‘గాలి సంపత్’ ప్రీమియర్ టాక్: నవ్వలేక కుర్చీ నుంచి కింద పడ్డా.. డైరెక్టర్ బ్లాక్ బస్టర్ రివ్యూ
మహాశివరాత్రి సందర్భంగా ఈ వారం నాలుగు సినిమాలు తెలుగు ప్రేక్షకుల ముందుకు వస్తున్నాయి. వీటిలో మూడు సినిమాలు.. ‘గాలి సంపత్’, ‘జాతిరత్నాలు’, ‘శ్రీకారం’ కాగా ఒక కన్నడ అనువాద చిత్రం ‘రాబర్ట్’ ఉంది. అయితే, మూడు తెలుగు సినిమాలపై ప్రేక్షకుల్లో ఇప్పటికే అంచనాలు ఏర్పడ్డాయి. ఈ అంచనాలను మరింత పెంచేలా ఈ చిత్రాల యూనిట్‌‌లు ప్రచారం చేస్తున్నాయి. ఇప్పటికే ఘనంగా ప్రీ రిలీజ్ ఈవెంట్‌లు నిర్వహించారు. ‘శ్రీకారం’ సినిమాకు చిరంజీవి ప్రచారం కల్పించగా.. ‘జాతిరత్నాలు’ సినిమా ఈవెంట్‌కు విజయ్ దేవరకొండ వచ్చారు. అలాగే, ‘గాలి సంపత్’కు రామ్ ప్రచారం కల్పించారు. అయితే, ఈ సినిమాకు అనిల్ రావిపూడి ఇమేజ్ పెద్ద అసెట్. వరుస బ్లాక్ బస్టర్లతో స్టార్ డైరెక్టర్‌గా మారిన అనిల్ రావిపూడి.. ‘గాలి సంపత్’ సినిమాకు స్క్రీన్‌ప్లే అందించి, దర్శకత్వ పర్యవేక్షణ చేశారు. అలాగే, ఈ సినిమాకు ఆయన సమర్పకుడు. ఆయనతో పాటు కో-డైరెక్టర్‌గా, రచయితగా ట్రావెల్ చేసిన ఆయన మిత్రుడు ఎస్.కృష్ణను ఈ సినిమా ద్వారా నిర్మాతగా పరిచయం చేస్తున్నారు అనిల్. రాజేంద్ర ప్రసాద్ టైటిల్ రోల్ పోషించిన ఈ సినిమాలో శ్రీవిష్ణు, లవ్‌లీ సింగ్ హీరోహీరోయిన్లు. అచ్చు రాజమణి సంగీతం సమకూర్చారు. ఈ సినిమా రేపు ప్రేక్షకుల ముందుకు వస్తోంది. అయితే, కొంత మంది సినీ ప్రముఖులకు ఈరోజు ‘గాలి సంపత్’ సినిమా ప్రీమియర్ షో వేసి చూపించారు. ఈ సినిమా చూసిన ప్రముఖులు ట్విట్టర్ ద్వారా తమ అభిప్రాయాన్ని వ్యక్తం చేస్తున్నారు. ‘ప్రేమ ఇష్క్ కాదల్’, ‘సావిత్రి’ చిత్రాల దర్శకుడు పవన్ సాదినేని ‘గాలి సంపత్’ గురించి ట్విట్టర్ ద్వారా స్పందిస్తూ.. ‘‘ఈ టీమ్ నుంచి ఇలాంటి సినిమా వచ్చిందంటే నమ్మలేకపోతున్నా. అనిల్ రావిపూడి నుంచి ఇలాంటి సినిమా రావడం ఆశ్చర్యానికి గురిచేసింది. శ్రీవిష్ణు, నటకిరీటి రాజేంద్ర ప్రసాద్ గారి మధ్య ఎమోషన్స్ అద్భుతం. ప్రతి ఒక్కరూ తెరపై ఒక మాయాజాలాన్ని చూస్తారు.’’ అని పేర్కొన్నారు. ఇక కామెడీ విషయానికి వస్తే.. ఫస్టాఫ్‌లోని కొన్ని సన్నివేశాల్లో తాను నవ్వలేక సీటులో నుంచి జారిపోయానని అన్నారు. ఈ కామెడీకి థియేటర్లలో జనాలు పగలబడి నవ్వడం ఖాయమని వెల్లడించారు. ఈ సీజన్‌కు ఇదొక నిజమైన ఎమోషనల్ ఎంటర్‌టైనర్ అని అన్నారు. ఇంటర్వెల్‌కు ముందు వచ్చే సన్నివేశాలు అయితే మైండ్ బ్లోయింగ్ అని ప్రశంసించారు. మొత్తం మీద ‘గాలి సంపత్’కు బ్లాక్ బస్టర్ రివ్యూ ఇచ్చేశారు. ఇక దర్శకుడు మెహర్ రమేష్ కూడా ‘గాలి సంపత్’ సినిమా చూసి స్పందించారు. ‘‘గాలి సంపత్ సినిమా చూశాను. కామెడీ, ఎమోషనల్ రైడ్‌తో కూడిన ఒక యూనిక్ స్టోరీ ఇది. నటకిరీటి డాక్టర్ రాజేంద్ర ప్రసాద్ అద్భుతంగా నటించారు. ఆయన చేసిన మూగ కామెడీ చాలా బాగుంది. అనిల్ రావిపూడి తనదైన శైలిలో సినిమాను తెరకెక్కించారు. అనీష్, శ్రీవిష్ణు, లవ్‌లీ సింగ్, ఎస్.కృష్ణకు అభినందనలు. షైన్ స్క్రీన్స్ సంస్థ దృఢ నిశ్చయంతో ఈ సినిమాను నిర్మించింది’’ అని మెహర్ రమేష్ ట్వీట్ చేశారు.
By March 10, 2021 at 04:21PM
No comments