Breaking News

రేపటి నుంచే 18 ఏళ్లు నిండినవారికి టీకా.. సాధ్యం కాదంటున్న పలు రాష్ట్రాలు


మే 1 నుంచి 18 ఏళ్లు నిండిన ప్రతి ఒక్కరికీ వ్యాక్సినేషన్ ప్రారంభం కానుంది. అయితే, చాలా రాష్ట్రాలు మాత్రం కుదరదని తెగేసి చెప్పేశాయి. టీకాల కొరత ఉన్నందున 18 ఏళ్లు పూర్తయిన వారికి ఇప్పట్లో వ్యాక్సినేషన్ సాధ్యం కాదని ఆంధ్రప్రదేశ్, తెలంగాణ, మహారాష్ట్ర, పంజాబ్, ఢిల్లీ వంటి రాష్ట్రాలు స్పష్టం చేశాయి. సరిపడేన్ని టీకాలు అందుబాటులోకి వచ్చిన తర్వాతే వీరికి వ్యాక్సిన్ ఇస్తామని, మే 1 నుంచి ఇవ్వలేమని తేల్చిచెప్పాయి. దేశంలో 45 ఏళ్లు దాటిన వారందరికీ వ్యాక్సిన్‌ ఇవ్వాలంటే ఇంకా నాలుగైదు నెలలు పడుతుందని పేర్కొన్నాయి. వ్యాక్సిన్ విధానంపై గురువారం సమీక్ష నిర్వహించిన ఆంధ్రప్రదేశ్ ముఖ్యమంత్రి వైఎస్ జగన్‌మోహన్ రెడ్డి.. 18 ఏళ్లు దాటిన వారందరికీ వ్యాక్సినేషన్‌ ఇప్పట్లో సాధ్యంకాదని వెల్లడించారు. వీరికి పూర్తిగా టీకా వేయాలంటే వచ్చే ఏడాది జనవరి చివరికి సాధ్యమవుతుందని తెలిపారు. కరోనాకు టీకాలు వేయడమే పరిష్కారంగా ఉందని, వచ్చే ఫిబ్రవరి వరకూ అందరం జాగ్రత్తగా ఉండాలని జగన్‌ స్పష్టం చేశారు. దేశంలో 18 ఏళ్లు దాటినవారు 60 కోట్ల మంది ఉన్నారని, వారికి సెప్టెంబరు తర్వాతే వారికి వ్యాక్సినేషన్‌ సాధ్యమన్నారు. మహారాష్ట్ర కూడా ఇదే అభిప్రాయం వ్యక్తం చేస్తోంది. ప్రస్తుతం తమ వద్ద టీకాల స్టాక్ లేదని, దీనిపై తయారీ సంస్థలకు విజ్ఞ‌ప్తి చేశామని ఢిల్లీ ఆరోగ్య మంత్రి సత్యేంద్ర జైన్ వెల్లడించారు. తమకు సరఫరా చేసే డోస్‌లను బట్టి నిర్ణయం తీసుకుంటామని తెలిపారు. తమిళనాడు ప్రభుత్వం ఒకటిన్నర కోట్ల డోస్‌లకు ఆర్డర్ ఇవ్వగా.. మే 1 నుంచి 18 ఏళ్ల పూర్తయినవారికి వ్యాక్సినేషన్ ప్రారంభం కాకపోవచ్చని విశ్వసనీయ వర్గాలు తెలిపాయి. అంతేకాదు, జూన్ వరకు సరఫరా వీలుపడదని ఓ సంస్థ చెప్పినట్టు తెలుస్తోంది. పంజాబ్ కూడా మే 1 ప్రారంభం కాదని తెలపింది. తమ వద్ద కూడా టీకాలు లేనందున మే 15లోపు 18 ఏళ్లు నిండినవారికి టీకాలు వేయడం సాధ్యం కాదని రాజస్థాన్ ప్రకటించింది. అయితే, కేంద్రం మాత్రం మూడో దశ వ్యాక్సినేషన్ ఎన్ని అడ్డుంకులు ఎదురైనా ప్రారంభించాలని భావిస్తోంది. ఇందులో భాగంగా ప్రయివేట్ వ్యాక్సినేషన్ కేంద్రాల వద్ద ఉన్న టీకాలను రేపటిలోగా వెనక్కు ఇవ్వాలని తెలిపింది. ఈ నేపథ్యంలో ప్రయివేట్ కేంద్రాల్లో 18 ఏళ్లు పూర్తయినవారికి టీకాల కోసం మరికొన్ని నెలలు వేచిచూడాల్సిందే. మూడో దశ టీకా పంపిణీకి ఏప్రిల్ 28 నుంచి రిజిస్ట్రేషన్ ప్రారంభం కాగా.. భారీ స్పందన వస్తోంది. ఇప్పటి వరకూ 1.3 కోట్ల మంది రిజిస్ట్రేషన్ చేసుకున్నారు.


By April 30, 2021 at 09:26AM


Read More https://telugu.samayam.com/latest-news/india-news/many-states-not-ready-for-big-18-plus-vaccine-rollout-from-may-1st/articleshow/82321233.cms

No comments