Breaking News

పొరపాటు కాదు.. బీజేపీ ఎన్నికల దూరదృష్టి: వడ్డీ రేట్లపై కాంగ్రెస్ ఎదురుదాడి


చిన్న మొత్తాల పొదుపు పథకాలపై వడ్డీ రేట్లను భారీగా తగ్గిస్తూ, కేంద్రం బుధవారం డుదల చేసిన ప్రకటనపై విమర్శలు వెల్లువెత్తడంతో వెనక్కు తగ్గిన విషయం తెలిసిందే. వడ్డీ రేటు నిర్ణయాన్ని వెనక్కు తీసుకుంటున్నట్టు కేంద్ర ఆర్ధిక మంత్రి గురువారం ఉదయం వెల్లడించారు. అయితే, కొన్ని గంటల వ్యవధిలోనే చిన్న మొత్తాల పొదుపు పథకాల వడ్డీ రేటు విషయంలో కేంద్రం వెనకడుగు వేయడంపై వ్యంగ్యాస్త్రాలు సంధించింది. కోట్లాది మందిపై ప్రభావం చూపే నిర్ణయాల విషయంలో పొరపాటు ఎలా జరిగిందని కాంగ్రెస్ నేతలు ప్రశ్నించారు. చిన్న మొత్తాల పొదుపు పథకాలపై వడ్డీ రేటు తగ్గిస్తున్నట్టు చేసిన ప్రకటన అనుకోకుండా జరిగింది కాదని కాంగ్రెస్ సీనియర్ నేత, కేంద్ర మాజీ మంత్రి చిదంబరం విమర్శించారు. ‘చిన్న మొత్తాల పొదుపు పథకాలపై వడ్డీ రేట్లపై ప్రకటన నిరంతర ప్రక్రియ.. ఇందులో భాగంగా మార్చి 31న విడుదల చేసిన ప్రకటన పొరపాటుగా జరగలేదు.. వడ్డీ రేట్లు తగ్గింపుతో మరోసారి మధ్యతరగతిపై దాడిచేయాలని బీజేపీ ప్రభుత్వం నిర్ణయించుకుంది’ అని చిదంబరం ట్వీట్ చేశారు. ‘తప్పుచేసి అడ్డంగా దొరికిపోవడంతో తెలియకుండా జరిగిన తప్పిదం అంటూ కప్పిపుచ్చుకునే ప్రయత్నం చేశారు.. ద్రవ్యోల్బణం 6 శాతం ఉంది, మరింత పెరుగుతుందని అంచనా వేసినప్పుడు... బీజేపీ ప్రభుత్వం మధ్యతరగతి ప్రజల పొదుపు పథకాలపై 6 శాతం వడ్డీని ఇవ్వాలని నిర్ణయించడం హాస్యాస్పదం’ ఆయన అన్నారు. ఆర్థిక మంత్రి నిర్మలా సీతారామన్‌కు ఆ పదవిలో కొనసాగే నైతికత లేదని ప్రియాంకా గాంధీ వాద్రా మండిపడ్డారు. తొలుత ఉత్తర్వులను జారీ చేసి, ఆపై పొరపాటు జరిగిందని దిద్దుబాటు చర్యగా నిర్ణయాన్ని వెనక్కు తీసుకుంటున్నామని, పాత వడ్డీ రేట్టు కొనసాగుతాయని నిర్మలా సీతారామన్ ప్రకటించిన విషయాన్ని ప్రియాంక గుర్తు చేశారు. దీని వెనుక బీజేపీ ఎన్నికల దూరదృష్టి దాగుందని, ఇది ఓ గిమ్మిక్కని ఆమె ఆరోపించారు. కాంగ్రెస్ అధికార ప్రతినిధి రణదీప్ సుర్జేవాలా సైతం బీజేపీపై విమర్శలు గుప్పించారు. ఆర్థిక మంత్రి ఏమైనా సర్కస్ నడుపుతున్నారా? అని ఆయన ప్రశ్నించారు. కేంద్రంలో సర్కారు ఉన్నట్టు కనిపించడం లేదని, ఇటువంటి ఆదేశాల్లో పొరపాటు ఎలా జరుగుతుందని ఆగ్రహం వ్యక్తం చేశారు. దీనికి ఎవరు బాధ్యత తీసుకుంటారని, ఆర్ధిక మంత్రి నిర్మలా సీతారామన్ వెంటనే రాజీనామా చేయాలని డిమాండ్ చేశారు.


By April 01, 2021 at 02:03PM


Read More https://telugu.samayam.com/latest-news/india-news/congress-targets-finance-minister-nirmala-for-flip-flop-over-interest-rates-on-small-saving-schemes/articleshow/81827872.cms

No comments