Breaking News

అంబానీ బెదరింపుల కేసులో ట్విస్ట్.. పోలీస్ అధికారి సచిన్ అరెస్ట్


రిలయన్స్‌ ఇండస్ట్రీస్‌ అధినేత ముకేష్‌ ‌అంబానీ ఇంటి సమీపంలో పేలుడు పదార్థాలతో కూడిన వాహనం కేసులో శనివారం కీలక పరిణామాలు చోటుచేసుకున్నాయి. మన్‌సుఖ్ హిరేన్ మృతి కేసులో ముంబయి పోలీసు అధికారి సచిన్‌ వాజేను ఎన్ఐఏ అధికారులు అరెస్టు చేశారు. ఫిబ్రవరి 25న అంబానీ ఇంటి సమీపంలో పేలుడు పదార్థాలతో కూడిన కారు నిలిచి ఉంచడం కలకలం సృష్టించిన సంగతి తెలిసిందే. ఈ కేసులో ఏటీఎస్, ఎన్‌ఐఏ ముమ్మరంగా దర్యాప్తు చేస్తున్నాయి. ఈ నేపథ్యంలో హిరేన్ మృతి వెనుక ముంబయి అసిస్టెంట్‌ పోలీసు ఇన్‌స్పెక్టర్‌ సచిన్‌ వాజే ఉన్నట్లు గుర్తించి అరెస్టు చేశారు. అయనను అదుపులోకి తీసుకున్న అధికారులు 12 గంటల పాటు విచారించారు. అనంతరం అతడిపై పలు ఐపీసీ సెక్షన్లు నమోదు చేసి అరెస్టు చేశారు. అంబానీ నివాసం వద్ద ఉంచిన వాహనంలో జిలెటిన్‌ స్టిక్స్‌ గుర్తించారు. దీంతో ఈ కేసును దర్యాప్తు చేస్తున్న క్రమంలో స్కార్పియో యజమాని మన్‌సుఖ్‌ హిరేన్‌ అనుమానాస్పద స్థితిలో మృతిచెందాడు. అయితే, అంతకు ముందే ఆవాహనం చోరీకి గురైనట్లు హిరేన్ ఫిర్యాదు చేశాడు. హిరేన్ భార్య విమ్లా సైతం తన భర్తది హత్యేనని, ఇందులో పోలీస్ అధికారి సచిన్ వాజే పాత్ర ఉందని ఆరోపించారు. ఇదే సమయంలో ముందస్తు బెయిల్ కోసం వాజే కోర్టును ఆశ్రయించడం దీనికి మరింత బలం చేకూర్చింది. సచిన్ వాజే తమ వాహనాన్ని గత నవంబరు నుంచి ఫిబ్రవరి 19 వరకు వినియోగించినట్టు హిరేన్ భార్య పేర్కొన్నారు. దీనిని పోలీస్ అధికారి దీనిని ఖండించారు. అయితే, హిరేన్ కనిపించకుండాపోయిన రాత్రి వాజే మొబైల్, సీడీఆర్ లొకేషన్ దక్షిణ ముంబయిలో ఉన్నట్టు సాంకేతిక ఆధారాలు లభించాయి.


By March 14, 2021 at 09:52AM


Read More https://telugu.samayam.com/latest-news/india-news/mumbai-police-sachin-waze-arrested-over-alleged-role-in-ambani-security-scare-case/articleshow/81491546.cms

No comments