నేటితో ముగియనున్న రంజాన్ ఉపవాసాలు.. భారత్‌లో రేపే ఈద్
రంజాన్ నెల ఉపవాస దీక్షలు గురువారంతో ముగియనున్నాయి. బుధవారం నెలవంక దర్శనమివ్వకపోవడంతో గురువారం ఉపవాసదీక్షను కొనసాగిస్తున్నారు. ఈదుల్ ఫితుర్‌ను శుక్రవారం జరుపుకోవాలని రువాయత్-ఎ- హిలాల్ కమిటీ, ఢిల్లీలోని జామా మసీదు ఇమామ్‌తో పాటు పలువురు మత పెద్దలు ప్రకటించారు. గల్ఫ్ దేశాల్లో రంజాన్ పండుగను గురువారం జరుపుకుంటున్నారు. గత నెల రోజులుగా ముస్లిం సోదరులు కొనసాగిస్తున్న ఉపవాస దీక్షలు నేటితో ముగియనున్నాయి. గురువారం సాయంత్రం నెలవంక దర్శనం ఇవ్వనుంది. ఈద్-ఉల్-ఫితర్ వేడుకలు భారత్‌ సహా ప్రపంచవ్యాప్తంగా మెజార్టీ దేశాల్లో శుక్రవారం జరగనున్నాయి. ఒక్క గల్ఫ్ దేశాల్లో మాత్రం గురువారం ఈద్ నిర్వహిస్తున్నారు. దేశంలో కరోనావైరస్ విజృంభణ కొనసాగుతోంది. రోజూ లక్షలాదిగా కేసులు, వేలాది మరణాలు నమోదవుతున్నాయి. ఈ నేపథ్యంలో ఈద్ వేడుకలను ఇళ్లల్లోనే జరుపుకోవాలని మతపెద్దలు, పలువురు ముస్లిం నాయకులు పిలుపునిచ్చారు. సామూహిక ప్రార్థనల వల్ల కరోనా వ్యాప్తి పెరుగుతుందని ఎవరి ఇళ్లల్లో వారే చేసుకోవాలని పేర్కొంటున్నారు. అంతేకాదు, బహిరంగ ప్రదేశాల్లో కూడా ప్రార్థనలు నిర్వహించవద్దని పలు రాష్ట్ర ప్రభుత్వాలు కూడా ఉత్తర్వులు జారీ చేశాయి. ముస్లిం సోదరులకు ఎంతో పవిత్రమైంది రంజాన్ మాసం. ఈ మాసంలో ఉపవాస దీక్షలు, ప్రార్థనలతో ముస్లింలు గడపుతారు. ఇస్లాంను ఆచరించే ప్రతి వ్యక్తి కామ, క్రోధం, అహంకారం, అహింసా వంటి దుర్గుణాలను వదిలేసి భగవంతుడి నామ స్మరణం చేస్తూ శాంతి, సహనంతో జీవితం సాగించాలని పవిత్ర ఖురాన్‌లో లిఖించారు. ఇటువంటి పవిత్ర జీవనాన్ని సాగించి, ఆధ్యాత్మిక చింతన రగిల్చేందుకు ఏడాదికి ఒక సారి రంజాన్ నెలలో కఠిన నింబంధనలతో కూడిన ఉపవాసదీక్షను పాటిస్తారు. పవిత్ర ఉపవాసాలతో గడిపే రంజాన్ నెలకు ముగింపు రోజు ఈద్. ముస్లింలు ఉపవాసం ఉండడానికి వీల్లేని షవ్వల్ మాసంలో మొదటి, ఏకైక రోజు. 30 రోజుల పాటు ఉదయం నుంచి సాయంత్రం వరకూ ఉపవాసాలతో గడిపే రంజాన్ నెల ముగింపుగా దీన్ని జరుపుకుంటారు. దాంతో ఈద్ షవ్వల్ మాసం తొలిరోజు అవుతుంది. చాంద్రమాన ప్రకారం హిజ్రీ క్యాలెండర్ తేదీలు స్థానికంగా చంద్రోదయంపై ఆధారపడి ఉంటాయి. స్థానిక మతాధిపతులు నెలవంక కనిపించడంపై ఈ పండుగను ప్రకటిస్తారు. దాంతో ఈద్-ఉల్-ఫితర్ ప్రాంతాలవారీగా వేర్వేరు రోజుల్లో జరుపుకుంటారు.
By May 13, 2021 at 01:11PM
No comments