అంబానీ బెదిరింపు కేసులో ట్విస్ట్.. ఆ సంస్థ హస్తంపై పోలీసులు ఆసక్తికర వ్యాఖ్యలు
దేశీయ వ్యాపార దిగ్గజం ముకేశ్ అంబానీ ఇంటి వద్ద నాలుగు రోజుల కిందట నిలిపి ఉంచిన కారులో పేలుడు పదార్థాలను పోలీసులు గుర్తించిన విషయం తెలిసిందే. ఈ ఘటనపై పోలీసుల దర్యాప్తు కొనసాగుతోంది. ఆగంతుకుడు రాసిన లేఖను కూడా పోలీసులు స్వాధీనం చేసుకున్నారు. ఇదిలా ఉండగా, దీని వెనుక జైష్-ఉల్-హింద్ ఉగ్రవాద సంస్థ హస్తం ఉందని జరుగుతోన్న ప్రచారాన్ని ముంబై పోలీసులు తోసిపుచ్చారు. మీడియాలో వస్తున్న కథనాలను ఖండించారు. ఆ సంస్థ పేరుతో సోషల్ మీడియాలో వైరల్ అవుతున్న లేఖ నకిలీదని స్పష్టం చేశారు. ‘ముకేశ్ అంబానీ బంగ్లా బయట జరిగిన ఘటనకు జైష్-ఉల్-హింద్ ఉగ్రవాద సంస్థకు ఎటువంటి సంబంధం లేదని స్పష్టంగా చెప్పగలం.. అంతేకాదు భారత వ్యాపారవేత్తలకు వ్యతిరేకంగా తమ పోరాటం కాదని ప్రకటించింది’ అని తెలిపారు. అటు, భారత్లో జరుగుతున్న ప్రచారంపై జైష్ ఉల్ హింద్ కూడా స్పందించింది. టెలిగ్రామ్లో తమ పేరుతో వైరల్ అవుతున్న లేఖతో తమకు ఎటువంటి సంబంధం లేదని ప్రకటించింది. మార్ఫింగ్ చేసి తమ సంస్థ పేరుతో నకిలీ పోస్టర్ను రూపొదించారని తెలిపింది. ‘జైష్-ఉల్-హింద్ ఎప్పటికీ భారత వ్యాపారవేత్తలకు వ్యతిరేకంగా పోరాడదు.. కేవలం బీజేపీ, ఆర్ఎస్ఎస్ ఫాసిజానికి వ్యతిరేకంగానే ఉంటుంది..అమాయక ముస్లింలకు వ్యతిరేకంగా మోదీ చేసిన దుశ్చర్యలకు వ్యతిరేకంగా మేము పోరాడుతున్నాం.. న్యాయం కోసమే మా పోరాటం డబ్బు కోసం కాదు.. లౌకికవాద ప్రజాస్వామ్యం కోసమే.. అంబానీకి వ్యతిరేకంగా కాదు’ అని స్పష్టం చేసింది. ఈ ఘటనపై ముంబయి పోలీసులు, ఎన్ఐఏ సంయుక్తంగా దర్యాప్తు చేస్తున్నాయి. అంటిలియా భవంతి సమీపంలోని సీసీటీవీ ఫుటేజ్లను పరిశీలించిన పోలీసులు.. బంగ్లా బయట నిలిపిన స్కారిపియో మహారాష్ట్ర సరిహద్దుల నుంచి వచ్చినట్టు గుర్తించారు. ఈ వాహనం యజమానిని గుర్తించే పనిలో ఉన్నామని పోలీసులు తెలిపారు. కారులో లభించిన లేఖలో ముఖేష్ అంబానీ, నీతాఅంబానీ, కుటుంబానికి ఒక అదృష్టమని, మరోసారి పేలుడు పదార్థాలు మీ వద్దకే వస్తాయంటూ ఆగంతకుడు హెచ్చరించాడని పోలీసులు రెండు రోజుల కిందట వెల్లడించారు. అంతేకాదు, అంబానీ కుటుంబం మొత్తాన్ని అంతం చేయడానికి ఈసారి పూర్తి సన్నద్ధతతో వస్తానని బెదిరించినట్టు తెలిపారు.
By March 01, 2021 at 01:17PM
No comments