లంచం తీసుకుంటుండగా సీబీఐ ఎంట్రీ.. 5 లక్షలు రోడ్డుపై పడేసి ఐటీ అధికారి పరుగు!
పన్ను ఎగవేతదారుడి నుంచి ఆదాయపు పన్ను శాఖ అధికారి రూ.5 లక్షలు లంచం తీసుకుంటుండగా అధికారులు సడెన్‌గా ఎంట్రీ ఇచ్చారు. దీంతో తన చేతిలోని డబ్బు బ్యాగును అక్కడే పడేసి ఆ అధికారి పరుగు లంఘించుకున్నాడు. వెంటనే అప్రమత్తమైన అధికారులు అతడిని వెంబడించి కిలోమీటరు దూరం పరుగెత్తి దొరకబుచ్చుకున్నారు. సినీ ఫక్కిలో జరిగిన ఈ ఘటన ముంబయిలోని గోరెగావ్‌లో గురువారం చోటుచేసుకుంది. సీబీఐ అధికారుల కథనం ప్రకారం.. పన్ను ఎగవేతకు పాల్పడిన ఓ లాజిస్టిక్ కంపెనీ యజమానిని ఐటీ దాడుల నుంచి బయట పడేయాలంటే తమకు లంచం ఇవ్వాలని బల్లార్డ్ పీర్ ఆఫీసు ఐటీ ఇన్‌స్పెక్టర్ ఆశిష్ కుమార్, మరో ఇద్దరు అధికారులు వేర్వేరుగా డిమాండ్ చేశారు. ఆ విషయాన్ని బాధితుడు సీబీఐ దృష్టికి తీసుకెళ్లడంతో ముగ్గుర్నీ రెండ్ హ్యాండెడ్‌గా పట్టుకోడానికి పథకం వేశారు. వారు చెప్పినట్టుగా రూ. 5 లక్షలను గురువారం రాత్రి ఐటీ ఇన్‌స్పెక్టర్ ఆశిష్‌‌కు బాధితుడు అందించాడు. ఈ మొత్తాన్ని ఆశిష్ జాగ్రత్తగా బ్యాగులో పెట్టుకోగా.. అప్పటికే కాచుకుని ఉన్న సీబీఐ అధికారులు అతడిని చుట్టుముట్టారు. ఊహించని పరిణామానికి ఖంగుతిన్న ఆశిష్.. తన చేతిలోని బ్యాగును రోడ్డుపై పడేసి పరుగులు తీశాడు. దీంతో సీబీఐ అధికారి వినీత్ జైన్ అతడిని వెంబడించాడు. కిలోమీటరుకుపైగా దూరం పరుగెత్తి ఎట్టకేలకు ఆశిష్‌ను పట్టుకుని కస్టడీలోకి తీసుకున్నాడు. ఇదే వ్యవహారంలో రూ. 10 లక్షలు డిమాండ్ చేసిన మరో ఇద్దరు ఐటీ ఇన్‌స్పెక్టర్లు దిలీప్‌కుమార్, ఎస్ఎన్ రాయ్‌లను కూడా అదుపులోకి తీసుకున్నారు. కేసు నమోదు చేసి దర్యాప్తు చేస్తున్నారు. వీరిని కోర్టు ముందు శుక్రవారం ప్రవేశపెట్టడంతో రిమాండ్ విధించింది. నిందితుల నివాసంలో సోదాలు నిర్వహించిన సీబీఐ.. రూ.7 లక్షల నగదు, కీలక పత్రాలను స్వాధీనం చేసుకుంది. ఇందులో భూముల కొనుగోలు పత్రాలు కూడా ఉన్నట్టు గుర్తిచారు. ఆశిష్ కుమార్, దిలీప్, రాయ్‌లు లాజిస్టిక్ కంపెనీలో ఇటీవల సోదాలు నిర్వహించి, పన్నులు ఎగ్గొట్టినట్టు గుర్తించారు. ఆ సంస్థ యజమానిని ఈ కేసు నుంచి బయటపడేయడానికి లంచం ఆఫర్ చేశారు. ముగ్గూరు వేర్వేరుగా ఒకరికి తెలియకుండా ఇంకొకరు అతడితో బేరాసారాలు సాగించారు. దీంతో సదరు యజమాని సీబీఐకి ఫిర్యాదుచేసి, ముగ్గుర్నీ రెండ్‌హ్యాండెడ్‌గా పట్టించాడు.
By April 10, 2021 at 03:20PM
No comments