Breaking News

నచ్చిన మతాన్ని ఎందుకు ఎంచుకోకూడదు? మతమార్పిడి పిల్‌పై సుప్రీం ఆగ్రహం


తమకు నచ్చిన మతాన్ని ఎంచుకునే స్వేచ్ఛ ప్రజలకుందని, ఈ హక్కును రాజ్యాంగం కల్పించిందని మరోసారి స్పష్టం చేసింది. మతమార్పిడులను నిరోధించేలా ఆదేశాలు జారీచేయాలని కోరుతూ దాఖలైన పిల్‌‌పై విచారణ సందర్భంగా సర్వోన్నత న్యాయస్థానంపై విధంగా స్పందించింది. ఈ ప్రజాప్రయోజన వ్యాజ్యం కాదని పబ్లిసిటీ ఇంట్రెస్ట్ లిటిగేషన్‌ అని వ్యాఖ్యానించిన కోర్టు.. పిల్‌ను కొట్టివేసింది. ఈ సందర్భంగా పిటిషనర్‌పై జస్టిస్ ఆర్ఎఫ్ నారిమన్, జస్టిస్ బీఆర్ గవాయ్, జస్టిస్ హృషికేశ్ ముఖర్జీల ధర్మాసనం తీవ్ర ఆగ్రహం వ్యక్తం చేసింది. ‘ఇది ఎటువంటి రిట్ పిటిషన్? 18 ఏళ్లు దాటిన వ్యక్తులు తమకు నచ్చిన మతాన్ని ఎందుకు ఎంచుకోకూడదు? రాజ్యాంగంలో ‘ప్రచారం’ అనే పదం ఉందని మీరు ఎందుకు అనుకుంటున్నారు? దీనిపై నీకు మేము భారీ జరిమానా విధించగలం’ అంటూ పిటిషనర్‌పై మండిపడింది. పిటిషనర్ తరఫున బీజేపీ నేత, సీనియర్ లాయర్ అశ్విసీ ఉపాధ్యాయ్ వాదనలు వినిపించారు. పిటిషన్ విధిని గ్రహించిన న్యాయవాది శంకరనారాయణన్ ఈ అంశంపై ప్రభుత్వానికి, లా కమిషన్‌కు పిటిషనర్ ప్రాతినిధ్యం వహించడానికి అనుమతించాలని ధర్మాసనాన్ని కోరారు. కానీ, ఈ అభ్యర్థనను తిరస్కరించిన ధర్మాసనం.. ఇది పబ్లిసిటీ ఇంట్రెస్ట్ పిటిషన్.. ఇది చాలా ప్రమాదకరమని వ్యాఖ్యానించింది. అంతేకాదు, ‘పిటిషనర్ తరఫున హాజరైన లాయర్ కోర్టును వీడి వెళ్లి, రిట్ పిటిషన్‌ను ఉపసంహరించుకోవాలని న్యాయస్థానం కోరుతోంది.. ఈ పిల్‌ను ఉపసంహరించుకునేలా తిరస్కరించబడింది’ అని ధర్మాసనం ఆదేశించింది. ‘మత దుర్వినియోగం’అంశాన్ని పరిశీలించి, మత మార్పిడి చట్టాన్ని రూపొందించడానికి సాధ్యాసాధ్యాలపై అధ్యయనానికి ఓ కమిటీని ఏర్పాటుచేసేలా ఆదేశించాలని అశ్విని ఉపాధ్యాయ్ కోరారు. ‘ప్రలోభాలు, భయాందోళనకు గురిచేసిన మత మార్పిడికి ప్రోత్సహించడం రాజ్యాంగంలోని ఆర్టికల్స్ 14, 21, 25 ని కించపరచడమే కాక, రాజ్యాంగ ప్రాథమిక నిర్మాణంలో అంతర్భాగమైన లౌకికవాద సూత్రాలకు కూడా విరుద్ధం.. ఆర్టికల్ 51(ఎ) కింద తమ కర్తవ్యం అయినప్పటికీ, మాయలు, మూఢనమ్మకాలు, మోసపూరితంగా జరుగుతున్న మత మార్పిడిని నియంత్రించడంలో కేంద్రం, రాష్ట్రాలు విఫలమయ్యాయి’ అని పిటిషనర్ నిరాశ వ్యక్తం చేశాడు.


By April 10, 2021 at 07:42AM


Read More https://telugu.samayam.com/latest-news/india-news/why-cant-a-person-choose-religion-sc-slams-pil-against-conversion/articleshow/81998836.cms

No comments