Breaking News

హోం మంత్రి అవినీతిపై సీబీఐతో దర్యాప్తు చేయండి.. సుప్రీంలో ముంబయి మాజీ సీపీ పిల్!


ముంబయి మాజీ పోలీస్ కమిషనర్ పేల్చిన బాంబుతో మహారాష్ట్రలో రాజకీయ దుమారం రేగుతోంది. బార్లు, రెస్టారెంట్లు, హుక్కా సెంటర్ల నుంచి నెలకు రూ. 100 కోట్లు వసూలు చేయాలంటూ రాష్ట్ర హోంమంత్రి అనిల్‌ దేశ్‌ముఖ్‌ పోలీస్‌ బాసులకు టార్గెట్‌ నిర్దేశించారని ఆరోపించిన విషయం తెలిసిందే. దీంతో దేశ్‌ముఖ్‌ను తక్షణం బర్తరఫ్‌ చేయాలని, సీఎం ఉద్ధవ్‌ ఠాక్రే వెంటనే గద్దె దిగాలని బీజేపీ డిమాండ్‌ చేస్తోంది. అయితే ఈ దాడిని శివసేన తిప్పికొట్టింది. ప్రభుత్వాన్ని కూలదోసేందుకు గత 14 నెలలుగా కేంద్రం చేయని ప్రయత్నం లేదని, ఆరోపణలు చేసిన పోలీస్‌ అధికారి పరమ్‌బీర్‌ సింగ్‌ అత్యంత అవినీతిపరుడని శివసేన ఎంపీ వినాయక్‌ రౌత్‌ దుయ్యబట్టారు. అటు, అనిల్‌ దేశ్‌ముఖ్‌పై పోలీస్‌ కమిషనర్‌ చేసిన ఆరోపణలను ఎన్సీపీ అధినేత శరద్‌ పవార్‌ తోసిపుచ్చారు. పరమ్‌బీర్ ఆరోపణలు నిజం కాదని, కరోనా వైరస్ సోకడంతో ఫిబ్రవరి 5 నుంచి 15 దాకా హోం మంత్రి అనిల్ దేశ్‌ముఖ్ నాగ్‌పూర్‌ ఆసుపత్రిలో ఉంటే ముంబైలోని తన నివాసానికి ఆయన సీపీని ఎలా పిలిపిస్తారు? అని ప్రశ్నించారు. దేశ్‌ముఖ్‌ రాజీనామా చేసే ప్రశ్నే ఉత్పన్నం కాదని పవార్‌ సోమవారం స్పష్టం చేశారు. కాగా, అనిల్ దేశ్‌ముఖ్‌ అవినీతిపరుడని, ఆయనపై సీబీఐతో విచారణ జరిపించాలని కోరుతూ పోలీస్ అధికారి పరమ్‌బీర్‌ సింగ్‌ సుప్రీంకోర్టును ఆశ్రయించారు. వెంటనే దర్యాప్తు జరిపించకపోతే అనిల్ దేశ్‌ముఖ్ ఆధారాలను మాయం చేస్తారని పేర్కొన్నారు. హోం మంత్రి నివాసం వద్ద సీసీటీవీ ఫుటేజ్‌ను స్వాధీనం చేసుకోవాలని సీబీఐకి సూచించాలని కోరారు. అలాగే హోంమంత్రి అవినీతిని బయటపెట్టడంతో తనను ప్రాధాన్యత లేని హోంగార్డు విభాగానికి బదిలీచేశారని ఆరోపించారు. తన బదిలీపై స్టే విధించాలని విజ్ఞ‌ప్తి చేశారు. మరోవైపు, సీపీగా పనిచేసిన పరమ్‌బీర్‌ సింగ్‌ పెద్ద అవినీతిపరుడని మాజీ పోలీస్‌ అధికారి అనుదీప్ డాంగే ఆరోపించడం చర్చనీయాంశమయ్యింది. ‘‘నేను గమ్‌దేవీ పోలీస్‌ స్టేషన్‌లో పనిచేస్తున్నప్పుడు సస్పెండయ్యాను. అప్పట్లో ఏసీబీ ఛీఫ్‌గా ఉన్న పరమ్‌బీర్ తనను తిరిగి విధుల్లోకి తీసుకునేందుకు రూ.2 కోట్ల డిమాండ్‌ చేశారు.’ అని ఆయన బాంబు పేల్చారు. ఈ విషయమైన హోంశాఖ అదనపు కార్యదర్శికి ఫిర్యాదు చేశానని తెలిపారు. ఒక అధికారి చేసిన ఆరోపణల వల్ల పూర్తి మెజారిటీ ఉన్న సంకీర్ణ ప్రభుత్వం కుప్పకూలదని శివసేన వ్యాఖ్యానించింది.


By March 23, 2021 at 10:16AM


Read More https://telugu.samayam.com/latest-news/india-news/mumbai-ex-cp-parambir-singh-seeks-sc-for-cbi-probe-against-home-minister-anil-deshmukh/articleshow/81644541.cms

No comments