సబర్మతి సాక్షిగా.. ‘అమృత్‌ మహోత్సవ్‌’కు మోదీ శ్రీకారం
దేశానికి స్వాతంత్ర సిద్ధించి 75 వసంతాలు అవుతున్న నేపథ్యంలో ఏడాదిన్నర పాటు ఉత్సవాలను నిర్వహించనున్నారు. ఎంతో ప్రతిష్ఠాత్మకంగా నిర్వహించే ‘’ వేడుకలకు ప్రధాని నరేంద్రమోదీ శుక్రవారం శ్రీకారం చుట్టారు. గుజరాత్‌లోని సబర్మతి ఆశ్రమం నుంచి దండి వరకు నిర్వహించే పాదయాత్రను ఆయన నేడు జెండా ఊపి లాంఛనంగా ప్రారంభించారు. స్వాతంత్ర పోరాటంలో భాగంగా మహాత్ముడు సబర్మతి నుంచి దండి వరకు మార్చ్ నిర్వహించిన రోజునే ఈ ఉత్సవాలకు శ్రీకారం చుట్టడం విశేషం. అమృత్‌ మహోత్సవ్‌ ప్రారంభోత్సవం కోసం శుక్రవారం ఉదయం ఢిల్లీ నుంచి అహ్మదాబాద్‌ చేరుకున్న మోదీ నేరుగా సబర్మతీ ఆశ్రమానికి వెళ్లారు. అక్కడ జాతిపిత మహాత్మాగాంధీ విగ్రహానికి పూలమాల వేసి నివాళులర్పించారు. అనంతరం అభయ్‌ ఘాట్‌ సమీపంలో ఏర్పాటు చేసిన ప్రత్యేక ఎగ్జిబిషన్‌ను ప్రధాని తిలకించారు. దండియాత్ర వార్షికోత్సవం సందర్భంగా పాదయాత్ర చేపట్టారు. జాతీయోద్యమంలో దండి యాత్రకు ప్రత్యేక గుర్తింపు ఉంది. ఈ సందర్భాన్ని గుర్తుచేసుకుంటూ 81 మంది 241 మైళ్ల దూరం పాదయాత్ర చేయనున్నారు. ఇది 25 రోజుల పాటు సాగి దండివద్ద ఏప్రిల్‌ 5న ముగియనుంది. ఆ రోజున దండిలో భారీ కార్యక్రమం నిర్వహించనున్నారు. అంతకుముందు ప్రధాని మోదీ ట్విటర్‌ వేదికగా ఆసక్తికర పోస్ట్‌ చేశారు. స్థానిక వస్తువులను కొనుగోలు చేసి వాటిని వోకల్‌ ఫర్‌ లోకల్‌ యాష్‌ ట్యాగ్‌తో సోషల్‌మీడియాలో పోస్ట్‌చేయాలని మోదీ విజ్ఞప్తి చేశారు. స్థానిక ఉత్పత్తులకు ప్రచారం కల్పించడమే గాంధీజీకి ఘనమైన నివాళి అని మోదీ ఈ సందర్భంగా తెలిపారు. హైదరాబాద్‌లోని నాంపల్లి పబ్లిక్‌ గార్డెన్స్‌లో జరిగిన ప్రారంభ వేడుకల్లో తెలంగాణ ముఖ్యమంత్రి కే చంద్రశేఖరరావు పాల్గొన్నారు. కేసీఆర్‌ మఖ్యఅతిథిగా పాల్గొని జాతీయ పతాకాన్ని ఆవిష్కరించారు. అనంతరం పోలీసుల నుంచి గౌరవవందనం స్వీకరించారు. కేసీఆర్‌ మాట్లాడుతూ.. ‘భారత స్వాతంత్ర్య చరిత్ర ప్రపంచ పోరాటాల చరిత్రలోనే ఒక మహోజ్వల ఘట్టం’’ అని వివరించారు. అటు, ఏపీ సీఎం వైఎస్ జగన్ జాతీయ పతాకాన్ని రూపొందించిన పింగళి వెంకయ్య కుటుంబాన్ని కలిశారు. గుంటూరు జిల్లా మాచర్లలో నివసిస్తున్న ఆయన కుమార్తె ఘంటసాల సీతామహాలక్ష్మిని ఈసందర్భంగా జగన్ సన్మానించారు.
By March 12, 2021 at 01:23PM
No comments