Breaking News

అంబానీ హత్యకు కుట్ర: ముంబైలో తీగలాగితే తీహార్ జైల్లో డొంక కదులుతోంది!


వ్యాపారదిగ్గజం ముకేశ్ అంబానీ నివాసం వద్ద పేలుడు పదార్థాలుంచిన కేసుతో తీహార్ జైల్లోనే కుట్ర జరిగిందా? అంటే అవుననే సమాధానం వినబడుతోంది. గురువారం సాయంత్రం తీహార్ జైల్లో అధికారులు ముమ్మరంగా సోదాలు నిర్వహించారు. ఎనిమిదో నెంబరు జైల్లో ఓ మొబైల్ ఫోన్, సిమ్ కార్డు‌ను స్వాధీనం చేసుకున్న అధికారులు.. జైషుల్‌మిద్ పేరుతో క్రియేట్ చేసినట్టు టెలిగ్రామ్ అకౌంట్‌ను గుర్తించారు. అంబానీ నివాసం వద్ద పేలుడు పదార్థాలతో కూడిన వాహనం ఉంచిన ఘటనకు ఈ టెలిగ్రామ్ ఖాతా బాధ్యత వహించడమే కాదు, క్రిప్టోకరెన్సీ ద్వారా డబ్బులు డిమాండ్ చేసినట్టు వెల్లడయ్యింది. తిహార్ జైలు వర్గాల ప్రకారం.. ఎనిమిదో నెంబరు గదిలో ఇండియన్ ముజాయిద్దీన్ ఉగ్రవాదులు తెహిసిన్ అఖ్తర్ సహా అల్‌ఖైదాతో సంబంధాలున్నవారు, అండర్‌వరల్డ్ డాన్‌లు ఉన్నారు. మొబైల్ ఫోన్‌ను అఖ్తర్ బ్యారక్ నుంచి స్వాధీనం చేసుకోగా.. అతడినే బలంగా అనుమానిస్తున్నారు. ఢిల్లీ ప్రత్యేక విభాగం పోలీసులు గురువారం తీహార్ జైలును పరిశీలించారు. నిందితుడు వినియోగించిన 9311**0819 మొబైల్ నెంబరు తీహార్ పరిసరాల్లోనే ఉన్నట్టు ముంబై సైబర్ క్రైమ్ నిపుణులు గుర్తించడంతో ఢిల్లీ పోలీసులు అక్కడకు చేరుకున్నారు. కనీసం 11 మంది జైలు ఖైదీలను ప్రశ్నించినట్టు జైలు వర్గాలు పేర్కొన్నాయి. అనుమానిత ఫోన్ తూర్పు ఢిల్లీలోని రఘుబార్ పురకు చెందిన జలదీప్ లోధియా పేరున ఉన్నట్టు వర్గాలు తెలిపాయి. గతేడాది జులైలో యాక్టివేట్ అయిన ఈ నెంబరు, తర్వాత తీహార్ జైలుకు పంపినట్టు పేర్కొన్నాయి. దీంతోపాటు 9711**9888 అనే నెంబరుపై కూడా అనుమానం వ్యక్తం చేస్తున్నారు. ఇది గతేడాది సెప్టెంబరు నుంచి స్విచ్ఛాఫ్‌లో ఉంది. ఈ నెంబరుతోనే జులైలో 9311**0819ను యాక్టివేట్ చేశారు. ప్రాథమిక నెంబరు వినియోగదారు టెలిగ్రామ్ ఖాతాను సృష్టించడానికి వర్చువల్ నెంబర్లను వినియోగించాడు.. అంతేకాకుండా, అనుమానితుడు అంతర్జాలంలో ఐపీ అడ్రస్‌ను గుర్తించకుండా ఉండేందుకు టీఓఆర్ బ్రౌజర్‌ను ఉపయోగిస్తున్నట్టు గుర్తించారు. ముంబై పోలీసులు నియమించిన సైబర్ నిపుణులు టెలిగ్రామ్ ఛానల్ గురించి సమాచారం పొందడానికి ట్రోజన్లను ఉపయోగించారు. ఇది ఫిబ్రవరి 26 మధ్యాహ్నం క్రియేట్ చేసినట్టు కనుగొన్నారు. అంబానీ నివాసం వెలుపల వాహనాన్ని నిలిపి ఉంచిన ఘటనకు బాధ్యత వహిస్తూ ఫిబ్రవరి 27న టెలిగ్రామ్‌లో పోస్ట్ చేశారు.


By March 12, 2021 at 12:40PM


Read More https://telugu.samayam.com/latest-news/india-news/tihar-jail-link-to-mukesh-ambani-plot-revealed-cell-sim-seized/articleshow/81463177.cms

No comments