Breaking News

కోవిషీల్డ్ టీకా: 12-16 వారాల్లో రెండో డోస్.. గర్బిణీలకు సురక్షితమే


టీకా రెండు డోస్‌ల మధ్య వ్యవధి మరింత పెంచాలని ప్రభుత్వానికి ఉన్నతస్థాయి నిపుణుల బృందం సిఫార్సు చేసింది. ప్రస్తుతం తొలి డోస్ తీసుకున్న తర్వాత 6 నుంచి 8 వారాలు విరామం పాటిస్తుండగా.. ఇకపై 12 నుంచి 16 వారాలకు పెంచాలని జాతీయ వ్యాధినిరోధక సాంకేతిక సలహా బృందం సూచించింది. కొవాగ్జిన్‌ వ్యవధిలో మాత్రం మాత్రం ఎటువంటి మార్పులను సూచించలేదు. అంతేకాదు, గర్బిణీలు కూడా టీకా వేసుకోవచ్చని , ప్రసవం తర్వాత బాలింతలు కూడా ఎప్పుడైనా వ్యాక్సిన్ తీసుకోవచ్చని తెలిపింది. అంతేకాదు, కరోనా నుంచి కోలుకున్నవారు ఆరు నెలల తర్వాత టీకా వేయించుకోవాలని సూచించింది. ఈ సిఫార్సులు ఆమోదానికి ముందు వ్యాక్సినేషన్ ప్రక్రియను పర్యవేక్షించే జాతీయ నిపుణుల బృందానికి పంపనున్నారు. కోవిషీల్డ్ వ్యాక్సిన్ విరామంపై మూడు నెలల్లో సిఫార్సు చేయడం ఇది రెండో సారి. తొలిసారిగా మార్చిలో 28 రోజుల నుంచి 6-8 వారాలకు పెంచడం వల్ల సత్ఫలితాలు ఉంటాయని రాష్ట్రాలు, కేంద్రపాలిత ప్రాంతాలను కేంద్రం ఆదేశించింది. ఆస్ట్రాజెన్‌కా-ఆక్స్‌ఫర్డ్ టీకాను పుణేకు చెందిన సీరమ్ ఇన్‌స్టిట్యూట్ కోవిషీల్డ్ పేరుతో ఉత్పత్తి చేసి, సరఫరా చేస్తోంది. అయితే, దేశంలో వ్యాక్సిన్ కొరత తీవ్రంగా ఉండటంతో డోస్‌ల మధ్య వ్యవధిని పెంచుతూ మార్పులు చేశారు. దేశంలో కరోనా రెండో దశ వ్యాప్తి విజృంభిస్తోంది. వరుసగా 21 రోజుల నుంచి దేశంలో రోజూ మూడు లక్షలకుపైగా కేసులు నమోదవుతున్నాయి. మహమ్మారి విరుచుకుపడటంతో దేశంలో ఆరోగ్య వ్యవస్థలు కుప్పకూలిపోయే స్థితికి చేరుకుంది. దీంతో దేశంలో వ్యాక్సిన్‌కు డిమాండ్ భారీగా ఏర్పడింది. జనవరి 16న దేశంలో వ్యాక్సినేషన్ ప్రక్రియ ప్రారంభం కాగా.. ఇప్పటి వరకూ 17.5 కోట్ల డోస్‌లు వేశారు. కానీ, దేశ జనాభాలో ఇది 2.5 శాతం కంటే తక్కువే. డిమాండ్‌కు తగ్గట్టు ఉత్పత్తి చేయడంలో భారత్ బయోటెక్, సీరమ్ సంస్థలు ఇబ్బందులు పడుతున్నాయి. మహారాష్ట్ర, ఢిల్లీ, కేరళ, కర్ణాటక సహా అన్ని రాష్ట్రాల్లోనూ వ్యాక్సిన్ కొరత వేధిస్తోంది. సీరమ్, భారత్ బయోటెక్‌లు వచ్చే నాలుగు నెలలకు తమ టీకా ఉత్పత్తి ప్రణాళికలను కేంద్రానికి సమర్పించాయి. ఆగస్టు నాటికి సీరమ్ 10 కోట్లు, భారత్ బయోటెక్ 7.8 కోట్ల డోస్‌లను ఉత్పత్తి చేయనున్నట్టు బుధవారం తెలిపాయి.


By May 13, 2021 at 12:06PM


Read More https://telugu.samayam.com/latest-news/india-news/12-16-week-gap-between-covishield-doses-recommended-by-nitag/articleshow/82598326.cms

No comments