కమలాకు ఇంటి కష్టాలు.. సూట్‌కేసులతోనే కాలం వెళ్లదీస్తున్న ఉపాధ్యక్షురాలు!

అమెరికా ఉపాధ్యక్షురాలిగా బాధ్యతలు చేపట్టి రెండు నెలలు పూర్తయినా ఆమె ఇంకా అధికారిక నివాసంలో కాలుమోపలేదు. ఇంకా, ఎప్పుడు అందులోకి వెళతారో తెలియదు. ఇది అగ్రరాజ్యంలో అలసత్వం, నిర్లక్ష్యానికి పరాకాష్ఠ. అమెరికా కదా, అక్కడ అన్ని పనులూ సవ్యంగా సాగిపోతుయనుకుంటే పొరపాటే. దానికి నిదర్శనమే కమలా హారిస్ అధికారిక నివాసం మరమ్మతులు అంశం. అధికారిక నివాసంలో మరమ్మతులు జరుగుతూనే ఉన్నాయి. అవి ఎప్పుడు ముగుస్తాయంటే సమాధానం కష్టం. దీంతో అధికారిక నివాసంలోకి ఎప్పుడెప్పుడు వెళ్దామని ఉత్సాహంగా ఉన్న కమలా హ్యారిస్‌‌కు ఈ సంఘటన విసుగు తెప్పిస్తోంది. రాజధాని వాషింగ్టన్‌లో అధ్యక్ష, ఉపాధ్యక్షులకు అధికారిక నివాసాలు ఉంటాయి. జో బైడెన్‌తో పాటు జనవరి 20న ఉపాధ్యక్షురాలిగా కమల ప్రమాణస్వీకారం చేశారు. అదే రోజున బైడెన్ అధికార నివాసం శ్వేతసౌధానికి వెళ్లిపోయారు. కమల మాత్రం తన భర్తతో కలిసి రెండు నెలలుగా అధ్యక్షుడి అధికార గెస్ట్‌హౌస్ బ్లెయిర్‌ హౌస్‌లోనే గడుపుతున్నారు. సూట్‌కేసుల్లో సర్దుకున్న వస్తువులనే వినియోగిస్తున్నారు. ఉపాధ్యక్షుడికి కేటాయించిన నివాసం (నావల్‌ అబ్జర్వేటరీ)లో మరమ్మతులు జరుగుతుండటమే ఇందుకు కారణం. కానీ అక్కడ రెండు నెలలుగా చేస్తున్న మరమ్మతులు ఏంటి? అనేది తెలియరాలేదు. అయితే, ఉపాధ్యక్షురాలి అధికార నివాసంలో ప్లంబింగ్, హీటింగ్, ఏసీకి సంబంధించి మరమ్మతులు జరుగుతున్నట్టు అమెరికా అధికార రికార్డులను పరిశీలించిన సీఎన్ఎన్ మీడియా గుర్తించింది. కానీ, కమల ఆ భవనంలోకి వెళ్లకపోవడానికి ఇవి సరైన కారణాలై ఉండకపోవచ్చని అభిప్రాయపడుతున్నారు. పనుల తీరును పర్యవేక్షించడానికి మూడు వారాల కిందట అక్కడకు వెళ్లిన కమలా హారిస్‌.. వంటగదిలో మార్పులను సూచించారు. వంటలపై మక్కువ చూపించే కమల.. మార్పులు చేయాలని సూచించినా కాంట్రాక్ట్ సంస్థ పట్టించుకోలేదు. ఆమె సూచనల మేరకు ఎలాంటి చర్యలూ తీసుకోలేదని తెలుస్తోంది. ఇదిలా ఉండగా, ఈ వ్యవహారంపై విసుగుచెందిన కమలాకు అధికార నివాసానికి ఎప్పుడు వెళతానా అన్న ఆలోచన రోజు రోజుకూ పెరిగిపోతోందని విశ్వసనీయ వర్గాలు తెలిపాయి. గత కొన్నేళ్లుగా ఉపాధ్యక్ష నివాసంలో మరమ్మతులు జరుగుతూనే ఉన్నాయి. గతేడాది సెప్టెంబరులో 164,000 డాలర్లు వెచ్చించి ట్యాంకు వ్యవస్థలో మార్పులు చేసి, ఓ కొలను నిర్మించారు. ప్రస్తుత ప్రాజెక్టు కోసం 3.8 మిలియన్ డాలర్లు ఖర్చుచేస్తున్నట్టు రికార్డుల్లో వెల్లడయ్యింది. మొత్తం 9,000 చదరపు అడుగులకుపైగా విస్తీర్ణంలోని ఈ భవనాన్ని 1893లో నిర్మించారు. తొలిసారి 2018లో దీని నవీకరణ పనులకు 1,19,000 డాలర్లు ఖర్చు చేశారు.

By March 30, 2021 at 09:28AM

Read More https://telugu.samayam.com/latest-news/international-news/after-two-months-in-office-kamala-harris-is-still-living-out-of-suitcases/articleshow/81752899.cms