Breaking News

కొవాగ్జిన్ టీకా.. పిల్లలపై ప్రయోగాలకు డీసీజీఐ అనుమతి


ప్రపంచానికి ఏడాదిన్నరగా కంటిమీద కునుకే కరవయ్యింది. చైనాలో పురుడుపోసుకుని ప్రపంచాన్ని చుట్టేసిన కరోనా వైరస్.. జన్యుమార్పిడులకు గురవుతూ మరింత ప్రమాదకరంగా మారుతోంది. పలు టీకాలు అందుబాటులోకి రావడంతో కొంత ఉపశమనం లభించింది. మరికొన్ని టీకాలు క్లినికల్ ట్రయల్స్ స్థాయిలో ఉన్నాయి. అలాగే, చిన్నారులపై టీకాలు ఏవిధంగా పనిచేస్తాయనేది అధ్యయనం జరుగుతోంది. ఈ నేపథ్యంలో 2 నుంచి 18 ఏళ్లలోపువారిపై క్లినికల్ ట్రయల్స్‌కు టీకా కొవాగ్జిన్‌కు డ్రగ్ కంట్రోలర్ జనరల్ ఆఫ్ ఇండియా (డీసీజీఐ) అనుమతించింది. మొత్తం 525 మంది వాలంటీర్లపై ఈ ప్రయోగాలు నిర్వహించనున్నట్టు భారత్ బయోటెక్ తెలిపింది. ఫేజ్-2, ఫేజ్-3 ట్రయల్స్‌కు డీసీజీఐ అనుమతించినట్టు పేర్కొంది. దేశవ్యాప్తంగా ఢిల్లీ, పట్నాలోని ఎయిమ్స్‌, నాగ్‌పూర్‌లో మెడిట్రినా సంస్థలో ఈ ట్రయల్స్ నిర్వహించనున్నట్టు భారత్ బయోటెక్ వెల్లడించింది. 28 రోజుల వ్యవధిలో రెండు డోస్‌లు ఇచ్చి ఫలితాలను నివేదించనున్నారు. ఇప్పటివరకు చిన్నారులకు కరోనా పెద్దఎత్తున సోకిన దాఖలాలు లేవు. మొదట్లో అసలు పిల్లలకు కోవిడ్ సోకందని అన్నారు. ఇప్పుడిప్పుడే అమెరికాలో కొత్తరకం లక్షణాలతో పిలలకు కరోనా వస్తున్నట్టు బయటపడుతుంది. మూడో దశలో చిన్నారులపై కరోనా పంజా విసురుతుందని వార్తలు వెలువడుతున్నాయి. నేపథ్యంలో చిన్నారులకు టీకా అందించే అంశంపై కేంద్రం కసరత్తు చేస్తున్నది. ఇందులో భాగంగా కొవాగ్జిన్‌కు అనుమతించింది. 2 నుంచి 18ఏళ్ల వారిపై కొవాగ్జిన్‌ క్లినికల్‌ ట్రయల్స్‌కు అనుమతి కోరుతూ భారత్‌ బయోటెక్‌ ఇటీవల దరఖాస్తు చేసింది. దీనిపై సెంట్రల్ డ్రగ్స్ స్టాండర్డ్ కంట్రోల్ ఆర్గనైజేషన్ (సీడీఎస్‌సీవో) నిపుణుల కమిటీ మంగళవారం సమావేశమై చర్చించింది. అనంతరం 2-18 ఏళ్ల వయసు చిన్నారులపై టీకా క్లినికల్‌ ప్రయోగాలకు కమిటీ సిఫార్సు చేసింది. ఈ సిఫార్సులు ఆధారంగా డీసీజీఐ గురువారం అనుమతించింది.


By May 13, 2021 at 11:32AM


Read More https://telugu.samayam.com/latest-news/india-news/dcgi-approved-covaxin-phase-2-3-clinical-trials-for-2-18-age-group/articleshow/82597806.cms

No comments