నైట్ వాచ్మన్ నుంచి ఐఐఎం ప్రొఫెసర్గా.. కేరళ యువకుడి రంజిత్ సక్సెస్ స్టోరీ
పేదరికం కారణంగా టెలిఫోన్ ఎక్స్చేంజ్ వద్ద నైట్ వాచ్మన్గా పనిచేసిన యువకుడు తర్వాత ఐఐటీలో చదివి, ప్రస్తుతం ఐఐఎంలో అసెస్టింట్ ప్రొఫెసర్గా ఉద్యోగం సంపాదించాడు. కేరళకు చెందిన రంజిత్ రామచంద్రన్ కష్టాలకు కుంగిపోకుండా ఎదురీది ఎందరికో స్ఫూర్తిదాయకంగా నిలిచారు. అసిస్టెంట్ ప్రొఫెసర్గా ఉన్న28 ఏళ్ల యువ ప్రొఫెసర్ ఈ వివరాలను ఫేస్బుక్ పోస్ట్లో పంచుకున్నారు. కూలిపోయే దశలో ఉన్న టార్పాలిన్తో కప్పిన చిన్న గుడిసె ఫొటో పోస్ట్ చేసిన రంజిత్.. ఐఐఎం ప్రొఫెసర్ ఇందులోనే పుట్టాడని తెలిపారు. ఏప్రిల్ 9న చేసిన ఈ పోస్ట్కు ఫేస్బుక్లో 39 వేల లైక్స్... 11 వేల షేర్లు, 7.3 కామెంట్లు వచ్చాయి. కేరళ ఆర్థిక మంత్రి థామస్ ఇసాక్ కూడా రంజిత్కు అభినందనలు తెలిపారు. కాసర్గడ్ జిల్లా పనతుర్లో ఉన్న బీఎస్ఎన్ఎల్ టెలిఫోన్ ఎక్ఛ్సేంజ్లో రంజిత్ నైట్ వాచ్మన్గా పనిచేశారు. ఆ సమయంలో కాసర్గఢ్ పీయూస్ కాలేజీ నుంచి ఎకనమిక్స్లో డిగ్రీ పూర్తి చేశారు. రాత్రిపూట ఉద్యోగం చేస్తూ ఉదయం కాలేజ్కి వెళ్లేవాడినని రంజిత్ వివరించారు. మంచి మార్కులతో గ్రాడ్యుయేషన్లో ఉత్తీర్ణత సాధించిన రంజిత్.. తరువాత ఐఐటీ మద్రాస్లో పీహెచ్డీ సీటు సంపాదించారు. తనకు మలయాళం మాత్రమే తెలియడం, ఆంగ్లంపై పట్టులేకపోవడంతో అక్కడ ఇబ్బందులను ఎదుర్కొన్నారు. చివరికి పీహెచ్డీ కోర్సు మధ్యలోనే వదిలేసి వచ్చేయాలని భావించారు. కానీ గైడ్ డాక్టర్ సుభాష్ సహకారంతో కోర్సు పూర్తి చేశారు. ‘కలలను సాకారం చేసుకోడానికి పోరాటం చేయాలని నిర్ణయించుకుని పీహెచ్డీని గతేడాది పూర్తిచేసి డాక్టరేట్ తీసుకున్నాను.. చివరి రెండు నెలలు బెంగళూరు క్రిస్ట్ యూనివర్సిటీలో అసిస్టెంట్ ప్రొఫెసర్గా పనిచేశాను’అని పేర్కొన్నారు. ఇటీవలే ఐఐఎం రాంచీలో అసిస్టెంట్ ప్రొఫెసర్గా విధుల్లో చేరారు. పేదరికంతో పాఠశాల విద్యను మధ్యలోనే వదిలేశానని, తన తండ్రి టైలర్ కాగా, తల్లి ఉపాధి కూలీ అని ఆ పోస్ట్లో రంజిత్ తెలిపారు. అయితే, తన పోస్ట్కు వచ్చిన స్పందన చూసి రంజిత్ ఆనందం వ్యక్తం చేశాడు. ‘నా పోస్ట్ వైరల్ అవుతుందని అనుకోలేదు.. నా జీవిత కథను కొందరైనా స్ఫూర్తిగా తీసుకుంటారనే ఉద్దేశంతో పోస్ట్ చేశాను.. ప్రతి ఒక్కళ్లూ మంచి లక్ష్యాన్ని పెట్టుకుని తమ కలలను సాధించుకోడానికి పోరాడాలి.. మీ నుంచి ఇతరులు స్ఫూర్తి పొంది విజయం సాధించాలి’ అని అన్నారు. రామచంద్రన్ పోస్ట్పై కేరళ ఆర్ధిక మంత్రి స్పందిస్తూ.. ‘ఒకానొక సమయంలో తాను ఓడిపోయానని భావించిన క్షణంలో జీవితాన్ని మలుపు తిప్పి విజయం సాధించి ప్రతి ఒక్కళ్లకూ ప్రేరణగా నిలిచాడు.. కష్టాలకు ఎదురీది జీవితంలో విజయం సాధించిన కేఆర్ నారాయణ్ వంటి గొప్ప వ్యక్తుల జీవిత కథలు మన ముందు ఉన్నాయి.. అసాధారణ సంకల్ప శక్తితో దేశానికి మొదటి పౌరుడు అయ్యాడు’ అని ఫేస్బుక్లో పోస్ట్ చేశారు.
By April 12, 2021 at 12:22PM
No comments