మరో వివాదంలో అమెజాన్.. అలా ప్రశ్నించారని ఉద్యోగం నుంచి పీకేసింది!
ఈ-కామర్స్ దిగ్గజం అమెజాన్ తన ఉద్యోగుల పట్ల ఎంత నిర్లక్ష్యం ప్రదర్శిస్తుందో తెలియజేసే మరో ఉదంతం వెలుగులోకి వచ్చింది. కరోనా మహమ్మారి సమయంలో మెరుగైన సౌకర్యాలు కల్పించాలని వాదించిన ఇద్దరు ఉద్యోగులను చట్టవిరుద్ధంగా తొలగించినట్టు అమెరికా నేషనల్ లేబర్ రిలేషన్స్ బోర్డు గుర్తించింది. పని ప్రదేశంలో మెరుగైన పరిస్థితులు కల్పించాలని గతేడాది ఎమిలీ కన్నింగ్హమ్, మారెన్ కోస్టా అనే ఇద్దరి ఉద్యోగులు యజమాన్యాన్ని కోరారు. దీనికి తీవ్ర ఆగ్రహం చెందిన ఆ సంస్థ.. ఇద్దర్నీ ఉద్యోగం నుంచి తప్పించింది. దీంతో గతేడాది అక్టోబరులో బాధితులు లేబర్ కోర్టును ఆశ్రయించారు. వివక్షతతో కూడిన విధానాలను అమలు చేస్తుందని, ఉద్యోగులు తమ హక్కులను పొందకుండా నిరోధించడం వంటి అస్పష్టమైన నియమాలను అవలంభిస్తోందని ఆరోపించారు. దీనిపై విచారణ చేపట్టిన లేబర్ బోర్డు.. ఈ సమస్యను పరిష్కరించాలని, అలాకాని పక్షంలో సీటెల్‌లోని రీజినల్ డైరెక్టర్ కార్యాలయానికి ఫిర్యాదుచేస్తామని అమెజాన్‌ను హెచ్చరించింది. తమ సంస్థలో ఉద్యోగ సంఘాల ఏర్పాటును తీవ్రంగా వ్యతిరేకించడంతో విమర్శలు ఎదుర్కొంటున్న అమెజాన్‌కు.. తాజా ఆదేశాలు మరింత ఇబ్బందికరంగా మారాయి. బెస్మేర్, అలబామా కేంద్రంలో ఉద్యోగులు యూనియన్ ఏర్పాటుకు ప్రయత్నిస్తున్న విషయం తెలిసిందే. కోవిడ్ నుంచి రక్షణకు చేపట్టిన నిబంధనలు, పని ప్రదేశంలో వాతావరణంపై కన్నింగ్హమ్, కోస్టాలు బాహటంగానే అమెజాన్‌ను నిలదీశారు. ఇద్దరు ఉద్యోగులూ సంస్థలోని లోపాలను ఎత్తిచూపిన తర్వాత అమెజాన్ వారిని తొలగించింది. పని ప్రదేశంలో పరిస్థితులపై విమర్శించే హక్కులు ఉద్యోగులకు ఉంది కానీ, అలా చేయడం చట్టబద్ధ నియమాలను ఉల్లంఘించేవారి పట్ల ఉపేక్షించదని తాజాగా ఓ ప్రకటనలో పేర్కొంది. సంస్థలో వాతావరణం, భదత్ర, మనుగడ గురించి బహిరంగా మాట్లాడినందుకు వీరిని తొలగించలేదని, తరుచూ అంతర్గ నియమావళిని అతిక్రమించారని తెలిపింది. దీనిపై కన్నింగ్హమ్, కోస్టా ఇంకా స్పందించలేదు. అయితే, లేబర్ కోర్టులో ఫిర్యాదుచేయడానికి వీరికి సహకరించిన యూఎఫ్‌సీడబ్ల్యూ అనే సంస్థ అంతర్జాతీయ అధ్యక్షుడు మార్క్ పెర్రోన్ మాట్లాడుతూ.. ‘ఈ రోజు అమెజాన్ తన స్వంత కార్మికుల నోళ్లు నొక్కేయడానికి చట్టాన్ని ఉల్లంఘిస్తున్నామని గుర్తుచేసింది’ అని వ్యాఖ్యానించారు. కాగా, వాటర్ బాటిళ్లలోనే మూత్రం పోస్తున్న విషయంపై ఆ సంస్థ రెండు రోజుల కిందట క్షమాపణలు చెప్పిన విషయం తెలిసిందే.
By April 06, 2021 at 09:51AM
No comments