ప్రభుత్వ విధానాలను వ్యతిరేకిస్తూ అభిప్రాయం చెప్పడం దేశద్రోహం కాదు: సుప్రీం
ప్రభుత్వం, దాని విధానాలకు వ్యతిరేకంగా పౌరులు తమ అభిప్రాయాలను వ్యక్తం చేయడం దేశద్రోహం కాబోదని బుధవారం సర్వోన్నత న్యాయస్థానం స్పష్టం చేసింది. ప్రభుత్వ అభిప్రాయానికి అసమ్మతి తెలిపినా, దానికి భిన్నమైనది చెప్పినా దేశ ద్రోహం కాదని వ్యాఖ్యానించింది. జమ్మూ కశ్మీర్కు ప్రత్యేక హోదా కల్పించే రద్దుపై నేషనల్ కాన్ఫరెన్స్ అధ్యక్షుడు ఫరూక్ అబ్దుల్లా చేసిన వ్యాఖ్యలు దేశ ద్రోహం కిందకు వస్తాయంటూ దాఖలైన ప్రజాప్రయోజన వ్యాజ్యాన్ని కొట్టివేస్తూ పై విధంగా వ్యాఖ్య చేసింది. అంతేకాదు, ఇటువంటి పిల్ దాఖలు చేసినందుకు పిటిషన్దారులకు రూ.50 వేలు జరిమానా సైతం విధిస్తూ జస్టిస్ సంజయ్ కిషన్ కౌల్, జస్టిస్ హేమంత్ గుప్తాలతో కూడిన ధర్మాసనం తీర్పు చెప్పింది. ఆర్టికల్ 370 రద్దు తర్వాత కశ్మీర్ను చైనాకు అప్పగించాలంటూ ఫరూక్ అబ్దుల్లా చేసిన వ్యాఖ్యలు దేశద్రోహం కిందకు వస్తాయంటూ పలువురు సుప్రీంకోర్టులో పిల్ దాఖలు చేశారు. విశ్వ గురు ఇండియా విజన్ ఆఫ్ సర్దార్ పటేల్ సంస్థకు చెందిన రజత్ శర్మ, నెహ్ శ్రీవాత్సవలు ఈ దావా వేశారు. ఆయన ప్రకటన జాతి వ్యతిరేక, దేశద్రోహం కిందకు వస్తాయని, పార్లమెంట్ సభ్యుడిగా అనర్హుడిగా ప్రకటించాలని కోరారు. పిటిషనర్లు తరఫున న్యాయవాది శివ్ సాగర్ తివారీ వాదనలు వినిపించారు. ఈ సందర్భంగా ప్రకటనకు సంబంధించిన ఆధారాలు సమర్పించాలని ధర్మాసనం కోరింది. కానీ, ఫరూక్ వ్యాఖ్యలను ప్రస్తావిస్తూ బీజేపీ అధికార ప్రతినిధి చేసిన ప్రకటనకు సంబంధించిన వీడియోను పిటిషనర్లు సమర్పించారు. దీనిపై ఆగ్రహం వ్యక్తం చేసిన ధర్మాసనం.. ఆయన ప్రకటన ఏది? ఈ అంశం సుప్రీంకోర్టులో ఉందని తెలియదా? అని ప్రశ్నించింది. ఈ ఆరోపణను పిటిషనర్లు నిరూపించలేకపోయారంటూ సుప్రీంకోర్టు వ్యాజ్యాన్ని కొట్టివేసింది. అంతేకాదు, కేవలం పబ్లిసిటీ కోసం ఇటువంటి పిటిషన్ దాఖలు చేసినందుకు కచ్చితంగా శిక్షించాల్సిందేనంటూ రూ.50 జరిమానా విధించింది. ఈ మొత్తాన్ని న్యాయవాదుల సంక్షేమానికి డిపాజిట్ చేయాలని ఆదేశించింది. కేంద్ర ప్రభుత్వం తీసుకున్న నిర్ణయానికి వ్యతిరేకంగా తన అభిప్రాయాలను వ్యక్తం చేయడం దేశద్రోహం ఎలా అవుతుందని వ్యాఖ్యానించింది.
By March 04, 2021 at 06:51AM
No comments