ఫెడెక్స్ కాల్పుల్లో నలుగురు భారతీ అమెరికన్లు మృతి
ఇండియానా‌పోలిస్‌ అంతర్జాతీయ విమానాశ్రయం సమీపంలోని ఫెడెక్స్ ఫెసిలిటీ కేంద్రం వద్ద గురువారం జరిగిన కాల్పుల్లో ఎనిమిది మంది మృతిచెందిన విషయం తెలిసిందే. ఈ మృతుల్లో నలుగురు భారతీయ అమెరికన్లు ఉన్నట్లు ఇండియానాపోలీస్ పోలీసులు వెల్లడించారు. దుండగుడు జరిపిన కాల్పుల్లో నలుగురు సిక్కులు ప్రాణాలు కోల్పోయినట్టు అధికారులు తెలిపారు. వీరిని అమర్జీత్ జోహల్ (66), జస్వీందర్ కౌర్ (64), జస్వీందర్ సింగ్ (68), అమర్జీత్ స్కోహన్(48)గా గుర్తించారు. అమెరికా కాలమానం ప్రకారం గురువారం రాత్రి 11 గంటల ప్రాంతంలో ఫెడెక్స్ మాజీ ఉద్యోగి ఈ ఘాతుకానికి ఒడిగట్టాడు. బ్రాడన్ స్కాట్ హోల్ (19) అనే యువకుడు ఫెడెక్స్ కొరియర్‌ సంస్థలోకి చోరబడి విచక్షణ రహితంగా కాల్పులు జరిపాడు. ఈ మారణకాండలో 8 మంది అక్కడికక్కడే చనిపోగా, మరో ఐదుగురు గాయపడ్డారు. గాయపడిన వారిలో భారతీయ యువతి ఉన్నారు. ఆమె కారులో కూర్చొని ఉండగా ఆగంతకుడు కాల్పుల జరపడంతో భుజంలోకి బుల్లెట్ దూసుకెళ్లింది. ఈ ఘటనలో హర్‌ప్రీత్ గిల్ అనే భారతీయ సంతతి అమెరికన్‌ కూడా గాయపడ్డారు. ‘‘ఫెడెక్స్ వద్ద కాల్పులు జరుగుతున్న విషయం గ్రహించిన హర్‌ప్రీత్.. బయటకు పరుగెత్తాడు.. ఆ సమయంలో ఒక బుల్లెట్ వచ్చి అతడి తలకు తాకింది. ప్రస్తుతం అతడికి ఆపరేషన్ జరిగింది.. బుల్లెట్ కంటికి రెండున్నర అంగుళాలు దగ్గరగా ఉంది.. దానిని ఇంకా బయటకు తీయలేదు’ అని అతడి బావమరిది కుష్వాన్ బజ్వా తెలిపారు. ఈ ఘటన అనంతరం తనను తాను కాల్చుకుని దుండగుడు ఆత్మహత్య చేసుకున్నట్టు పోలీసులు భావిస్తున్నారు. గత నాలుగు నెలల వ్యవధిలో ఇండియానా రాష్ట్రంలో చోటుచేసుకున్న మూడో ఘటన ఇది. ఫెడెక్స్ సంస్థలో పనిచేసేవారిలో 90 శాతం మంది భారతీయ అమెరికన్లు ఉండగా, వీరిలో ఎక్కువ శాతం మంది సిక్కు కమ్యూనిటీకి చెందిన వారు ఉన్నట్లు తెలుస్తోంది. కాల్పుల ఘటనపై అమెరికా అధ్యక్షుడు జో బైడెన్ తీవ్ర విచారం వ్యక్తం చేశారు. మృతులకు తన సంతాపం తెలిపారు. మృతుల కుటుంబాలకు బైడెన్, ఉపాధ్యక్షురాలు కమలా హ్యారిస్ ప్రగాఢ సానుభూతి తెలియజేశారు. ఈ ఘటనపై భారత విదేశాంగ మంత్రి జైశంకర్ దిగ్భ్రాంతి వ్యక్తం చేశారు. చికాగాలోని భారత కాన్సులేట్ జనరల్.. సిక్కు నేతలు, స్థానిక అధికారులతో సంప్రదింపులు జరపుతున్నారని మంత్రి తెలిపారు. బాధితులను అన్ని విధాలుగా ఆదుకుంటామని ఆయన హామీ ఇచ్చారు.
By April 17, 2021 at 11:21AM
No comments