విమానంలో ప్రయాణికుడు వీరంగం.. బట్టలు విప్పేసి నగ్నంగా హల్చల్!
ఓ ప్రయాణికుడు విమానం గాల్లో ఉన్న సమయంలో సిబ్బందితో అసభ్యంగా ప్రవర్తించడమే కాదు, తన ఒంటిపై ఉన్న దుస్తులను విప్పేసి నానా హంగామా సృష్టించాడు. ఈ అవాంఛనీయ ఘటన బెంగళూరు నుంచి ఢిల్లీ వెళ్తున్న ఎయిర్ ఏషియా విమానంలో రెండు రోజుల కిందట చోటుచేసుకుంది. ఏప్రిల్‌ 6న ఐ5-722 విమానంలో మద్యం మత్తులో ఉన్న ఓ ప్రయాణికుడు బట్టలు విప్పేసి, సిబ్బందితో అమర్యాదగా ప్రవర్తించి హల్చల్ చేశాడు. తొలుత లైఫ్‌ జాకెట్ల గురించి వాదనకు దిగిన ప్రయాణికుడు అనంతరం సిబ్బందితో అసభ్యంగా ప్రవర్తించాడు. తర్వాత అకస్మాత్తుగా తన ఒంటిపై బట్టల్ని పూర్తిగా విప్పేయడంతో తోటి ప్రయాణికులు విస్తుపోయారు. ఈ ఘటనను ఎయిర్ ఏషియా ధ్రువీకరించింది. ఆ సంస్థ అధికార ప్రతినిధి మాట్లాడుతూ.. మద్యం మత్తులో ఉన్న ప్రయాణికుడు తమ సిబ్బంది పట్ల అనుచితంగా ప్రవర్తించాడని తెలిపారు. తోటి ప్రయాణికులు, సిబ్బంది పదేపదే విజ్ఞప్తి చేయడంతో చివరకు కూర్చున్నాడని చెప్పారు. అనంతరం అవాంఛనీయ ఘటన గురించి పైలట్లకు సమాచారం ఇవ్వడంతో వారు ఢిల్లీలోని ఏటీసీకి దీనిని చేరవేశారన్నారు. ఏటీసీకి సమాచారం అందించి, త్వరగా ల్యాండింగ్‌కు అనుమతించాలని కోరారు. విమానం ఢిల్లీకి చేరుకోగానే అతడిని సీఐఎస్‌ఎఫ్‌ సిబ్బందికి అప్పగించారు. ఈ ఘటనపై ఢిల్లీ ఎయిర్ పోర్టు పోలీసులకు ఫిర్యాదు చేసి, తగిన చర్యలు తీసుకోవాలని కోరినట్టు ఎయిర్‌లైన్స్‌ అధికారులు తెలిపారు. నిందితుడిపై ఢిల్లీ పోలీసులు కేసు నమోదు చేశారు. విమానం, ప్రయాణికులు భద్రత, క్షేమానికి సంబంధించిన నిబంధనలను అతడు ఉల్లంఘించినట్టు పేర్కొన్నారు. అతడిని ప్రయాణ నిషేధిత వ్యక్తుల జాబితాలో మాత్రం ఎయిర్ ఏషియా చేర్చలేదు.
By April 09, 2021 at 08:57AM
No comments