ఇజ్రాయేల్ కొత్త ప్రధానిగా నఫ్తాలీ బెన్నెట్.. పార్లమెంట్ ఆమోదంతో ముగిసిన నెతన్యాహు శకం

ఇజ్రాయేల్ కొత్త ప్రధానిగా స్థానంలో నియమాకానికి ఆ దేశ పార్లమెంట్ ఆమోదం తెలపడంతో అక్కడ రాజకీయ అనిశ్చితకు కాస్త విరామం లభించింది. దీంతో బెంజమిన్‌ నెతన్యాహు 12 ఏళ్ల పాలనకు తెరపడినట్టయ్యింది. ఒకప్పడు నెతన్యాహు అనుచరుడై నఫ్తాలీ బెన్నెట్‌ (49) సంకీర్ణ కూటమి తరఫున ప్రధానిగా ఎన్నికయ్యారు. ఇజ్రాయేల్ పార్లమెంటు ‘నెసెట్టా’ ఆదివారం సమావేశమై బెన్నెట్‌ను ప్రధానిగా ఎన్నుకుంది. ఆ వెంటనే ఆయన ప్రమాణస్వీకారం చేశారు. భిన్న సిద్ధాంతాలు, విభిన్న అభిప్రాయలున్న ఎనిమిది పార్టీలు కూటమిగా ఏర్పడి ఈ ప్రభుత్వాన్ని ఏర్పాటు చేస్తుండగా.. ఇందులో అరబ్బులకు ప్రాతినిధ్యం వహించే ఓ చిన్న పార్టీ కూడా ఉండటం విశేషం. మొత్తం 120 స్థానాలున్న ఇజ్రాయేల్ పార్లమెంట్‌లో ఈ కూటమి బలం కేవలం 61 మంది సభ్యులే. ఆదివారం పార్లమెంట్‌లో జరిగిన ఓటింగ్‌లో బెన్నెట్‌కు అనుకూలంగా 60, వ్యతిరేకంగా 59 ఓట్లు వచ్చాయి. దీంతో ప్రభుత్వ మనుగడపై అప్పుడే సందేహాలు వ్యక్తమవుతున్నాయి. ఒప్పందం ప్రకారం యమినా పార్టీకి చెందిన బెన్నెట్‌ 2023 సెప్టెంబరు వరకు పదవిలో కొనసాగుతున్నారు. తరువాత యెష్‌ అటిడ్‌ పార్టీ నేత యాయిర్‌ లపిడ్‌కు బాధ్యతలు అప్పగించాల్సి ఉంటుంది. సంకీర్ణ ప్రభుత్వ ఏర్పాటులో లపిడ్‌ కీలక పాత్ర పోషించారు. ఆయన రెండేళ్లపాటు పదవిలో ఉంటారు. 30 స్థానాలతో అతిపెద్ద పార్టీగా ఉన్న మాజీ ప్రధాని నెతన్యాహు నాయకత్వంలోని లికుడ్‌ విపక్ష పాత్రను పోషించనుంది. ఆదివారం ఓటింగ్‌ సందర్భంగా నెతన్యాహు మౌనంగా కూర్చుకున్నారు. కొత్త ప్రధానికి పార్లమెంట్‌లో ఆమోదం తెలపడంతో తన ఛాంబర్ నుంచి వెళ్లిపోవడానికి ముందు నఫ్తాలీ బెన్నెట్‌తో కరచాలనం చేశారు. ఇక, కొత్త ప్రభుత్వానికి సవాళ్లు స్వాగతం పలుకుతున్నాయి. ముఖ్యంగా పాలస్తీనాతో ఉద్రిక్తతల విషయంలో ఏవిధంగా నెట్టుకొస్తారనేది ఆసక్తిగా మారింది. పాలస్తీనియన్లతో ఉద్రిక్తతలను తగ్గించడానికి, అమెరికాతో సత్సంబంధాలు కొనసాగించడమే అజెండాగా ముందుకెళ్లే అవకాశం ఉంది. నెతన్యాహుపై అవినీతి ఆరోపణలు రావడంతో ఆయన న్యాయవిచారణ ఎదుర్కొంటున్నారు. గతేడాది న్యాయవిచారణ ప్రారంభం కాగా.. అధికారంలో ఉండగానే కోర్టు బోనులో నిలబడ్డ తొలి ఇజ్రాయెల్‌ ప్రధానిగా నెతన్యాహు అపవాదును మూటగట్టుకున్నారు. ఐదోసారి తిరిగి అధికారంలోకి వచ్చిన వారం రోజుల్లోనే ఆయనపై విచారణ ప్రారంభమయ్యింది. మూడు కేసుల్లో ముడుపులు స్వీకరించడం ద్వారా విశ్వాస ఘాతుకానికి పాల్పడినట్లు ఆరోపణలను ఎదుర్కొంటున్నారు.

By June 14, 2021 at 07:40AM

Read More https://telugu.samayam.com/latest-news/international-news/benjamin-netanyahu-ousted-as-israel-pm-parliament-approves-new-coalition-govt/articleshow/83499672.cms