ఉత్తరాఖండ్ సీఎం వ్యాఖ్యలకు.. నిక్కరు వేసుకున్న మోదీ ఫోటోతో ప్రియాంక కౌంటర్!
మహిళలు రిప్పుడ్ జీన్స్ ధరించడంపై ఉత్తరాఖండ్ కొత్త ముఖ్యమంత్రి చేసిన వ్యాఖ్యలపై దుమారం కొనసాగుతోంది. ముఖ్యమంత్రిపై మహిళలు ఓ రేంజ్‌లో విరుచుకుపడుతున్నారు. తాజాగా, ఈ జాబితాలో కాంగ్రెస్ నేత చేరారు. ఆర్ఎస్ఎస్‌లో ఉన్నప్పుడు మోకాళ్ల వరకు ధరించి యూనిఫామ్‌తో ఉన్న ప్రధాని నరేంద్ర మోదీ, కేంద్ర మంత్రి నితిన్ గడ్కరీ ఫోటోలను షేర్ చేసి.. వ్యంగ్యాస్త్రాలు సంధించారు. ‘ఓ మై గాడ్.. వాళ్లు మోకాళ్లు చూపిస్తున్నారు’ అంటూ క్యాప్షన్ పెట్టారు. ప్రియాంక షేర్ చేసిన ఫోటోల్లో ఆర్ఎస్ఎస్ చీఫ్ మోహన్ భగవత్ కూడా ఉన్నారు. #RippedJeans హ్యాష్‌టాగ్‌ ట్విట్టర్‌లో ట్రెండ్ అవుతోంది. వ్యాఖ్యలపై నటి, రాజ్యసభ సభ్యురాలు జయాబచ్చన్ సైతం మండిపడ్డారు. ఇటువంటి ఆలోచనా విధానం మహిళపై నేరాలను ప్రోత్సహించేలా ఉందని దుయ్యబట్టారు. రాష్ట్ర బాలల హక్కుల సంరక్షణ కమిషన్ డెహ్రాడూన్‌లోని మంగళవారం నిర్వహించిన వర్క్‌షాప్‌లో సీఎం తీరత్ సింగ్ రావత్ పాల్గొని ఈ సందర్భంగా మహిళ వస్త్రధారణపై వ్యాఖ్యలు చేశారు. ‘తాను విమానంలో వెళ్తున్నప్పుడు తన ఇద్దరి పిల్లలతో ప్రయాణిస్తోన్న ఒక మహిళ టాన్ జీన్స్ ధరించింది. ఆమె తాను ఓ ఎన్జీఓ నడుపుతున్నానని చెప్పింది... సమాజానికి రోల్ మోడల్‌గా ఉండాల్సిన మహిళ అటువంటి దుస్తులు ధరించడం ఆందోళనకు గురిచేసింది. ఈ రకమైన వస్త్రాలు ధరించిన మహిళ సమాజంలో ప్రజలను కలిసి, వారి సమస్యలను పరిష్కరించడానికి వెళితే మన పిల్లలకు మనం ఎలాంటి సందేశం ఇస్తున్నాం’ అని అన్నారు. అంతేకాదు.. తల్లిదండ్రులను కూడా ఆయన టార్గెట్ చేసి మాట్లాడారు. ఇంట్లో పిల్లలకు ఏం నేర్పుతున్నారు? సమాజానికి ఏం సందేశం ఇస్తున్నారంటూ? వ్యాఖ్యానించారు. మనం ఎలా ప్రవర్తిస్తే.. పిల్లలు కూడా పెద్దయ్యాక అలాగే తయారవుతారని అన్నారు. పాశ్చాత్య పిచ్చిలో మన సంస్కృతిని మరిచిపోతున్నామని వ్యాఖ్యానించారు.
By March 19, 2021 at 04:26PM
No comments