మూడోసారి సీఎంగా మమత బెనర్జీ ప్రమాణ స్వీకారం.. హాజరైన గంగూలీ

మరోసారి ముఖ్యమంత్రిగా మమతా బెనర్జీ ప్రమాణ స్వీకారం చేశారు. రాజ్‌భవన్‌లో ఆమెతో గవర్నర్ ప్రమాణ స్వీకారం చేయించారు. ఈ సందర్భంగా బెంగాలీ భాషలో మమత సీఎంగా ప్రమాణ స్వీకారం చేశారు. కరోనా కారణంగా అతి తక్కువమంది అతిథులకే ఈ కార్యక్రమానికి ఆహ్వానించారు. కోవిడ్ వ్యాప్తి కారణంగా మమత ప్రమాణ స్వీకారినికి మొత్తం 67 మంది అతిథులకు మాత్రమే ఆహ్వానించారు. బీసీసీఐ అధ్యక్షుడు సౌరభ్ గంగూలీ మమతా బెనర్జీ ప్రమాణ స్వీకార వేడుకకు హాజరు కావడం విశేషం. ఇటీవల జరిగిన బెంగాల్లో ఎన్నికల్లో మమతా బెనర్జీ నాయకత్వంలోని తృణమూల్ కాంగ్రెస్ ఘన విజయం సాధించిన సంగతి తెలిసిందే. 213 సీట్లను గెలుచుకున్న టీఎంసీ హ్యాట్రిక్ నమోదు చేసింది. భారీ అంచనాల నడుమ బరిలోకి దిగిన బీజేపీ 77 స్థానాలకే పరిమితమైంది. తృణమూల్ తిరుగులేని మెజార్టీ సాధించినప్పటికీ.. మమతా బెనర్జీ మాత్రం నందిగ్రామ్ నుంచి పోటీ చేసి ఓడిపోయారు. ఎన్నికల ముందు టీఎంసీ నుంచి బీజేపీలోకి చేరిన తన మాజీ అనుచరుడు సువేందు అధికారిపై పోటీకి దిగిన ఆమె.. గట్టి పోటీ ఇచ్చినప్పటికీ ఓటమిపాలయ్యారు. సీఎంగా ప్రమాణం చేసిన దీదీ ఆరు నెలల్లోగా చట్టసభలోకి అడుగుపెట్టాల్సి ఉంటుంది. 2011 మే 20న మమత బెంగాల్ సీఎంగా ప్రమాణ స్వీకారం చేశారు. అప్పటి నుంచి ఆమెనే సీఎంగా కొనసాగుతున్నారు. తాజాగా జరిగిన ఎన్నికల్లో మరోసారి విజయ బావుటా ఎగురవేసిన మమత ముచ్చటగా మూడోసారి బెంగాల్ సీఎంగా బాధ్యతలు చేపట్టారు. 1955 జనవరి 5న మమత దిగువ మధ్యతరగతిలో జన్మించారు. కలకత్తా యూనివర్శిటీలో ఎంఏ చదివారు. 1970 దశకంలో రాజకీయాల్లోకి ప్రవేశించారు. 1976-80 వరకు రాష్ట్ర మహిళా కాంగ్రెస్ జనరల్ సెక్రటరీగా పనిచేశారు. మాజీ ప్రధాని మన్మోహన్ సింగ్ కేబినెట్‌లో మమత రైల్వే మంత్రిగా కూడా బాధ్యతలు చేపట్టారు. 1984లో కమ్యూనిస్టు దిగ్గజ నేత సోమనాథ్ ఛటర్జీని ఓడించిన దీదీ.. అత్యంత పిన్నవస్కురాలైన భారతీయ పార్లమెంటేరియన్‌గా గుర్తింపు పొందారు. 1991లో పీవీ కేబినెట్లో మంత్రిగా పని చేశారు. 1997లో కాంగ్రెస్‌ను వీడిన మమతా బెనర్జీ.. ముకుల్ రాయ్‌తో కలిసి ఆల్ ఇండియా తృణమూల్ కాంగ్రెస్‌ను స్థాపించారు. సింగూరు, నందిగ్రామ్ ఉద్యమాల ద్వారా ఆమె బలమైన నాయకురాలిగా ఎదిగారు. 2011 బెంగాల్ ఎన్నికల్లో 184 సీట్లు గెలుచుకున్న టీఎంసీ.. సుదీర్ఘ కమ్యూనిస్టు పాలనకు తెరదించింది. 2016 ఎన్నికల్లో టీఎంసీ 211 సీట్లు గెలుపొందింది. బీజేపీ సర్వశక్తులూ ఒడ్డినప్పటికీ.. గత రెండు పర్యాయాల కంటే ఈసారి మమతా బెనర్జీ పార్టీకి ఎక్కువ సీట్లు రావడం విశేషం.

By May 05, 2021 at 11:15AM

Read More https://telugu.samayam.com/latest-news/india-news/mamata-banerjee-take-oath-as-the-chief-minister-of-west-bengal/articleshow/82400023.cms