మంత్రి.. బెంగళూరులో అరెస్ట్
నటిపై అత్యాచారానికి పాల్పడినట్టు ఆరోపణలు ఎదుర్కొంటున్న మాజీ మంత్రి, అన్నాడీఎంకే నేత మణికందన్‌ను తమిళనాడు పోలీసులు బెంగళూరులో అరెస్ట్ చేశారు. బాధితురాలికి అబార్షన్ చేయించడం సహా బెదిరింపులకు పాల్పడినట్టు మాజీ మంత్రిపై కేసు నమోదయ్యింది. మణికందన్‌పై గత నెలలో ఫిర్యాదు చేసిన బాధితురాలు.. తనను మోసం చేసినట్టు ఆరోపించింది. ఆమె ఫిర్యాదు ఆధారంగా అడయార్ మహిళా పోలీస్ స్టేషన్ అధికారులు పలు సెక్షన్ల కింద కేసు నమోదుచేసి దర్యాప్తు చేపట్టారు. ఈ కేసులో మణికందన్‌కు మద్రాస్ హైకోర్టు ముందస్తు బెయిల్‌ను మంజూరు చేస్తూ.. జూన్ 9 వరకు అరెస్ట్ చేయవద్దని పోలీసులకు సూచించింది. గడువు ముగియడంతో మణికందన్ పరారయ్యారు. అతడి కోసం రెండు ప్రత్యేక బృందాలు గాలింపు చేపట్టగా.. బెంగళూరులో ఉన్నట్టు గుర్తించారు. కొన్నేళ్లుగా తనతో సహజీవనం చేశాడని, పెళ్లి చేసుకుంటానని చెప్పి మోసం చేశాడని మలేషియాకు చెందిన ఆమె ఆరోపించింది. శారీరకం వాంఛలు తీర్చుకున్నాడని, అతడి వల్ల మూడుసార్లు గర్బం దాల్చానని చెప్పింది. బలవంతంగా అబార్భన్ చేయించాడని, పెళ్లి చేసుకోమంటే అడిగితే మలేషియాలోని కుటుంబసభ్యులను బెదిరించాడని తెలిపింది. ఐటీ మంత్రిగా ఉన్నప్పుడు 2017లో మణికందన్‌తో తనకు పరిచయమైనట్టు వివరించింది. మలేషియాలో పెట్టుబడులు పెడతానని స్నేహం చేశాడని, కొద్ది రోజుల పెళ్లి ప్రతిపాదన తెచ్చాడని ఫిర్యాదులో పేర్కొంది. అప్పటికే వివాహమైనా తననూ వివాహం చేసుకుంటానని మాటిచ్చాడంది. తనతో శారీరక సంబంధం పెట్టుకుని, కొన్నాళ్ల తర్వాత పెళ్లి చేసుకోమని కోరితే బెదిరింపులకు దిగాడని తెలిపింది. మలేషియా తిరిగి వెళ్లకపోతే తన నగ్న చిత్రాలను ఆన్‌లైన్‌లో పెడతానని బెదిరించాడని వాపోయింది. అయితే, ఈ ఆరోపణలను మాజీ మంత్రి మణికందన్ తోసిపుచ్చారు. ఉద్దేశపూర్వకంగానే తప్పుడు ఆరోపణలు చేస్తుందని చెప్పారు.
By June 20, 2021 at 01:11PM
No comments