గూగుల్ తల్లిని నమ్ముకుని వధువు చెంతకు.. వరుడికి ఊహించని అనుభవం!
అధునాతన సాంకేతిక పరిజ్ఞానం అందుబాటులోకి రావడంతో ప్రపంచంలోని ఏ మూరమూల ప్రాంతానికైనా సులభంగా చేరుకోగలుగుతున్నాయి. అయితే, పూర్తిగా సాంకేతికతపైనే ఆధారపడితే కొన్నిసార్లు ఊహించని అనుభవాలు ఎదురవుతుంటాయి. గూగుల్ మ్యాప్ను నమ్ముకుని వెళ్లి కొన్నిసార్లు వేరే మార్గం చూపించడంతో చిక్కుల్లో పడిన ఘటనలు తరుచూ జరుగుతుంటాయి. తాజాగా, ఓ వరుడు గూగుల్ మ్యాప్ను నమ్ముకుని వధువు ఇంటికి వెళ్లబోయి మరో ఇంటికి వెళ్లాడు. అయితే, తాను వెళ్లింది వధువు ఇంటికి కాదని చివరి నిమిషం వరకూ గుర్తించలేకపోయాడు. సోషల్ మీడియాలో వైరల్ అవుతున్న ఈ ఘటన ఇండోనేషియాలో చోటుచేసుకుంది. సెంట్రల్‌ జావా పాకీస్ జిల్లా లొసారి హామ్లెట్‌లో వధువు ఇంటికి బయలుదేరిన వరుడు, అతడి బంధువులు గూగుల్ మ్యాప్ను నమ్ముకున్నారు. కానీ, వారు వెళ్లాల్సిన ఊరికి కాకుండా అక్కడికి సమీపంలోనే ఉన్న జెంగ్‌కోల్‌ హామ్లెట్‌ అనే మరో గ్రామానికి చేరుకున్నారు. అక్కడా ఓ పెళ్లిమండపం, సందడిగా ఉండటంతో తాను వివాహం చేసుకోబోయే వధువు ఇల్లు అదేనని భావించి సరాసరి అందులోకి వెళ్లారు. వాస్తవానికి అక్కడ మారియా ఉల్ఫా అనే అమ్మాయికి బుర్హాన్ సిద్ధిఖీతో అనే యువకుడితో నిశ్చితార్థం జరగాల్సి ఉండగా అందుకు ఏర్పాట్లు చేశారు. వారంతా బుర్హాన్ బంధువుల కోసం ఎదురు చూస్తుండగా.. ‘‘గూగుల్ బృందం’’ వచ్చేసింది. కాసేపు అంతా సవ్యంగానే సాగిపోయింది. వారు వచ్చే సమయానికి అలంకరణలో బిజీగా ఉన్న మారియా.. కొద్దిసేపటి తర్వాత గదిలో నుంచి బయటకు వచ్చింది. అయితే ఏకంగా పెళ్లిదుస్తులు, సరంజామాతో రావడంతో వాళ్లు బుర్హాన్ బంధువులు కాదని గుర్తించింది. వాళ్లు తన కోసం వచ్చిన వారు కాదని చెప్పడంతో అంతా అవాక్కయ్యారు. వరుడు బృందం కూడా తాము మరోచోటకు వచ్చినట్టు గుర్తించారు. అక్కడి నుంచి బయలుదేరి అసలు మండపానికి చేరుకున్నారు. స్థానిక మీడియా ప్రకారం.. మారియా ఉల్ఫాకు కాబోయే భర్త బుర్హాన్, అతడి కుటుంబసభ్యులు మార్గమధ్యలో టాయ్‌లెట్ కోసం ఆగడం.. ఇదే సమయంలో వరుడి బృందం అక్కడకు చేరుకుంది. మండపానికి వచ్చినవారిలో ఎవరూ తనకు తెలియకపోవడంతో షాక్‌కు గురైనట్టు మారియా తెలిపింది. సిద్ధిఖీ కెండాల్ నుంచి, అతడి కుటుంబం పెమాలాంగ్ అనే ప్రాంతం నుంచి బయలుదేరడంతోనే ఈ గందరగోళం నెలకుందని మారియా బంధువు ఒకరు గుర్తించారు. తర్వాత తప్పును తెలుసుకున్న వరుడి బృందం క్షమాపణ కోరి అక్కడ నుంచి వెళ్లిపోయారు.
By April 11, 2021 at 12:06PM
No comments