మాజీ పోలీస్ బాస్ లేఖతో రాజకీయ దుమారం.. మహారాష్ట్ర హోంమంత్రి రాజీనామా!
అంబానీ నివాసం వద్ద జిలిటెన్ స్టిక్స్‌తో నిలిపి ఉంచిన వాహనం కేసు మహారాష్ట్ర రాజకీయాల్లో దుమారం రేపుతోంది. హోంమంత్రి అనిల్ దేశ్‌ముఖ్‌ నెలకు రూ.100 కోట్లు వసూలుచేయడమే లక్ష్యమని ముంబై మాజీ పోలీస్ కమిషనర్‌ పరంబీర్ సింగ్ సంచలన ఆరోపణలు చేశారు. ఈ బాధ్యతలను సచిన్ వాజేకు అప్పగించారని ఆరోపిస్తూ సీఎం ఉద్ధవ్‌ ఠాక్రేకు శనివారం ఆయన ఓ లేఖ రాశారు. పోలీస్ అధికారే స్వయంగా హోంమంత్రిపై అవినీతి ఆరోపణలు చేయడంతో మహారాష్ట్ర సంకీర్ణ ప్రభుత్వం తీవ్రంగా పరిగణించింది. మరోవైపు, ముంబయి, నాగ్‌పూర్‌ సహా పలు ప్రధాన నగరాల్లో ప్రతిపక్ష బీజేపీ నేతలు, కార్యకర్తలు హోంమంత్రికి వ్యతిరేకంగా ఆదివారం నిరసనకు దిగారు. హోం మంత్రి అనిల్ దేశ్‌ముఖ్‌ వెంటనే రాజీనామా చేయాలని డిమాండ్‌ చేశారు. హోం మంత్రిని తొలగించకుంటే, సీఎం తన పదవికి రాజీనామా చేయాలని మాజీ సీఎం దేవేందర్ ఫడ్నవీస్ వ్యాఖ్యానించారు. తాజా పరిణామాల నేపథ్యంలో నాగ్‌పూర్‌లో అనిల్ దేశ్‌ముఖ్‌ నివాసం వద్ద పోలీసులు పటిష్ఠమైన బందోబస్తు ఏర్పాటు చేశారు. మరోవైపు, ఎన్సీపీ అధినేత శరద్‌పవార్‌ ఆ పార్టీ సీనియర్ మంత్రులను ఢిల్లీకి పిలిపించినట్టు తెలుస్తోంది. డిప్యూటీ సీఎం అజిత్‌ పవార్‌, రాష్ట్ర ఎన్సీపీ చీఫ్‌ జయంత్‌ పాటిల్‌ ఆధివారం మధ్యాహ్నం పవార్‌తో భేటీ కోసం ఢిల్లీకి బయలుదేరనున్నారు. వారితో పాటు శివసేన సీనియర్ నేత సంజయ్‌ రౌత్‌ కూడా ఈ సమావేశానికి హాజరు కానున్నట్లు ఆయనే స్వయంగా వెల్లడించారు. పవార్‌ సరైన నిర్ణయమే తీసుకుంటారని, తాను ఈ రోజు మధ్యాహ్నం ఢిల్లీ వెళ్లి ఆయన్ను కలుస్తానని రౌత్‌ చెప్పారు. అటు, ముఖ్యమంత్రి సైతం శరద్ పవార్‌తో ఆదివారం సాయంత్రం భేటీ అవుతారని శివసేన వర్గాలు తెలిపాయి. కాగా, పరంబీర్ సింగ్ తనపై చేసిన ఆరోపణలను హోంమంత్రి ఖండించారు. ఆయనపై పరువు నష్టం దావా వేస్తానని తెలిపారు. అనిల్ దేశ్‌ముఖ్‌ను పదవి నుంచి తప్పిస్తారనే ప్రచారం జరుగుతోంది. ముంబై క్రైమ్‌ బ్రాంచ్ ఇంటెలిజెన్స్‌ యూనిట్‌ హెడ్‌గా ఉన్న వాజేను హోంమంత్రి అనిల్ దేశ్‌ముఖ్‌ కొన్ని నెలలుగా పలుమార్లు తన నివాసానికి పిలిపించుకున్నారని పరంబీర్ సింగ్ తన లేఖలో పేర్కొన్నారు. తన కోసం నిధులు తీసుకురావాలని పదే పదే ఒత్తిడి తెచ్చారని ఆరోపించారు. ఆ సమయంలో మంత్రి వ్యక్తిగత సిబ్బంది కూడా ఉన్నారని ఆయన పేర్కొన్నారు. తనను ‘బలిపశువు’ గా మార్చారని ఆరోపించిన సింగ్.. తన పరిధిని దాటి కేసులను ఎలా నిర్వహించాలో, అభియోగాలు నమోదు చేయాలనే దానిపై హోంమంత్రి అనేక సందర్భాల్లో పోలీసు అధికారులకు సూచించారని దుయ్యబట్టారు. ఎంపీ మోహన్‌భాయ్ దేల్కర్ మరణంపై ఆత్మహత్య కేసును దాఖలు చేయడానికి నిరాకరించిన తనపై మంత్రి ‘అసంతృప్తి’ వ్యక్తం చేసి, రాజకీయ లబ్ది పొందారని ఆయన అన్నారు.
By March 21, 2021 at 02:04PM
No comments